2 Taga-Corinto 1 - Ti Biblia (1973)

Pannacaliwliwa gapu ken Cristo.

¹ Ni Pablo, maysa nga apostol ni Cristo Jesus gapu iti pagayatan ti Dios, castamet ni cabsat a Timoteo, isuratda iti Iglesia ti Dios nga adda idiay Corinto, ken cadagiti isu-amin a sasanto nga adda iti amin nga Acaya:

² Parabur ken talna ti Dios nga Amatayo, ken ni Apo Jesu-Cristo maadda coma cadacayo.

³ Madaydayaw coma ti Dios ken Ama ni Apotayo a Jesu-Cristo, ti Ama dagiti asi, ken Dios ti amin a liwliwa;

⁴ Isu a mangliwliwa cadacami iti isu-amin a pagladladingitanmi, tapno mabalinmi a liwliwaen dagiti adda iti uray ania a pagladingitan, gapu iti liwliwa a pangliwliwa met laeng ti Dios cadacami.

⁵ Ta no casano ti iyaadu dagiti sagsagabaenmi gapu ken Cristo, casta met ti iyaadu ti pannacaliwliwami gapu ken Cristo.

⁶ Ngem uray no agsagabacami, maipaay iti pannacaliwliwa ken pannacaisalacanyo: uray maliwliwacami maipaay iti pannacaliwliwayo, isu nga agaramid iti kinaanusyo nga agsagaba cadagiti rigrigat a sagabaenmi met:

⁷ Ket ti inanamami no maipapan cadacayo natibker; nga ammomi a no casano ti pannakiramanyo cadagiti sagabaen, castanto met iti pannacaliwliwa.

⁸ Ta dicam cayat a dicay maammoan, cacabsat, ti maipapan iti naaramid a ladingitmi idiay Asia, iti casta unay a napacapsuyancami, iti nacaro, a dicam idi inanamaenen nga agbiagcami:

⁹ Pudno, a dacam met laeng impapanmi a mataycami; nga dicam agcammatalec cadacam met laeng no di iti Dios a mamagungar cadagiti matay:

¹⁰ Isu a nangilisi cadacami iti nacaro nga ipapatay, ken mangilisinto pay cadacami; isu a pagtalcanmi a tuluyennatayto pay nga ilisi;

¹¹ Makipagcararagcayo met a maipaay cadacami; tapno dagiti adu a tao agiamanda coma gapu iti parabur a maited cadacami a maipoon iti panagcarcararag dagiti adu.

No ania ti gapu a ni Pablo saan a macapan idiay Corinto.

¹² Ta ti pagragsacanmi isu daytoy: Ti panagpanecnec ti concienciami, a binuyogan ti kinasanto ken ti kinapudno ti Dios, saan a ti sirib a linalasag, no di gapu iti parabur ti Dios, nagbiagcam ditoy lubong, a maipaay cadacayo a nangnangrona.

¹³ Ta awan ti isuratmi cadacayo a sabali no di dagiti basaenyo, wenno panecnecanyo met ket siac namnamaec a panecnecanyonto agingga iti panungpalan:

¹⁴ Cas met iti panangpanecnecyo cadacami cadagiti dadduma a paset, a dacam ti ragsacyo, a cas met dacayo ti ragsacmi, inton aldaw ni Apotayo a Jesus.

¹⁵ Ket itoy a panagtalec pinanggepco ti umay nga umuna cadacayo, tapno maaddaancayo iti maicadua a paglainganyo;

¹⁶ Ken manipud cadacayo mapanac idiay Macedonia ken agsubliacto manen cadacayo manipud Macedonia, tapno tulungandac a mapan idiay Judea.

¹⁷ Iti caadda daytoy a panggepco, imparangco aya ti panagduadua? wenno dagiti banag a panggepec, panggepec ida a cas iti lasag, tapno adda caniac ti Wen, wen, ken ti Saan, saan?

¹⁸ Ngem agsipud ta ti Dios mapagtalcan, ti saomi cadacayo saan nga isu ti Wen ken Saan.

¹⁹ Ta ti Anac ti Dios, ni Jesu-Cristo, daydi incascasabami cadacayo, dacami cada Silvano ken Timoteo, saan nga isu ti Wen ken Saan, no di ket adda kencuana ti Wen.

²⁰ Ta uray no casano caadu dagiti cari ti Dios, adda Kencuana ti Wen, gapuna a kencuana adda met ti Amen, a maipaay iti dayaw ti Dios gapu iti pannacaaramatmi.

²¹ Ket ti mamatalged cadacami agraman cadacayo ken Cristo, ken ti nanglana cadacami, isu ti Dios;

²² Isu a nangted ti tanda cadacami ken cadagiti umuna a sagut ti Espiritu cadagiti puspusomi.

²³ Ngem awagac ti Dios a pannacasacsi toy cararuac, a gapu iti panangsalacnibco cadacayo, diac pay laeng umay dita Corinto.

²⁴ Saan a gapu ta iturayanmi ti pammatiyo, no di ket dacami ti tumultulong iti rag-oyo: ta iti pammati addacayo a sititibker.