Dagiti Proverbio 1 - Ti Biblia (1973)

Pacaaramatan dagiti proverbios. Pangpaannad iti pannacasulisog cadagiti managbasol. Pangpaannad ni sirib cadagiti manglais kencuana.

¹ Dagiti proverbios ni Salomon nga anac ni David, ari ti Israel:

² Ti panangammo iti kinasirib ken sursuro; ti panangilasin cadagiti sasao ti pannacaawat;

³ Ti panangawat iti sursuro iti nanacman a cababalin, iti kinalinteg ken kinajusticia ken panagpapada;

⁴ Ti pannangted iti kinamanakem cadagiti nanengneng, iti bumaro pannacaammo ken kinaannad:

⁵ Tapno ti masirib a tao dumngeg coma, ket dumegdeg iti pannacasursuro; ken tapno ti tao a mannacaawat magawatna coma dagiti naingundawayan a patpatigmaan:

⁶ Ti panangawat iti proverbio, ken pangngarig, dagiti sasao dagiti masirib, ken dagiti nauneg a panagsaoda.

⁷ Ti panagbuteng ken ni Jehova isu ti punganay ti pannacaammo; ngem dagiti maag laisenda ti sirib ken sursuro.

⁸ Anacco, denggem ti pannursuro toy amam, ket dica bay-an ti linteg ni inam:

⁹ Ta isudanto ti balangat ti saniata dita olom, ken calangcang a mayuccor dita tengngedmo.

¹⁰ Anacco, no dagiti managbasol sulisogendaca, dica umanamong cadacuada.

¹¹ No cunada, Cumuyogca cadacami, intayo sumaneb iti dara; intayo siblocan a sililimed dagiti awan basolda iti awan gapgapuna;

¹² Intayo alun-unen ida a sibibiag a cas ken Tanem, ken sibubukel, a cas cadagiti agpababa iti abut;

¹³ Masaracantayto amin a napateg a sanicua; punnoentayto dagiti balbalaytayo iti sinamsam;

¹⁴ Maipaaymonto ti gasatmo cadacami; addanto cadatayo amin ti maymaysa a supot:

¹⁵ Anacco, dica makicuyog iti dalan cadacuada; tenglem ta sacam iti desdesda:

¹⁶ Ta dagiti sacsacada agtarayda iti dakes, ken agdarasda a mangibuyat iti dara.

¹⁷ Ta barengbareng ti pannacaipacat ti iket iti imatang ti aniaman a tumatayab:

¹⁸ Ket dagitoy sanebenda ti darada met laeng; siblocanda a sililimed dagiti biagda met laeng.

¹⁹ Casta dagiti daldalan ti siasinoman a siaagum iti gungunaen; iccatenna ti biag dagiti akincucua.

²⁰ Ni sirib agpucpuccaw iti lansangan; iyebcasna ti timecna cadagiti nawaya a yan;

²¹ Aglaaw iti nangrona a yan ti pagdadagupan; iti wangawangan dagiti ruruangan, iti uneg ti ili, ibalicasna dagiti saona:

²² Casano ti capaut ti panangayatyonto iti kinanengneng, dacayo a nanengneng? Ket dagiti managuyaw, ken panaggura dagiti maag iti pannacaammo?

²³ Taliawenyo cadi toy panangtubngarco: Adtoy, iparucpocconto ti espirituc cadacayo; ipacaammocto dagiti saoc cadacayo.

²⁴ Gapu ta immayabac, ket nagmadicayo; inunnatco ti imac, ket awan tao a nangicascaso;

²⁵ Ngem inawawanyo amin a pammagbagac, ket nagmadicayo iti panangtubngarco:

²⁶ Agcatawaacto met intono pannacadidigrayo; agrabrabacacto intono dumteng ti panagbutengyo;

²⁷ Intono ti panagbutengyo dumteng a cas bagio, ken ti didigrayo dumteng a cas alipugpog; intono dumteng cadacayo da senaay ken ladingit.

²⁸ Iti casta awagandacto, ngem diacto sumungbat; birukendacto a sigaganetget, ngem didacto masaracan:

²⁹ Agsipud ta ginurada ti pannacaammo, ket saanda a pinili ti panagbuteng ken ni Jehova:

³⁰ Nagmadida iti pammagbagac; linaisda amin a panangtubngarco:

³¹ Gapuna canendanto ti bunga ti cababalinda met laeng, ken mapnodanto cadagiti ing-ingpenda met laeng.

³² Ta ti pannacapasanud dagiti nanengneng papatayennanto ida, ken ti naliway a nam-ay dagiti maag pucawennanto ida.

³³ Ngem siasinoman a mangipangag caniac agtalinaedto a sitatalged, ket sitatalnanto nga awan butengna iti dakes.