Dagiti Proverbio 12 - Ti Biblia (1973)

Nadumaduma a proverbios nga isupadida ti nalinteg iti nadangkes.

¹ Siasinoman nga agayat iti pannacaisuro ayatenna ti pannacaammo; ngem ti manggura iti panagtubngar nadueg.

² Ti naimbag a tao maragpatnanto ti parabur ni Jehova; ngem iti tao a nadangkes dagiti panggepna isu dusaennanto.

³ Ti tao saanto a mapasingkedan a gapu iti kinadangkes; ngem ti ramut ti nalinteg dinto magaraw.

⁴ Ti natalunggadingan a babai isu ti balangat ni asawana; ngem ti agaramid iti nacababain isu ti cas panagtumoy cadagiti tultulangna.

⁵ Dagiti pampanunot dagiti nalinteg apagisuda; ngem dagiti balbalacad dagiti nadangkes isuda dagiti panangallilaw.

⁶ Dagiti sasao dagiti nadangkes panagsibloc iti dara; ngem ti ngiwat dagiti nalinteg mangispalto cadacuada.

⁷ Dagiti nadangkes maitublacda, ket maawandan; ngem ti balay dagiti nalinteg sititibkerto.

⁸ Ti maysa a tao madayawto cas mayalubog iti kinasiribna; ngem ti nadangkesan iti puso mauyuyawto.

⁹ Nasaysayaat ti bassit ti pannacaipatpategna, ket adda adipenna, ngem ti mangidaydayaw iti bagina met laeng, sa ket awan canenna.

¹⁰ Ti nalinteg a tao ipatpategna ti biag ti animalna; ngem dagiti nadungngo a caasi ti nadangkes nadawelda.

¹¹ Ti mangtalon iti dagana addaanto iti naruay a canen; ngem ti sumursurot cadagiti barengbareng awanan ti pannacaawat.

¹² Ti nadangkes tarigagayanna ti bateng dagiti dakes a tattao; ngem ti ramut ti nalinteg agbunganto.

¹³ Cadagiti panaglabsing dagiti bibig isu ti pangsilo iti dakes a tao; ngem ti nalinteg macalapsutto iti pagducotan.

¹⁴ Ti tao mapnecto iti imbag gapu iti bunga ti ngiwatna; ket dagiti gapuanan dagiti im-ima ti tao maipaaydanto kencuana.

¹⁵ Ti dalan ti maag nalinteg cadagiti matana met laeng; ngem ti masirib ipangagna ti balacad.

¹⁶ Ti alipunget ti maag maammoan a dagus; ngem ti manakem a tao lingdanna ti pacabainan.

¹⁷ Ti mangyesngaw iti pudno iparangarangna ti kinalinteg; ngem ti naulbod a sacsi mangallilaw.

¹⁸ Adda agsao a sidadarasudos a cas cadagiti panagduyoc ti campilan; ngem ti dila ti masirib isu ti salun-at.

¹⁹ Ti bibig ti pudno mapagtalinaedto iti agnanayon; ngem ti natiri a dila apagdaricmat laeng.

²⁰ Ti panangallilaw adda iti puso dagiti agpakinakem iti dakes; ngem cadagiti mangibalbalacad iti cappia adda ragsac.

²¹ Awanto ti pagdacsan a mapasamac iti nalinteg; ngem ti nadangkes mapnonto iti dakes.

²² Dagiti natiri a dila macarimonda ken ni Jehova; ngem dagiti agar-aramid a matalec macaay-ayoda kencuana.

²³ Ti nanacman a tao ilalaenna ti ammona; ngem ti puso dagiti maag agibunannag iti kinamaag.

²⁴ Ti ima dagiti nagaget agiggemto iti panagturay; ngem ti nasadut maipaconto iti aramid a nadagsen.

²⁵ Ti bantot ti puso ti maysa a tao mamagdumog kencuana; ngem ti naimbag a sao paragsakenna.

²⁶ Ti nalinteg isu ti mangidalan iti caarrubana; ngem ti dalan dagiti nadangkes mangpabiddut cadacuada.

²⁷ Ti nasadut a tao dina tonoen ti naalana iti panaganup; ngem ti napateg a gupit dagiti tattao maipaay iti nagaget.

²⁸ Iti dalan ti kinalinteg adda ti biag; ket iti desdesna awan ni patay.