2 Taga-Corinto 3 - Ti Biblia (1973)

Ti evangelio pataudenna ti kinalinteg.

¹ Baliwanmi manen aya nga italec dagiti bagbagimi, met laeng? wenno masapul ngata, a cas cadagiti dadduma dagiti sursurat a panangitalec a maipaay cadacayo wenno iti biangyo?

² Ti suratmi dacayo met laeng, a naisurat iti pusomi, nga ammo ken basaen dagiti isu-amin a tattao;

³ Maiparangarang a dacayo ti maysa a surat ni Cristo, nga inaywananmi, a nasuratan saan nga iti tinta, no di ket iti Espiritu ti Dios a sibibiag, saan a cadagiti taptapi a bato, no di ket cadagiti taptapi a puspuso a naglasag.

⁴ Ket iti casta a panagtalec iti Dios adda cadacami gapu ken Cristo:

⁵ Saancam a macaanay a dacdacami laeng, a mangpanunut iti aniaman a cas aggapu cadacam met laeng, no di ket ti pannacaan-anaymi agtaud iti Dios;

⁶ Isu a nangaramid met cadacami a naananay a cas ministro ti Baro a tulag; saan a ti letra, no di ti espirituna; ta ti letra mamapatay, ngem ti espiritu mangted ti biag.

⁷ Ngem no ti kinaministro ti patay, a naisurat ken naikitikit cadagiti batbato, immay a sidadayag, ta uray pay dagidi annac ti Israel saanda idi a mabalin nga iperreng ti matada iti langa ni Moises gapu iti dayag ti rupana, isu nga mapucpucaw idi:

⁸ Dinto aya ad-adda pay ti dayag ti kinaministro ti Espiritu?

⁹ Ta no ti kinaministro ti pannacadusa adda dayagna idi, ad-addanto pay ti kinawadwad ti dayag ti kinaministro ti kinalinteg.

¹⁰ Ta pudno a ti naaramid a sidadayag, saan pay a naaramid a nadayag unay, gapu iti dayag a mangdaeg kencuana.

¹¹ Ta no daydi mapucpucaw adda dayagna idi, ad-addanto pay ti dayag ti mataginayon.

¹² Idinto nga adda cadacami ti dackel unay nga inanama, agsaocami a situtured,

¹³ A saan a cas ken Moises nga inabbonganna ti rupana, tapno dagiti annac ti Israel saanda a maiperreng dagiti matmatada iti panungpalan daydi agpucpucaw idi:

¹⁴ Ngem dagiti isisipda nacudrepan idi; ta uray agingga ita nga aldaw, no mabasa ti Daan a Tulag, daydi met la nga abbong adda pay laeng cadacuada a di naipacaammo; a naiccaten gapu ken Cristo.

¹⁵ Ngem agingga itoy nga aldaw, no mabasa ti surat ni Moises maabbongan dagiti puspusoda.

¹⁶ Ngem uray caano a panagsublida iti Apo, maiccatto ti abbong.

¹⁷ Ket ti Apo isu ti Espiritu; ket no sadino ti yan ti Espiritu ti Apo, idiay adda wayawaya.

¹⁸ Ngem datay amin, ti rupatayo awan abbongna, ket cas la sarming ipacpakitatayo ti dayag ti Apo, agbalintayo nga umasping met la kencuana, a mapadayagtayo a mapadayag cas naggapu iti Espiritu ti Apo.