Amos 5 - Ti Biblia (1973)

Ti Israel nabagbagaan a mangbiruc ken Jehova.

¹ Dumngegcayo itoy a sao nga ipuccawco a cas pamagleddaang cadacayo, O balay ti Israel.

² Natinnag ti virgen ti Israel; saanto a tumacderen: maipasag iti dagana; awan ti mamatacder kencuana.

³ Ta casta ti saoen ni Apo Jehova: Ti ili a rimmuar a sangaribu sangsangagasutto la ti matda kencuana, ket ti rimmuar a sangagasut sangapulonto la ti mabati kencuana, iti balay ti Israel.

⁴ Ta casta ti cuna ni Jehova iti balay ti Israel, Sapulendac, ket agbiagcayto;

⁵ Ngem dicayo sapulen ti Bet-el, ket dicayo met sumrec idiay Gilgal, ken dicayo met mapan iti Beer-seba: ta ti Gilgal di bumurong mapanto iti pannacacayaw, ket ti Bet-el agbalinto nga ubbaw.

⁶ Sapulenyo ni Jehova, ket agbiagcayto; di la ket ta tumbuac a cas la apuy iti balay ni Jose, ket ibusenna, ket awan idiay Bet-el ti macaiddep.

⁷ Dacayo a pagbalinenyo nga ajenjo ti kinajusticia, ken ibellengyo iti daga ti kinalinteg.

⁸ Sapulenyo daydiay mangaramid iti Pleyades ken iti Orion, ken ti mamagbalin iti aniniwan ni patay a bigat, ket pagsipngetenna ti aldaw a cas rabii; iti mangayab cadagiti dandanum ti baybay, ket ibuyatna ida iti rabaw ti daga (Jehova ti naganna):

⁹ Nga yegna ti kellaat a pannacadadael cadagiti napigsa, tapno ti pannacarbec umay iti sarikedked.

¹⁰ Dagidiay guraenda ti mamagbaga iti ruangan, ket ti agsao cadacuada ti naincalintegan laisenda.

¹¹ Iti casta payatpayatenyo ti napanglaw, ket ipapilityo a mangted iti trigona: nagbangoncayo iti balbalay cadagiti bato a tinagaan, ngem saanyonto a pagnaedan ida; nagmulacayo cadagiti macaayayo a cauvasan, ngem dicayto uminum iti aracda.

¹² Ta ammoc dagiti nagcaadu a salungasingyo, ken dagiti nabantot a basbasolyo dacayo a mamagladingit cadagiti nalinteg, nga alaenyo ti panucsoc, ket ballicugenyo dagiti napanglaw iti calinteganda iti ruangan.

¹³ Gapuna ti manakem agulimecto iti casta a pannawen; ta dakes a pannawen.

¹⁴ Sapulenyo ti naimbag, a saan nga iti dakes, tapno agbiagcayo; ket iti casta ni Jehova, ti Dios dagiti buybuyot, addanto cadacayo, cas saoenyo.

¹⁵ Guraenyo ti dakes, ket ayatenyo ti imbag, ket ipasdecyo ti kinajusticia idiay ruangan; nalabit a ni Jehova, ti Dios dagiti buybuyot, addanto laeng asina iti matda ken ni Jose.

¹⁶ Gapuna, castoy ti saoen ni Jehova, ti Dios dagiti buybuyot, ti Apo, Cadagiti amin a nalawa a daldalan, addanto dung-aw; ket cunaendanto cadagiti amin a calzada; Asi pay! Asi pay! ket ti mannalon awagandanto nga agpanes, ket dagiti dumudung-aw maayabdanto nga agdungaw.

¹⁷ Ket cadagiti amin a cauvasan addanto dung-aw; ta lumasatacto iti nagtengngaam, cuna ni Jehova.

¹⁸ Asicayo pay! dacayo nga agcalicagum iti aldaw ni Jehova! Ania ti gapuna a tarigagayanyo ti aldaw ni Jehova? Nasipnget a saan a nalawag.

¹⁹ A cas iti tao itarayanna ti leon, ket masabetna ti oso; wenno simrec iti balay ket insadagna ti imana iti diding, ket kinagat ti uleg.

²⁰ Saanto aya a nasipnget ti aldaw ni Jehova, ket saan a nalawag? a nasipnget unay, nga awan ti raniagna?

²¹ Guraec, umsiec dagiti fiestayo, ket saanacto a maay-ayo cadagiti gimongyo a nangayed.

²² Wen, nupay no idatagyo caniac dagiti datonyo a mapuuran, ken dagiti datonyo a macan, diacto awaten ida; ket diacto met taliawen dagiti datonyo iti cappia a naggapu cadagiti animalyo a nalucmeg.

²³ Yadayum caniac ti uni dagiti cancantam; ta diacto denggen ti agcacasam-it nga aweng dagiti dadackel a violinmo.

²⁴ Ngem agayus coma ti kinajusticia a cas cadagiti dandanum, ken ti kinalinteg cas napegges a carayan.

²⁵ Impaayyo caniac aya dagiti sacrificio ken datdaton idiay let-ang bayat iti uppat a pulo a tawen, O balay ti Israel?

²⁶ Wen, inawityo ti tabernaculo ti ariyo ken ti andas dagiti didiosyo, ti bitwen ti didiosyo nga inaramidyo a maipaay cadacayo met laeng.

²⁷ Iti casta ipancayto a nacayawan idiay, labes ti Damasco, cuna ni Jehova, a ti naganna Dios dagiti buybuyot.