Amos 6 - Ti Biblia (1973)

Ti kinadakes ti Israel ken ti dusana.

¹ Asida pay dagiti agnaed a sinanamay idiay Sion, ken dagiti sitatalged idiay bantay ti Samaria, dagiti natan-oc a tattao iti cangronaan cadagiti nasnacion, isuda nga umayan ti balay ti Israel!

² Incayo idiay Calne, ket kitaenyo; ket manipud idiay incayo idiay Hamat a dackel, calpasanna sumalogcayo a mapan idiay Gat a taeng dagiti Filisteo: nalalaingda aya ngem dagitoy a pagpagarian? wenno ti beddengda nalawlawa aya ngem ti beddengyo?

³ Dacayo a tantanenyo ti dakes nga aldaw, ket yasidegyo ti pagtaengan ti ranggas:

⁴ Dagidiay agidda cadagiti pagiddaan a marfil, ket agin-inatda iti rabaw dagiti papagda, ket sidaenda dagiti cordero ti pangen, ken dagiti urbon a vaca nga aggapu iti tengnga ti pagyaponan;

⁵ Dagidiay agcanta a sipapasaw cadagiti dandaniw a maitunos iti violin; ket buclenda iti gamigam ti musica a cas ken ni David;

⁶ Dagidiay uminum iti arac cadagiti malucong, ket agsapsapoda cadagiti nangnangrona a lana; ngem saanda nga agladingit iti panagsagaba ni Jose.

⁷ Gapuna a maicuyogda cadagiti umuna a macayawan, ket maiccatton ti nalabes a panagragsac dagiti agin-inat.

⁸ Ni Apo Jehova sinapataanna kencuana met laeng, cuna ni Jehova a Dios dagiti buybuyot: Guraec ti kinatan-oc ni Jacob, ken cagurac dagiti palaciona; iti casta yawatconto ti ili ken amin a naglas-ud kencuana.

⁹ Ket maaramidto a no dagiti sangapulo a tattao matdada iti maysa a balay mataydanto.

¹⁰ Ket intono ti uliteg ti natay a tao alaennanto, daydiay met laeng mangpuur kencuana, tapno iruarna dagiti tulangna iti balay, ket cunananto iti adda iti caungan ti balay, Adda pay laeng aya bangcay kenca? ket saoennanto, Awan; iti casta cunanto daydiay, Agulimecca; ta saantayo cama a saritaen ti nagan ni Jehova.

¹¹ Ta adtoy, ni Jehova agbilin, ket macabilto ti balay a dackel cadagiti gutbaw, ken ti bassit a balay cadagiti birri.

¹² Agtarayto aya dagiti cabayo iti rabaw ti bato? pagaradodanto aya idiay dagiti vacvaca? agsipud ta dacayo pinagbalinyo nga apro ti kinajusticia, ken ti bunga ti kinalinteg nga ajenjo:

¹³ Dacayo nga agragsac iti awan capapayanna, a cunayo, Saanmi aya a nagun-od dagiti sarsara iti bucodmi a pigsa?

¹⁴ Ta adtoy, siac yegconto ti nacion a maibusor cadacayo, O balay ni Israel, cuna ni Jehova, ti Dios dagiti buybuyot; ket pagladingitendacayto manipud iti wangawangan ti Hamat inggana iti waig ti Araba.