2 Taga-Corinto 9 - Ti Biblia (1973)

Maitalec ti panagparabur.

¹ Ta no maipapan iti panagservi cadagiti sasanto, saan a masapulen nga agsuratac cadacayo;

² Ta ammoc ti kinamanagsaganayo, isu a pangidaydayawac cadacayo cadagiti taga Macedonia, a ti Acaya adda a nacasaganan nanipud idi napan a tawen; ket ti regtayo ginuyugoyna dagiti adu unay cadacuada.

³ Nupay casta, imbaonco dagiti cacabsat, tapno ti panangidaydayawmi cadacayo saan nga agbalin nga awan capapayanna itoy a panggep; tapno, cas sinaoc, addacay coma a sisasagana:

⁴ Di la ket ta no umayto makicuyog caniac dagiti dadduma a taga Macedonia, ket masaracandacayto a saan a naisagana, dacami (tapno dicam cuna a dacayo) addanto pacabainanmi itoy a panagtalgedmi.

⁵ Ngarud napanunotco a masapul a balacadan dagiti cacabsat nga umun-unada nga umay cadacayo, ket isaganada coma nga unaen ti sagutyo a naicarin; tapno adda a sisasagana cas sagut, ket saan a cas la napilpilit nga inaagum.

⁶ Ngem cunac daytoy: Ti agmula a siiimut, aganinto iti iniimut; ket ti agmula iti nawadwad, aganinto met iti nawadwad.

⁷ Tunggal maysa itdenna coma ti pinanggepna iti pusona; saan nga iti dakes a nakem wenno mapilpilit; ta ti Dios ayatenna ti mangted a siaayat.

⁸ Ket ti Dios mabalinna a paaduen ti isu-amin a parabur a maipaay cadacayo; tapno cadagiti isu-amin a banag agnanayon nga adda cadacayo ti kinawadwad, tapno rumangaycayo a maipaay iti isu-amin nga aramid a naimbag:

⁹ Cas adda a naisurat: Isu nagiwaras, nangted cadagiti napanglaw; Ti kinalintegna agpaut nga agnanayon.

¹⁰ Ket ti mangted ti bin-i iti agmulmula ken tinapay a pagtaraon, mangtedto ket paaduennanto ti bin-iyo nga imula, ket nayonannanto dagiti bunga ti kinalintegyo:

¹¹ Idinto a napabacnangcayo iti isu-amin, a maipaay iti amin a kita ti panagparabur isu nga agaramid gapu cadacami, cadagiti panagyaman iti Dios.

¹² Ta ti panangipaayco itoy a panagservi, saan laeng a dagiti pacasapulan dagiti sasanto ti punnoanna no di ket umadu met gapu cadagiti adu panagyaman iti Dios.

¹³ Ket gapu iti pannacasuutyo itoy nga aramid, dayawenda ti Dios, gapu iti kinatulocyo a mangipaduyacyac iti evangelio ni Cristo; ken gapu iti kinaparaburyo a mangted ti maipaay cadacuada ken cadagiti isu-amin;

¹⁴ Idinto nga agdawdawatda a maipaay cadacayo, adda narayray nga ayatda cadacayo, gapu iti nawadwad unay a parabur ti Dios cadacayo.

¹⁵ Yaman pay iti Dios gapu iti sagutna a di mayebcas.