2 Timoteo 3 - Ti Biblia (1973)

Umayto dagiti aldaw a napeggad.

¹ Ngem ammoem daytoy, a cadagiti maud-udi nga alaldaw umaydanto dagiti aldaw a napeggad.

² Ta dagiti tattao agayatdanto cadagiti bagbagida, naagumda iti pirac, managpasindayaw, napalangguad, managuy-uyaw, nasukir cadagiti dadackelda awan panagyamanda saanda a nasingpet,

³ Awananda iti ayat a nacayanacan, awan pannacapnecda, managpadpadakes, saanda a managparbeng, nauyongda, gumurgurada cadagiti naimbag,

⁴ Mangliliput, nasubeg, natangsit, managayat cadagiti ragragsac, a nangnangrona ngem iti panagayatda iti Dios;

⁵ Nga adda langada a kinasanto, ngem libakenda ti pannacabalin daytoy a kinasanto: umadayuca met cadagiti cacastoy.

⁶ Ta adda cadagitoy dagiti sumrec cadagiti balbalay ket cayawanda dagiti babbai a maag a napno cadagiti basbasol a maiculbo cadagiti nadumaduma a kinagaramugam,

⁷ Dagita cancanayon nga agadadalda ket ni caanoman dida macagteng iti pannacaammo iti pudno.

⁸ Ket cas ti panangsukirda ken Moises da Janes ken Jambres, casta met dagitoy sukirenda ti kinapudno; tattao a dimmakes ti panunotda, ket mababalawda maipapan iti pammati.

⁹ Ngem didanto rumang-ayen iti masangoanan; ta maiparangarangto cadagiti isu-amin ti caawan ti nakemda, a cas met pannakaiparang ti kinaawan a nakem dagidi.

Ipalagipna dagiti naimbag nga ulidan.

¹⁰ Ngem sica naammoam a naimbag ti sursuroc, ti panagbiagco, ti panagemco, ti pammatic, ti nabayag a panagituredco, ti ayatco, ti anusco.

¹¹ Dagiti pannacaidadanesco, dagiti sinagabac; dagiti banbanag a napasamac caniac idiay Antioquia, idiay Iconio, idiay Listra; no aniada dagiti pannacaidadanes a linacamco: ket kadacuada amin linucatannac ti Apo.

¹² Wen, ket isu-amin dagiti mayat nga agbiag a nasantoan ken Cristo Jesus, aglacamdanto ti pannacaidadanes.

¹³ Ngem dagiti tattao a dakes ken dagiti mangul-ulbod dumakesdanto la a dumakes, a mangal-lilawda ket maallilawda met laeng.

¹⁴ Ngem sica agtalinaedca cadagiti banbanag a sinursurom, ken pinatalgedam, nga ammom no siasino ti nangadalam cadacuada;

¹⁵ Ket nanipud idi kinaubing mo naammoam dagiti nasantoan a Sursurat, a macabalin a mamagsirib kenca a maipaay iti pannacaisalacan gapu iti pammati ken Cristo Jesus.

¹⁶ Isu-amin a Surat nga impaltiing ti Dios isu met ti naimbag a pacasursuroan, pacatingaran, pacababalawan ken pacaadalan iti kinalinteg:

¹⁷ Tapno ti tao ti Dios naananay coma ket masursuroan a naimbag iti isu-amin nga aramid a nasayaat.