Amos 8 - Ti Biblia (1973)

Ti masapa a pannacaparmec ti Israel maipadto.

¹ Iti casta impakita caniac ni Jehova: ket adtoy, maysa nga alat ti bunga iti pannawen ti pudot.

² Ket kinunana, Ania ti makitam, Amos? Ket insungbatco, Maysa nga alat ti bunga iti pannawen ti pudot. Idin kinuna caniac ni Jehova, Napagtengen ti canibusanan ti ilic nga Israel; diacto labasanen ida.

³ Ket dagiti cancanta iti templo dungawdanto iti dayta nga aldaw, cunana ni Apo Jehova: adunto dagiti bangcay; ibellengdanto ida a siuulimec iti amin a disso.

⁴ Denggenyo daytoy, dacayo a mangalun-un coma cadagiti macasapul, ket ibusenyo dagiti napanglaw iti daga,

⁵ A cunayo, Inton ano ti panagtapus ti lutuad, tapno ilacomi dagiti bucbukel? Ken ti aldaw a panaginana, tapno iparangmi ti trigo, a pabassitenmi ti efa, ket padagsenenmi ti siclo, ket agaramidcami a siuulbod babaen cadagiti pagtimbengan a naulbod;

⁶ Tapno magatangmi dagiti napanglaw iti pirac, ket dagiti macasapul iti agparis a zapatos, ket ilacomi ti eppes a trigo.

⁷ Ni Jehova sinapataanna babaen ti kinatan-oc ni Jacob, Di bumurong a diacto malipatan iti agnanayon ti aniaman nga aramidda.

⁸ Saanto aya nga agkintayeg ti daga gapu iti daytoy, ket amin nga agnaed kencuana agsangit? wen, ket ngumatonto ti daga a cas maysa a Carayan; ket maparigatto ken maipalnedto a cas idiay Carayan ti Egipto.

⁹ Ket maaramidto iti dayta nga aldaw, cuna ni Apo Jehova, a palnekecto ti init iti tengnga ti aldaw, ket pagsipngetecto ti daga iti aldaw a nalawag.

¹⁰ Pagbalinecto dagiti rambacyo a dung-aw, ket dagiti cantayo, nga un-unoy; icabilconto cadagiti amin a lomoyo ti lupot a nakersang, ken calvo iti amin nga oloyo; ket aramidecto a cas pagleddaangan iti bugbugtong nga anac, ket iti gibusna cas maysa nga aldaw a napait.

¹¹ Adtoy, umay dagiti al-aldaw, cuna ni Apo Jehova, nga ipawitconto ti bisin ditoy daga, saan a bisin iti tinapay, wenno waw iti danum, no saan ket a panagdengngeg cadagiti sao ni Jehova.

¹² Agbariw-asdanto manipud baybay agingga iti sabali a baybay, ken manipud amianan agingga iti daya; agtaraydanto nga agal-laal-la nga agsapul iti sao ni Jehova, ngem saandanto a matumpungan.

¹³ Daytanto nga aldaw dagiti naimnas a babbalasang ken dagiti agtutubo a lallaki matalimudawdanto iti waw.

¹⁴ Dagidiay agsapata babaen ti basol ti Samaria, ket cunada, Cas sibibiag ti didiosmo, O Dan; ken Cas manayon ti dalan ti Beerseba: matuangdanto, ket ni caanoman didanto bumangonen.