2 Taga-Corinto 10 - Ti Biblia (1973)

Pannacabalin ni Pablo a maipapan iti kararua.

¹ Ket ita siac ni Pablo dawatec cadacayo, gapu iti kinapacumbaba ken kinaimbag ni Cristo, siac nga iti sangoananyo naemmaac cadacayo; ngem no awanac, naturedac cadacayo:

² Wen; siac kiddawec cadacayo, a no addaac a sisasango, awan coma ti pacasapulac nga agtured a buyugen daydiay inget a panpanunutec nga aramaten cadagiti dadduma, a mangipapan cadacami a cas la ket no agbibiagcami a cas iti linalasag.

³ Ta uray no magmagnacami iti lasag, saancam a makibacal cas iti lasag.

⁴ (Ta dagiti igam ti kinasoldadomi saanda a naglasag, ngem mannacabalinda iti Dios a mangrebbec cadagiti sarikedked);

⁵ A duprakenda dagiti panagis-isip ken amin a nangato a banag a bumusor iti pannacaammo iti Dios, ket cayawanda ti amin a panunot iti panagtuloc ken Cristo;

⁶ Ket addada a sisasagana a mangdusa ti isu-amin a kinasukir, inton ti panagtulocyo maananayen.

⁷ Kitkitaenyo laeng dagiti banag a naruar. No adda siasinoman nga agtalec iti bagina met laeng, nga isu ti tao ni Cristo, imutectecanna met coma daytoy nga is-isu a cas isu tao ni Cristo, castacami met.

⁸ Ta uray no agpasindayawac coma unay maipapan iti turaymi (nga inted ti Apo a maipaay a pangpatibker, ket saan a tapno pangpasag cadacayo), saanacto a mabainan:

⁹ Tapno saan nga agparang a cas la cayatcayo coma a kigtoten cadagiti suratco.

¹⁰ Ta cunada: Dagiti sursuratna nadagsen ken napigsada; ngem ti panagparangna a sibabagi nacapuy, ket ti saona nanomo.

¹¹ Dayta panunutenna coma daytoy, a no aniacami iti sao babaen cadagiti sursurat, no awancami, castacamto met iti aramid, inton sisasangocami.

¹² Ta dicam maitured nga ibilang wenno ipadis dagiti bagbagimi cadagidiay mangidaydayaw cadagiti bagbagida: ngem isuda no agririnnucodda ket agpipinnadisda nga is-isuda, dida maawatan.

¹³ Ngem dacami saancaminto nga agpasindayag iti nalabes, no di ket masurot ti rucod nga impabagi ti Dios, cadacami, tapno dumanon pay uray cadacayo.

¹⁴ Ta saancam nga aglabes, iti rebbengmi (a cas la ket tay dicam, nacagtengen); ta immaycami met cadacayo babaen iti evangelio ni Cristo:

¹⁵ A dicam agpasindayaw iti saanna a carbengan, cayatco a sao-en, cadagiti aramid dagiti sabsabali; ngem adda inanamami nga inton rumang-ay ti pammatiyo, mapadackelcamto unay gapu cadacayo a mayalubong iti beddengmi.

¹⁶ Tapno icascasabami ti evangelio cadagidiay disso nga ad-adayu ngem dacayo, ket saancami nga agpasindayag iti rebbeng ti sabali, a maipapan iti naaramiden.

¹⁷ Ngem ti agpasindayaw, agpasindayaw coma iti Apo.

¹⁸ Ta ti idayawna ti bagina saan a maanamongan, no di ket daydiay dayawen ti Apo.