Amos 9 - Ti Biblia (1973)

Ti pannacaparmec ti Israel, ken ti pannacaisubli dagiti nasingpet.

¹ Nakitac ti Apo nga adda a sitatacder iti sidiran ti altar, ket kinunana, Cabilem dagiti paratoc dagiti adigi, tapno magungon dagiti dapian; ket burakem ida cadagiti oloda amin; ket dagitinto matda cadacuada patayecto iti campilan: awanto ti uray maysa cadacuada a macalisi, ken awanto ti uray maysa cadacuada a macatalaw.

² Uray umabutda pay iti Sheol, idiay ti imac alaennanto ida, ket uray pay cumalayatda sadi langit, manipud idiay ipababacto ida.

³ Ket uray pay aglemmengdan idiay tapaw ti Carmelo, idiay birukecto ida ket alaec ida; ken uray pay no aglingedda iti imatangco iti tucoc ti baybay, idiay ibilinconto iti uleg, ket cumagatto cadacuada.

⁴ Ket uray pay mapanda a pacayawan iti sango dagiti cabusorda, idiay ibilinconto iti campilan, ket isu patayennanto ida: ket imatmatconto cadacuada dagiti matac a maipaay a pagdacsan, a saan a paglaingan.

⁵ Ta ti Apo, ni Jehova dagiti buybuyot, isu daydiay mangsagid iti daga, ket matunaw, ket agsangitto amin dagiti agtaeng kencuana; ket ngumatonto amin a cas maysa a Carayan, ket lumnedto manen a cas iti Carayan sadi Egipto.

⁶ Isu daydiay Mangaramid cadagiti siledna cadagiti langlangit, ket binangonna ti nagtangatangan iti ngato ti daga; daydiay umawag cadagiti dandanum iti baybay, ket ibucbucna ida iti rabaw ti daga; Jehova ti naganna.

⁷ Saancayo aya a cas cadagiti annac dagiti taga Etiopia caniac, O annac ti Israel? cuna ni Jehova. Saanco aya nga inaon ti Israel idiay daga ti Egipto, ket dagiti Filisteo idiay Caftor, ken dagiti Sirios idiay Kir.

⁸ Adtoy, dagiti mata ni Apo Jehova addada iti managbasol a pagarian, ket siac dadaelecto iti rabaw ti daga; ngem diacto racraken a matalipupus ti balay ni Jacob, cuna ni Jehova.

⁹ Ta adtoy, ibilinconto, ket ti balay ni Israel yacayakecto iti tenga dagiti amin a nacion, a cas iti pannacailasin dagiti bucbukel iti yacayacan, ngem saanto a matinnag ti uray battit a bukel iti daga.

¹⁰ Amin dagiti managbasol iti ilic mataydanto iti campilan dagidiay agcuna, Ti dakes saannacamto a macamacam wenno masabat.

¹¹ Iti daydiay nga aldaw, siac ibangonconto ti tabernaculo ni David a natuang, ket sullatacto dagiti gutbawna; ket ipatacderconto dagiti nadadael, ket bangonecto a cas idi punganay.

¹² Tapno tagicuaenda coma ti matda iti Edom, ken amin a nacion a mainaganan iti naganco, cuna ni Jehova isu a mangaramid iti daytoy.

¹³ Adtoy, dumteng dagiti al-aldaw, cuna ni Jehova, a ti agararado macamacamnanto ti agapit ket iti agpayatpayat cadagiti uv-uvas camacamenna ti agbunobon; ket dagiti banbantay itedteddanto ti nasam-it nga arac, ket amin dagiti turturod matunawdanto.

¹⁴ Ket pagbaliwecto manen dagiti nacayawan ti ilic nga Israel, ket isuda bangonendanto dagiti il-ili a nadadael, ket pagyanandanto; ket agmuladanto cadagiti cauvasan, ket inumendanto ti arac a nagtaud cadacuada; agaramiddanto met cadagiti minuyongan, ket canendanto dagiti bungbungada.

¹⁵ Ket imulacto ida cadagiti dagdagada, ket ni caanoman saandanto a maparut idiay dagada nga intedco cadacuada, cuna ni Jehova a Diosmo.