Amos 2 - Ti Biblia (1973)

Iti panangocom ti Dios a maicaniwas iti Juda ken Israel.

¹ Castoy ti saoen ni Jehova: Maipuon iti tallo a salungasing ti Moab; wen, maipuon iti uppat, diacto ibawing ti dusana; ta pinuuranna a pinaapug dagiti tultulang ti ari ti Idumea.

² Ket ipawitconto ti apuy iti Moab, ket ikisapnanto dagiti palacio ti Kerioth; ket matayto ti Moab, iti pannacagulogulo, iti panagriaw, ken iti aweng ti tangguyob.

³ Ket iccatecto ti ocom iti nagtengngaanda, ket patayecto amin dagiti piprincipena, a maicanunogda kencuana, cuna ni Jehova.

⁴ Castoy ti saoen ni Jehova: Maipuon iti tallo a salungasing ti Juda, wen, maipuon iti uppat, diacto ibawing ti dusana; agsipud ta tinallicudanda ti linteg ni Jehova, ken dida immannurot cadagiti bilinna, ket dagiti ulbodda pinagbasolda ida, a cas iti pannagna dagiti ammada.

⁵ Ngem ipawitconto ti apuy iti Juda, ket ikisapnanto dagiti palacio ti Jerusalem.

⁶ Castoy ti saoen ni Jehova: Maipuon iti tallo a salungasing ti Israel, wen, maipuon iti uppat, diacto ibawing ti dusana, agsipud ta inlacoda iti pirac ti tao a nalinteg, ket ti napanglaw iti maysa a paris a zapatos.

⁷ Isuda agal-alda a siagum gapu iti tapoc ti daga iti rabaw ti olo ti napanglaw, ket killoenda ti dalan dagiti napacumbaba; ket maysa a lalaki ken ti amana agpadpadada a simrec iti isu met laeng a balasang, tapno tulawanda ti nasantoan a naganco:

⁸ Ket agiddada iti arpad ti tunggal altar iti rabaw dagiti pagan-anay a naisalda: ket iti balay ti Diosda inumenda ti arac dagiti namulta.

⁹ Ngem rinacracco iti sangoananda ti Ammorreo, a iti catayagna cas la ti cangato dagiti cantingen, ket nalagda a cas cadagiti roble; nupay casta dinupracco ti bungana iti ngato, ken dagiti ramutna iti baba.

¹⁰ Ket castamet siac inaoncayo iti daga ti Egipto, ket indalancayo bayat iti uppat a pulo a tawen iti let-ang, tapno tagicuaenyo ti daga ti Amorreo.

¹¹ Ket cadagiti annacyo a lallaki pinatacderco dagiti mammadto, ken dagiti agtutuboyo a lallaki tapno agbalinda a Nazareo. Saan aya a casta met laeng, dacayo annac ti Israel? cuna ni Jehova.

¹² Ngem impainumyo ti arac cadagiti Nazareo, ket imbilinyo cadagiti mammadto, a cunayo, Dicayo agipadto.

¹³ Adtoy, siac padagsenancayto iti dissoyo cas iti pannacapadagsen ti lugan a napno cadagiti pinongo.

¹⁴ Ket ti pannacatalaw maawanto iti nasiglat; ket ti napigsa dinto macapigsan, ket uray pay ti maingel dinanto maispal ti biagna;

¹⁵ Ket iti umiggem iti ba-i saanto a macagaway, ket dimet macalapsut ti napartac nga agtaray; uray ti agsacay iti cabayo dinanto maisalacan ti biagna.

¹⁶ Ti maingel cadagiti camamainglan agtalawto a silalamolamo iti dayta nga aldaw, cuna ni Jehova.