2 Taga-Corinto 2 - Ti Biblia (1973)

Ti nasayaat nga iruruar daydi immun-una a surat.

¹ Ngem daytoy inkeddengco a siac, a diacto umay manen cadacayo a silaladingit.

² Ta no siac pagladingitencayto, siasino ngarud ti mangragragsac caniac, no di daydiay mapagladingit gapu caniac?

³ Ket nagsuratac cadacayo ti maipapan itoy met laeng a banag, tapno inton dumtengac, awan coma ti paglidayac iti biang dagidiay a rebbengco coma a pagragsacan, a manginanamaac a ti rag-oc isu ti rag-oyo amin.

⁴ Ta iti tengnga ti adu a ladingit ken sainnec ti puso, nagsuratac a silulua cadacayo; saan a tapno mapaladingitcayo, no di ket tapno maammoanyo ti ayatco a naglaplapusanan cadacayo.

⁵ Ngem no adda namaldaang, saan a siac ti pinagleddaangna, no di ket dagiti dadduma tapno dicay mapabasol amin.

⁶ Umanayen iti casta a tao dayta a dusa nga impatay kencuana dagiti ad-adu cadacayo;

⁷ Iti casta rebbengyo ket di nga pacawanen ken liwliwaen, di la ket ta dayta a tao malmes iti aglablabes a liday.

⁸ Gapuna, dawatec cadacayo a panecnecanyo ti ayatyo kencuana.

⁹ Ta gapu met itoy nagsuratac, tapno mapadasco ti cababalinyo, no natulnogcayo cadagiti isu-amin.

¹⁰ Ngem iti pamacawananyo iti aniaman, pacawanec met: ta castaac met no adda pinacawanco, pinacawanco, gapu cadacayo iti biang ni Cristo.

¹¹ Tapno ni Satanas saannatayo a gundawayan; ta ammotayo dagiti kinasicapna.

¹² Ngem idi dimtengac idiay Troas, gapu iti evangelio ni Cristo, ken idi a nawayaanen ti dalanco iti Apo,

¹³ Saan a nagtalna ti nakemco gapu ta diac nasaracan ni Tito a cabsatco: ngem idi nacapacadaac cadacuada, napanac idiay Macedonia.

¹⁴ Ngem yaman pay iti Dios, isu nga agnanayon a mamagballigi cadacami ken Cristo, ket gapu iti pannacaaramatmi iparangarangna ti sayamusom ti pannacaammo kencuana met laeng iti isu-amin a disso.

¹⁵ Ta iti Dios dacami ti maysa a macaay-ayo a banglo ni Cristo, cadagiti maisalacan ken cadagiti mapucaw.

¹⁶ Cadagiti dadduma, dacami ti angot ni patay a maipaay iti patay; ket cadagiti sabsabali, dacami ti banglo ti biag a maipaay iti biag: Ket cadagitoy a banbanag siasino ti macaanay?

¹⁷ Ta saancami a cas cadagiti adu a mangilaclaco iti sao ti Dios; no di ket agsaocami iti biang ni Cristo a cas buyugen ti kinapudno a cas nagtaud iti Dios, ken cas iti imatang ti Dios.