2 Timoteo 1 - Ti Biblia (1973)

Naayat a cablaawna ken Timoteo.

¹ Ni Pablo, apostol ni Cristo Jesus, gapu iti nakem ti Dios, cas mayannurot iti cari ti biag nga adda ken Cristo Jesus,

² Isuratco ken Timoteo a dungdungoec nga anac: Parabur, caasi ken talna ti Dios Ama ken ni Cristo Jesus nga Apotayo.

Pammati ken panagtalinaed iti regta ti panagaywan.

³ Agyamanac iti Dios, isu a pagserviac nanipud cadagiti appoc a lallacay a buyugen ti nadalus a nakem a malagipca cadagiti di-agressat nga ar-ararawco, iti rabii ken aldaw;

⁴ Idinto a laglagipec dagiti luluam tartarigagayac unay a makitaca, tapno mapnoac iti rag-o;

⁵ A maipalagip caniac ti pammati a pudno nga adda kenca, isu a naadda nga immuna ken apom a baket a Loida, ken ni inam a Eunice: ket mapnecac nga adda met kenca.

⁶ Gapuna, ipalagipco a parangrangem ti sagut ti Dios nga adda kenca, a gapu iti pannacaipatay dagitoy imimac.

⁷ Ta saannatay nga iniccan ti Dios ti espiritu ti kinatacrut, no di ti kinatibker, ken ti ayat, ken ti naimbag a nakem.

⁸ Dica ngarud ibain ti pangpanecnec ti Apotayo ken caniac met a baludna; no di ket makipagsagabaca cadagiti rigrigat gapu iti evangelio, cas mayannurot iti pannacabalin ti Dios;

⁹ Isu a nangisalacan cadatayo ken nangawis iti maysa a panangawis a nasantoan, saan a mayalubog cadagiti araramidtayo, no di ket mayannurot iti panagemna met laeng, ken iti parabur a naited cadatayo ken Cristo Jesus idi sacbay cadagiti adu a pannawen a mapalabas,

¹⁰ Ngem naiparangarang ita, a gapu iti panagparang ni manangisalacan cadatayo a Cristo Jesus; isu a nangpucaw ken patay, ket imparangarangna ti biag ken ti saan nga ipapatay gapu iti evangelio,

¹¹ Isu a nacatudingac a mangasaba, ken apostol, ken mannursuro.

¹² Gapu met itoy sagabaec dagitoy a banag; nupay casta, saanac a mabain; ta ammoc daydiay pinatic, ket mapnecac unay nga isu mannacabalin a mangaywan iti intalecco kencuana a maipaay iti daydiay nga aldaw.

¹³ Salimetmetam a pagwadan dagiti nasayaat a sao a nangngegmo caniac iti pammati ken ayat nga adda ken Cristo Jesus.

¹⁴ Daydi nasayaat a banag a naicumit kenca aywanam, gapu iti Espiritu Santo nga agtaeng cadatayo.

¹⁵ Ammomon daytoy, a simminada amin caniac dagiti taga Asia; ket cadacuada nairaman da Figello ken Hermogenes.

¹⁶ Ti Apo ipaayna coma ti asi iti balay ni Onesiforo: ta namin-adu nga isu liniwliwanac, ket dina imbain ti cawarco;

¹⁷ No di ket, idi nga adda idiay Roma, sinapulnac a sireregta ken nasaracannac.

¹⁸ (Ti Apo ipaayna coma kencuana a masaracanna ti caasina, iti daydiay nga aldaw.) Ket ti caadu ti panagservina caniac idiay Efeso, ammom unay.