Amos 3 - Ti Biblia (1973)

Masapul a maipadto ti icacaniwas iti Israel.

¹ Dumngegcayo iti daytoy a sao nga insao ni Jehova a maibusor cadacayo, O annac ti Israel, cacaniwas ti amin a sangcacabagian nga inaonco iti daga ti Egipto, a cunana,

² Dacayo laeng ti binigbigco cadagiti amin a famfamilia ditoy daga: gapuna sucnalacto cadacayo ti amin a kinadakesyo.

³ Magnanto aya ti dua nga aggiddan, no dida nagtunos?

⁴ Aguganto aya ti leon iti bakir no awan ti matiliwna? Agungorto aya ti urbon ti leon idiay rukibna, no awan ti nakemmegna?

⁵ Masiloan aya ti tumatayab iti rabaw ti daga idiay awan ti silo a naisagana kencuana? Maingato aya iti daga ti silo no awan ti masiloan?

⁶ Mapuyotto aya ti tangguyob iti ili ket dinto agbuteng ti ili? Addanto aya pacarigatan iti ili a di inaramid ni Jehova?

⁷ Kinapudnona awanto ti aramiden ni Apo Jehova a dinto maipalgac ti palimedna cadagiti adipenna, dagiti mammadto.

⁸ Naguga ti leon; siasinonto ti di agbuteng? ni Apo Jehova nagsao; siasinonto ti di mangipadto?

⁹ Iwarragawagyo cadagiti palacio idiay Asdod, ken cadagiti palacio iti daga ti Egipto, ket cunayo, Aguurnongcayo cadagiti banbantay ti Samaria, ket kitaenyo dagiti nagdackel a gulogulo nga adda sadiay, ken amin a pannacaparigat iti nagtengngaanda.

¹⁰ Ta dida ammo ti agaramid iti nalinteg, cuna ni Jehova, dagidiay agipenpenda iti panangranggas ken panagtacaw cadagiti palacioda.

¹¹ Gapuna ni Apo Jehova castoy ti cunana; Addanto, cabusor nga aglicmut met laeng iti daga; ket parucmaennacanto, ket dagiti palaciom masamsamdanto.

¹² Castoy ti saoen ni Jehova: Cas ti pastor maagawna iti ngiwat ti leon, dagiti dua a saca, wenno mordong ti maysa a lapayag, castanto ti pannacaispal dagiti annac ti Israel a situtugaw idiay Samaria, iti nagsulian ti maysa nga idda, ken cadagiti seda a cudson iti pagiddaan.

¹³ Dumngegcayo, ket sacsianyo ti maibusor iti balay ni Jacob, cuna ni Apo Jehova, ti Dios dagiti buybuyot.

¹⁴ Ta intono caaldawan a sucnalac dagiti salungasing ti Israel, sucnalacto met dagiti altar ti Beth-el; ket dagiti sara ti altar maputeddanto, ket matnagdanto iti daga.

¹⁵ Ket cabilecto ti balay a pagnaedanda iti pannawen ti lamec agraman balay a pagnaedanda iti pannawen ti pudot; ken dagiti balbalay a marfil mapucawdanto, ken dagiti dadackel a balbalay madadaeldanto, cuna ni Jehova.