2 Taga-Corinto 6 - Ti Biblia (1973)

Dagiti rigrigat ni Pablo ken ti panagaywanna.

¹ Ket, makipagtrabajocami met kencuana ket dawatenmi met cadacayo a dicay awaten ti parabur ti Dios iti awan pagmamaayanna,

² (Ta cunana: Idi tiempo a pannacaipaayna, denengngegca, Ket idi aldaw ti pannacaisalacan tinulonganca: adtoy, ita isu ti tiempo a maiparbeng; adtoy, ita isu ti aldaw ti pannacaisalacan):

³ A dicam mangted ti pacaiculboan iti uray aniaman, tapno saan a mababalaw ti kinaministromi;

⁴ No di ket, iti isu-amin italecmi ti bagimi a cacas la minministro ti Dios, iti adu nga anus, ladladingit, pacasapsapulan, ken rigrigat,

⁵ Pannacababaot, pannacarepreppet, riribuc, ar-aramid, panagpuypuyat, ken saan a panpannangan;

⁶ A buyugen ti kinadalus, ti pannacaammo, ti nabayag a panagiturtured, ti kinamanagayat, ti Espiritu Santo, ti ayat a pudno.

⁷ A buyugan ti sao ti kinapudno, ti pannacabalin ti Dios; gapu iti cabal ti kinalinteg, iti macanawan ken iti macatigid,

⁸ Gapu iti dayaw ken ti pannacaibabain, gapu iti dakes a damag ken ti naimbag a damag; a cacas la mangul-ulbod, ngem napudno.

⁹ A cacas la di am-ammo, ngem naammoan unay; a cacas la nganngani matay, ket adtoy a sibibiagcami; a cacas la madusdusa, ngem saancami a mapapatay:

¹⁰ Cas la naladingit, ngem agnanayon a siraragsac; cacas la napanglaw, ngem pabacnangenmi dagiti adu; a cas la awanancami ti uray ania, ngem cupicupanmi dagiti isu-amin a banbanag.

¹¹ Awan ti dicam imbaga, O taga Corinto, ket ti pusomi limmawa cadacayo.

¹² Saancayo a mailetan cadacami, ngem mailetancayo cadagiti puspusoyo met laeng.

¹³ Ket cas supapac daytoy (casao cay a cas la annac), lumawacay met coma.

¹⁴ Saancay a makicaddua iti sangol cadagiti saan a mammati: ta ania ti pakicadduaan ti kinalinteg iti kinakillo? wenno ania ti pacadduaan ti silaw ken ti sipnget?

¹⁵ Ket ania ti pakicappiaan ni Cristo ken Belial? wenno ania ti pacaibiangan ti mammati iti saan a mammati?

¹⁶ Ket ania ti pacainugotan dagiti ladladawan a didiosen iti Templo ti Dios? ta datayo ti Templo ti Dios a sibibiag; a cas met kinuna ti Dios: Agbalayacto cadacuada, ket magmagnaacto cadacuada; ket siacto ti Diosda, ket isudanto dagiti umili iti Ilic.

¹⁷ Gapuna Pumanawcayo iti nagtengngaanda, ket suminacayo, cuna ti Apo. Ket saanyo a sagiden ti aniaman a di nadalus; Ket siac awatencayto,

¹⁸ Ket siacto ti Amayo, Ket dacayonto ti annacco a lallaki ken babbai; Cuna ti Apo a Mannacabalin amin.