3 Juan 1 - Ti Biblia (1973)

Ken ayayaten a Gayo.

¹ Ti panglacayen isuratna ken ay-ayaten a Gayo, isu a dungdungngoec a pudno,

² Ay-ayatec, siac dawatec iti Dios a rumang-ayca cadagiti isu-amin a banbanag, ket adda coma salun-atmo a cas met ti irarang-ay ti cararuam.

³ Ta nagrag-oac iti nalaus idi immay dagiti cacabsat ket pinanecnecanda iti kinapudnom cas met iti pannagnam iti kinapudno.

⁴ Awan ti dacdackel a pagrag-oac ngem iti pannacangngegco a dagiti annacco magmagnada iti kinapudno,

⁵ Ay-ayatec, sica aramidem a matalec ti amin nga aramidem cadagiti cacabsat uray pay gangannaetda;

⁶ Dagidiay a mamanecnec iti ayatmo iti sangoanan ti Iglesia: ket nasayaatto ti aramidem: no tulongamto ida iti dalanda a maicari iti Dios,

⁷ Ta gapu iti pateg ti Nagan, pimmanawda nga awan ti innalada cadagiti Gentil.

⁸ Rebbengtayo ngarud a pasangbayen dagiti cacasta, tapno datayo coma ti catulongan ti kinapudno.

Ipulongna ni Diotrefes ken dayawenna ni Demetrio.

⁹ Nagsuratac bassit iti Iglesia, ngem ni Diotrefes, nga agumanna ti nagungundaway ngem cadagiti dadduma, saannacam nga awaten.

¹⁰ Gapuna, no umayac, ipalagipconto dagiti banbanag nga aramidenna, nga agsalsalawasaw iti maibusor cadacami cadagiti sasao a dakes; ket saan pay a mapnec itoy, dinapay awaten dagiti cacabsat, ket dina met palubosan dagiti mayat nga umawat, ket pagtalawenna ida iti Iglesia.

¹¹ Ay-ayatec, dica tuladen ti dakes, no di ket ti naimbag. Ti agaramid iti nasayaat, tao ti Dios, ti agaramid iti dakes, saanna a nakita ti Dios.

¹² Ni Demetrio panecnecanna dagiti isu-amin, ken ti pudno met laeng; ket dacami met panecnecanmi; ket ammom a ti pammanecnecmi pudno.

¹³ Adu dagiti banbanag nga isuratco coma kenca, ngem diac cayat nga isurat ida kenca iti tinta ken pluma:

¹⁴ Ta namnamaec a kitaenca iti mabiit, ket agsaotanto iti rupanrupa. Ti talna agtaeng coma kenca. Dagiti gagayyem cablaawandaca. Cablaawan dagiti gagayyem nga inaganan ida.