2 Taga-Corinto 5 - Ti Biblia (1973)

Ti pananginanama iti gloria nga agnanayon.

¹ Ta ammomi a no ti naindagaan a balay, ti calapawtayo, madadaelto, adda maysa a balaytayo nga aggapu iti Dios, balay a saan nga inaramid ti ima, agnanayon cadagiti langlangit.

² Ta iti daytoy agsasaibbectayo, a tartarigagayantayo iti nasged a maicawes cadatayo ti calapawtayo nga aggapu iti langit:

³ Ta no casta idinto a sicacawestayo saandatay a masaracan a lamolamo.

⁴ Ta datayo nga adda itoy a calapaw, agsasaibbectayo a madagsenan, a ditay tarigagayan ti malabusan, no di ket macawesan, tapno daytoy matay maaladagan gapu iti biag.

⁵ Ket ti nangaramid cadatayo a maipaay itoy, isu ti Dios, isu a nangted cadatayo iti tanda ti Espiritu.

⁶ Gapuna idinto a sitatalgedcami a cancanayon; ket ammomi a no agtaengcami iti bagi, awancami iti Apo.

⁷ (Ta magnacami gapu iti pammati, saan nga iti panagkita):

⁸ Sitatalgedcami, cunac, ket caycayatmi coma ti maawanan iti bagi ket agtaengcami iti Apo.

⁹ Gapuna umagawacami met, tapno uray agtaengcami, uray saan iti bagi, macaayayocami coma kencuana.

¹⁰ Ta masapul a datay amin maiparangarangtayto iti pangocoman ni Cristo; tapno tunggal maysa awatenna dagiti supapac ti inaramidna babaen ti bagina, naimbag man wenno dakes.

Pannakicappiatayo iti Dios.

¹¹ Idinto nga ammomi ngarud iti panagbuteng iti Apo, bagbagaanmi dagiti tattao; ket naiparangcami iti Dios, ket namnamaec a naiparangarangcami met cadagiti concienciayo.

¹² Saanmi nga italec manen dagiti bagbagimi cadacayo; ngem iccandacayo ti pannacaipaayna a panagrag-oyo gapu cadacami; tapno adda isungbatyo cadagiti agpaspasindayaw iti naparang, ket saan nga iti puso.

¹³ Ta uray no agmauyongcami, maipaay iti Dios; uray no manakemcami, maipaay cadacayo.

¹⁴ Ta ti ayat ni Cristo pilitennacami, idinto nga ipatomi a castoy: Nga no ti maysa natay gapu cadagiti isu-amin; no casta dagiti isu-amin addada idi a natay;

¹⁵ Ket isu natay gapu cadagiti isu-amin, tapno dagiti agbiag saanda nga agbiagen a maipaay cadacuada, no di maipaay iti daydi natay ken nagungar gapu cadacuada,

¹⁶ Gapuna, dacami manipud ita ken iti masangoanan, awan ti kitaenmi cas iti lasag: ket uray kinitami idi ni Cristo cas iti lasag, ngem ita dicam bigbigenen a casta.

¹⁷ Gapuna no ti maysa adda ken Cristo, isu baro a parsua: dagiti banag a daan napalabasdan, adtoy nagbalinda a baro.

¹⁸ Ket dagiti isu-amin a banag agtaudda iti Dios, isu a nangicappia cadatayo kencuana met laeng gapu ken Cristo, ket intalecna cadacami ti kinaministro iti pannakicappia;

¹⁹ Cayatna a saoen, a ti Dios adda idi ken Cristo a pakicappiaenna toy lubong kencuana met laeng a saanna nga ipabaclay cadagiti tattao dagiti salungasingda; ket intalecna cadacami ti sao ti pannakicappia.

²⁰ Dacami ngarud dagiti maibaon iti biang ni Cristo, a cas la agdawdawat ti Dios cadacayo gapu cadacami: iti biang ni Cristo dawatenmi, a makicappiacay iti Dios.

²¹ Daydi saan a nacaammo ti basol, inaramidna a basol gapu cadatayo, tapno macapagbalintayo a kinalinteg ti Dios gapu kencuana.