2 Timoteo 2 - Ti Biblia (1973)

Balacadanna tapno agtalinaed.

¹ Sica ngarud, anacco, bumilegca iti parabur nga adda ken Cristo Jesus.

² Ket dagiti banag a nangngegmo caniac a sinacsian dagiti adu, dagitoy icumitmo cadagiti tattao a matalec, isuda a macabalinto a mangisuro met cadagiti sabsabali.

³ Makipagsagabaca a cas naimbag a buyot ni Cristo Jesus.

⁴ Ti agsoldado, saan a maringgoran cadagiti pagsapulan daytoy a biag tapno mabalinna nga ay-ayoen daydiay nangilista kencuana a soldado.

⁵ Casta met no adda makidangadang cadagiti pagayayaman, saan a mabalangatan no saan a makidangadang a naincalintegan.

⁶ Rebbengna a ti agtaltalon nga agbannog isu ti umuna a mairaman cadagiti bunga.

⁷ Imutectecam ti sao-ec; ta ti Apo iccannacanto ti pannacaawat iti isu-amin.

⁸ Laglagipem ni Jesu-Cristo (iti capuonan ni David) a nagungar cadagiti natay, cas mayannurot iti evangelioc:

⁹ Isu a pagsagabaac cadagiti rigrigat a cas cadagiti agaramid ti dakes, agingga cadagiti pannacarepreppet; ngem ti sao ti Dios saan a nareppet.

¹⁰ Gapuna siac sagabaec amin gapu cadagiti napili, tapno magun-odanda met ti pannacaisalacan nga adda ken Cristo Jesus, agraman gloria nga agnanayon.

¹¹ Pudno daytoy a sao: Ta no nataytayo a naicanunong kencuana, agbiagtayo met a mairanud kencuana:

¹² No macaituredtayo, agaritayto met a mairanud kencuana; no isu paglicudantayo, paglicudannatayto met:

¹³ No saantay a mapagtalcan agtalinaedto a matalec; ta dina mabalin nga ilibac ti bagina.

Ti rebbeng nga aramiden tapno maidian ti panagsusupiat ken panagsisina iti pammati.

¹⁴ Ipalagipmo dagitoy a banag, nga ipaganetgetmo cadacuada iti sangoanan ti Apo, a dida agsusupiat maipuon cadagiti sasao nga awan ti pagimbagan, no di ket pacariribocan dagiti agdengngeg.

¹⁵ Agawaam a sireregta ti agparang iti sangoanan ti Dios a cas mangmangged a maanamungan nga awan ti ibainna, nga aramatem iti umisu ti sao ti kinapudno.

¹⁶ Ngem adayuam dagiti palpalawag a di mainugot iti Dios ken awan capaypay-anda; ta lumanlandanto a lumanlan iti saan a panagpanunot iti Dios.

¹⁷ Ket ti saoda agdadaelto a cas la iti gangrena; ket cadacuada adda da Himeneo ken Fileto;

¹⁸ A naisiasida iti kinapudno a cuncunada a ti panagungar napalabasen ket riribukenda ti pammati dagiti dadduma.

¹⁹ Nupay casta, ti cimiento ti Apo mataginayon a sititibker, nga adda kencuana daytoy a pagilasinan: Mailasin ti Apo dagiti tattao a cucuana, ket umadayuda coma iti kinadakes amin dagiti umawag iti nagan ti Apo.

²⁰ Ngem iti maysa a balay a dackel, saan laeng nga addaan cadagiti vasvaso a balitoc ken pirac, no di pay dagiti naaramid iti cayo ken dinamili: ket dagiti dadduma maipaayda iti nadayaw ket dagiti sabsabali, maipaayda iti nanomo.

²¹ No ngarud adda aggugurto cadagidiay a banag; isunto ti maysa a vaso a maipaay iti dayaw, napagsanto, naservi iti akincua, maisagana iti isu-amin nga aramid a naimbag.

²² Ngem adaywam dagiti tarigagay nga inuubingan, ket sumurotca iti kinalinteg, iti pammati, iti ayat, iti talna, a makicadcaduaca cadagiti umawag iti Apo a sidadalus ti pusoda.

²³ Ngem baybay-am dagiti supsupiat a minamaag ken agtaud iti kinanengneng, ta ammom a pataudenda dagiti panagriringgor.

²⁴ Ket ti adipen ti Apo saanna a rebbeng ti mannakiringgor, no di ket naamo cadagiti isu-amin, nalaing a mangisuro, nateppel,

²⁵ A mamatigmaan a siemma cadagiti sumalungasing; bareng no ti Dios ipaayanna ida ti panagbabawi a maipaay iti pannacaammoda iti pudno,

²⁶ Ken macalapsutda iti silo ti diablo, isu a nangcayaw cadacuada a maipaay iti pagayatanna.