2 Samuel 8 - Ti Biblia (1973)

Dagiti panagballigi ni David iti Filistia, Moab, Soba, ken Siria. Ti isagut ni ari Toi. Ti Edom maadipen.

¹ Iti calpasan daytoy naaramid a ni David kinabilna dagiti Filisteos, ket pinarucmana ida; ket ni David innalana ti rienda ti ina nga ili iti ima dagiti Filisteos.

² Ket isu kinabilna met ti Moab, ket rinucodna ida iti maysa a pagrucod a tali, pinagiddana ida iti daga; ket isu nangrucod iti namindua carucod a mapapatay, ken ti apag-isu a sangcarucod nga agbiag. Ket dagiti Moabitas nagbalinda nga ad-adipen ni David, ken nangyegda iti buis.

³ Casta met a ni David kinabilna ni Adadezer nga anac ni Rehob, nga ari ti Soba, idi nga isu napanna subboten ti pagturayanna idiay Carayan.

⁴ Ket ni David nangala cadacuada iti sangaribu ket pito gasut a nagcacabayo, ken duapulo a ribu a tattao a nagnagna; ket ni David pinasatanna dagiti amin a cabcabayo nga agguyud ti lugan: ngem nangitidda cadagidiay iti maipaay iti sangagasut a lugan.

⁵ Ket idinto a dagiti Sirios ti Damasco immayda a mangtulong ken Adadezer nga ari ti Soba, ni David nangcabil cadagiti Sirios iti duapulo ket dua a ribu a lallaki.

⁶ Sa nangicabil ni David iti buyot nga agaywan idiay Siria ti Damasco; ket dagiti Sirios nagbalinda nga ad-adipen ni David, ket nangyegda ti buis. Ket ni Jehova intedna ti panagballigi ken David iti uray sadinoman a napananna.

⁷ Ket ni David innalana dagiti calcalasag a balitoc, nga adda idi cadagiti ad-adipen ni Adadezer, ket inyegna ida idiay Jerusalem.

⁸ Ket idiay Beta, ken idiay Beerot, nga il-ili ni Adadezer, ni ari David innalana ti napalalo a caadu ti gambang.

⁹ Ket idinto a ni Toi nga ari ti Emat nangngegna a ni David kinabilna amin dagiti buyot ni Adadezer,

¹⁰ Idin ni Toi imbaonna ni Joram nga anacna a lalaki ken ari David, a mangcablaaw kencuana, ken mangbendicion kencuana, agsipud ta nakigubat a maibusor ken Adadezer ket isu kinabilna: ta ni Adadezer nakigubgubat ken ni Toi. Ket ni Joram nangicuyog cadagiti al-alicamen a pirac, ken al-alicamen a balitoc, ken al-alicamen a gambang:

¹¹ Dagitoy met ni ari David impaayna ken Jehova, agraman ti pirac ken balitoc nga impaayna idi a nagtaudda cadagiti isu-amin a nasnacion a pinarmecna;

¹² Naggapu iti Siria, ken iti Moab, ken cadagiti annac ni Ammon, ken cadagiti Filisteos, ken iti Amalec, ken iti nasamsam ken Adadezer, nga anac ni Rohob, nga ari ti Soba.

¹³ Ket ni David napadayawan ti naganna idi nagsubli a naggapu iti nangcabilanna cadagiti Sirios idiay Lobong ti Asin, cadagiti sangapulo ket walo a ribu a lallaki met laeng.

¹⁴ Ket isu nangicabil cadagiti buyot nga agbantay idiay Edom; cadagiti isu-amin nga Edom nangicabil cadagiti agbantay a buyot, ket isu-amin dagiti Edomitas, nagbalinda nga ad-adipen ni David. Ket ni Jehova intedna ti panagballigi ken David iti uray sadinoman a napnapananna.

¹⁵ Ket ni David nagari iti isu-amin nga Israel; ket ni David tinungpalna ti kinajusticia ken kinalinteg iti isu-amin nga ilina.

¹⁶ Ket ni Joab nga anac ni Sarvia, isu idi ti pangolo ti buyot, ket ni Josafat nga anac ni Ahilud isu idi ti registrador;

¹⁷ Ket ni Sadoc nga anac ni Ahitub, ken ni Ahimelec nga anac ni Abiatar, isuda idi dagiti papadi, ket ni Saraia isu idi ti escriba;

¹⁸ Ket ni Banahia nga anac ni Joiada isu idi ti pangolo dagiti Cereteos ken dagiti Feleteos; ket dagiti annac a lallaki ni David isuda idi dagiti cangatoan a ministro.