2 Samuel 6 - Ti Biblia (1973)

Ti lacasa maiyed agingga iti Perez-oza. Ipapatay ni Oza. Ti lacasa maiyeg iti Jerusalem. Ni Micol ababienna ni David.

¹ Ket ni David inurnongna manen dagiti isu-amin a lallaki a napili ti Israel, a tallopulo ribu.

² Ket ni David timmacder, ket napan agraman amin dagiti tattao nga adda idi kencuana, nanipud iti Baal ti Juda, tapno yegda manipud sadiay ti lacasa ti Dios, nga isu ti nanaganan gapu iti Nagan, iti nagan met laeng ni Jehova dagiti buybuyot a sisasaad iti ngato dagiti querquerubin.

³ Ket incabilda ti lacasa ti Dios iti rabaw ti maysa a carison a baro, ket isu inyegda manipud iti balay ni Abinadab nga adda idi iti turod: ket da Oza ken Ahio, nga annac ni Abinadab, pinaguyodda ti carison a baro.

⁴ Ket isu inyegda nanipud iti balay ni Abinadab, nga adda idi iti turod, agraman ti lacasa ti Dios: ket ni Ahio napan idi iti sango ti lacasa.

⁵ Ket ni David ken isu-amin a balay ti Israel nagay-ayamda iti saclang ni Jehova cadagiti amin a kita dagiti gamigam a cayo ti parwa, ar-arpa, ken salsalterio, ken panpandereta, ken castanuelas, ken piangpiang.

⁶ Ket idi a dimtengda iti pagtagan ni Nahon, ni Oza inyunnatna ti imana iti lacasa ti Dios, ket isu ti iniggamanna; ta dagiti vacvaca nagtibcolda idi.

⁷ Ket ti pungtot ni Jehova simged a maibusor ken Oza; ket ti Dios isu kinabilna idiay a gapu iti biddutna; ket natay idiay iti denna ti lacasa ti Dios.

⁸ Ket ni David napaladingit idi, ta ni Jehova binaracna ni Oza; ket ninaganna daydiay disso iti Perez-oza, agingga iti daytoy nga aldaw.

⁹ Ket ni David nagbuteng ken Jehova iti daydi nga aldaw; ket kinunana, Casano ti yaaynanto caniac ti lacasa ni Jehova?

¹⁰ Iti casta ni David dina kinayat nga inyallatiw kencuana ti lacasa ni Jehova iti ili ni David; ngem ni David isu impanna iti balay ni Obed-edom a Geteo.

¹¹ Ket ti lacasa ni Jehova nabati idi idiay a balay ni Obed-edom a Geteo iti tallo a bulan: ket ni Jehova binendecionanna ni Obed-edom, ken iti isu-amin a balayna.

¹² Ket naibaga ken David nga ari, a nacuna, Ni Jehova binendicionanna ti balay ni Obed-edom, ken iti isu-amin a cucuana, a gapu iti lacasa ti Dios. Ket ni David napan, ket innalana ti lacasa ti Dios nanipud iti balay ni Obed-edom agingga iti ili ni David a binuyog ti ragsac.

¹³ Ket idi a casta, idi a dagiti nagawit iti lacasa ni Jehova nacapagnada iti innem a caaddang, nangidatonda iti maysa a vaca ken maysa nga urbon a nalucmeg.

¹⁴ Ket ni David nagsala iti amin a pigsana iti sango ni Jehova: ket ni David nagcawes iti maysa nga efod a lienzo.

¹⁵ Iti casta ni David ken amin ti balay ti Israel inyegda ti lacasa ni Jehova a binuyog dagiti dirdir-i ken timec ti tangguyob.

¹⁶ Ket idi a casta, idi a ti lacasa ni Jehova immay iti ili ni David, a ni Micol nga anac a babai ni Saul kimmita nanipud iti tawa, ket nakitana ni ari David nga aglaglagto ken agsalsala iti sango ni Jehova: ket isu inuyawna iti pusona.

¹⁷ Ket inyegda ti lacasa ni Jehova, ket insaadda iti lugarna iti tengnga ti tolda a ni David binangonna idi nga agpaay kencuana; ket ni David nagidatag iti daton a mapuuran ken datdaton ti cappia iti saclang ni Jehova.

¹⁸ Ket idi a ni David nalpasna ti nagidatag iti daton a mapuuran ken datdaton ti cappia, binendicionanna ti ili iti nagan ni Jehova dagiti buybuyot.

¹⁹ Ket binunonganna iti isu-amin nga umili, iti isu-amin a caadu met laeng ti Israel, cadagiti lallaki ken babbai a padapada, iti tunggal maysa, maysa a bukel a tinapay, ken maysa nga apag ti lasag, ken maysa a catipkel dagiti uvas a napakebbet. Iti casta isu-amin dagiti tattao nagawid tunggal maysa iti balayna.

²⁰ Idin ni David nagsubli nga mangbendicion iti sangacabbalayanna. Ket ni Micol nga anac ni Saul rimmuar a simmabet ken David, ket kinunana, Amangan a nagdayag idi iti daytoy nga aldaw ti ari ti Israel, a naglucas kencuana met laeng iti daytoy nga aldaw cadagiti matmata dagiti tagabu a babbai dagiti ad-adipenna, a cas la maysa cadagiti ubbaw a tattao aglucais nga awanan bain!

²¹ Ket ni David kinunana ken Micol, Isu idi iti sango ni Jehova a nangpili caniac a nangnangrona ngem ni amam, ken iti isu-amin a balayna, a dinutocnac a pangolo iti ili ni Jehova, iti Israel: gapuna nga agay-ayamacto iti sango ni Jehova.

²² Ket agbalinacto pay a naal-alas ngem iti daytoy, ket siac nababbabaacto pay iti saclangco met laeng: ngem cadagiti babbai a sinaom, cadacuada ad-addanto ti pannacadaydayawco.

²³ Ket ni Micol nga anac ni Saul awanen anacna agingga iti aldaw ti ipapatayna.