2 Taga-Corinto 8 - Ti Biblia (1973)

Ibalacadna ti calaca ti pannangted.

¹ Castamet, cacabsat, ipacaammomi cadacayo ti parabur ti Dios a naited cadagiti Iglesia ti Macedonia;

² Nupay addada iti dackel a pannacasuut iti rigat, ti cawadwad ti rag-oda ken ti nauneg a kinapanglawda naglaplapusanda a maipaay iti kinabacnang ti nasayaat a nakemda.

³ Ta sacsiac a cas mayannugot cadagiti cabaelanda ken malablabes pay cadagiti cabaelanda timmulongda a nacnakemda laeng.

⁴ A dinawatda iti nasnecan a calicagum daytoy parabur a pannacairaman iti ibabadangda cadagiti sasanto:

⁵ Ket saan a cas ti ninamnamami; no di ket impaayda dagiti bagbagida nga umuna iti Apo ket calpasanna cadacami, gapu iti nakem ti Dios.

⁶ Iti casta dinawatmi ken Tito a yantangay isu rinugianna nga immun-una, casta met coma nga ananayanna cadacayo daytoy a parabur.

⁷ Yantangay nawadwadcayo ngarud iti isu-amin, iti pammati, iti sao, iti sirib, ken iti amin a regta, ken iti ayatyo cadacami, umaducayo met coma itoy a parabur.

⁸ Saanac nga agsao a cas la ti agbilin, no di ket gapu iti regta dagiti sabali, ken cas pangsuut ti kinapudno ti ayatco.

⁹ Ta ammoyo ti parabur ni Apotayo a Jesu-Cristo, nga idinto a nabacnang, gapu cadacayo nagbalin a napanglaw, tapno dacayo, gapu iti kinapanglawna, bumacnangcayo coma,

¹⁰ Ket iti daytoy, ibagac ti adda iti panunotco; ta daytoy maipaay cadacayo nga immun-una a nangrugi idi napan a tawen, saan la nga iti panagaramid, no di ket iti panagayat pay.

¹¹ Ngem ita turposenyo met ti panagaramid; tapno cas iti sisasagana a pakinakem, casta met coma ti panangtungpal cas iti cabaelanyo.

¹² Ta no sisasagana ti pakinakem, ti sagut macaayayo no mayannugot iti cupicupan ti maysa a tao, a saan a cas iti awan kencuana.

¹³ Ta diac sao-en daytoy, tapno dagiti sabsabali macapagwayawayada, ket napadagsenancayo;

¹⁴ No di ket gapu iti panagpapada: itoy a tiempo, ti kinawadwadyo anayanna ti pacasapsapulanda, tapno ti kinawadwadda anayannanto met ti pacasapsapulanyo; tapno adda coma panagpapada:

¹⁵ Cas adda a naisurat, Ti nagacup ti adu, awan ti suroc kencuana; ket ti nagacup ti bassit, awan met ti nagcurang kencuana.

¹⁶ Ngem yaman pay iti Dios a mangipaay iti puso ni Tito ti naregta met a panangigaga cadacayo.

¹⁷ Ta saan laeng nga inawatna ti pammagbagami; ngem idinto a sireregta unay, nacnakemna ti nagluas nga immay cadacayo.

¹⁸ Ket imbaonmi nga impacuyog kencuana ti cabsat, a ti pannacadaydayawna iti evangelio nagwara cadagiti isu-amin nga Iglesia:

¹⁹ Ket saan laeng a daytoy, no di ket dagiti Iglesia tinudinganda a cacuyogmi iti panamagpagnami, maipanggep iti daytoy a parabur nga aywananmi a maipaay iti dayaw ti Apo, ken panangipakita ti pannacaisaganami:

²⁰ A lissianmi daytoy nga awan coma ti mangpabasol cadacami ti maipapan iti daytoy nawadwad a parabur nga aywananmi:

²¹ A panpanunotenmi dagiti banag a natacneng, saan la nga iti imatang ti Apo, no di met iti imatang dagiti tao.

²² Ket impacuyogmi cadacuada ti cabsatmi, isu a namin adu a napadasmi a nagaget, cadagiti adu a banag: ngem ita nagaggaget pay gapu iti dackel a panagtalecna cadacayo.

²³ Ket no maipapan ken Tito, isu ti cadduac ken catulungan a maipaay cadacayo, ket no maipapan cadagiti cacabsat, isuda dagiti babaonen dagiti Iglesia, ken dayaw ni Cristo.

²⁴ Iparangarangyo ngarud cadacuada iti imatang dagiti Iglesia, ti pacakitaan ti ayatyo, ken ti pacaidayawanmi a maipapan cadacayo.