2 Samuel 5 - Ti Biblia (1973)

Ni David agari iti Israel ken Juda. Cayawanna ti Sion, ken abakenna dagiti Filisteos.

¹ Idin isu-amin dagiti caputotan ti Israel immayda ken David idiay Hebron, ket nagsaoda, a kinunada, Adtoy dacami dagiti tultulangmo ken lasagmo.

² Cadagiti nalabes a tiempo, idi a ni Saul nagari cadacami, sica idi ti nangidalan ti Israel a rummuar ken nangisubli: ket ni Jehova kinunana kenca, Sicanto ti pastor ti ilic nga Israel, ken sicanto ti pangolo ti Israel.

³ Iti casta isu-amin dagiti, lallacay ti Israel immayda iti ari idiay Hebron; ket ni ari David nagaramid cadacuada iti tulag idiay Hebron iti saclang ni Jehova: ket pinulotanda ni David nga ari iti Israel.

⁴ Ni David agtawen idi iti tallopulo a tawen idi nangrugi nga agari, ket nagari iti uppat a pulo a tawen.

⁵ Idiay Hebron nagari iti Juda iti pito a tawen ket innem a bulan; ket idiay Jerusalem nagari iti tallo pulo ket tallo a tawen iti isu-amin nga Israel ken Juda.

⁶ Ket ti ari ken isu-amin dagiti lallakina immayda iti Jerusalem a maibusor cadagiti Jebuseos, nga agnaed iti daga, isuda a nagsao ken David, a kinunada, Malacsid no sica pagtalaoem ti bulsec ken pilay, dicanto mabalin ti sumrec ditoy; a panpanunotenda, ni David dina mabalin ti sumrec ditoy.

⁷ Nupay casta ni David innalana ti sarikedked ti Sion; nga isu met laeng ti ili ni David.

⁸ Ket ni David kinunana idi iti daydi nga aldaw, Uray siasino a mangcabil iti Jebuseo, sumang-at coma agingga iti calasugan ti danum, ket cabilenna coma ti pilay ken ti bulsec, isuda a ti cararua ni David ginurana idi. Gapuna a cunada, Adda bulsec ken pilay; isu dina mabalin ti sumrec iti balay.

⁹ Ket ni David nagtaeng idiay sarikedked, ket isu ti ninaganna iti ili ni David. Ket ni David binangonna a naglawlaw nanipud Mello nga agpauneg.

¹⁰ Ket ni David rumang-ay idi a rumang-ay; ta ni Jehova, a Dios dagiti buybuyot adda idi kencuana.

¹¹ Ket ni Hiram nga ari ti Tiro nagibaon ken David cadagiti babaonen ken cancantingen, ken alal-lawagi, ken agcavcaviti; ket isuda imbangonanda ni David iti maysa a balay.

¹² Ket ni David naawatanna a ni Jehova ti nangpasingked kencuana nga ari iti Israel ken isu ti nangitan-oc iti pagarianna a gapu iti ilina nga Israel.

¹³ Ket ni David nangala pay cadagiti camcamalala ken assawa a taga Jerusalem, iti calpasan ti panaggapuna idiay Hebron, ket naipasngayda ken David sadiay dagiti annac a lallaki ken babbai.

¹⁴ Ket dagitoy dagiti nagan dagidi nayanac kencuana idiay Jerusalem: ni Sammua, ken ni Sobab, ken ni Natan, ken Salomon.

¹⁵ Ken ni Ibhar, ken ni Elisua, ken ni Nefeg, ken ni Jafia.

¹⁶ Ken ni Elisama, ken ni Eliada, ken ni Elifelet.

¹⁷ Ket idi a dagiti Filisteos nangngegda a pinulotanda ni David nga ari iti Israel, amin dagiti Filisteos simmang-atda a mangsapul ken David; ket ni David nangngegna, ket simmalog agingga iti sarikedked.

¹⁸ Ket iti casta dagiti Filisteos immayda ket nagsacnapda iti lobong ti Rafaim.

¹⁹ Ket ni David immuman ken Jehova, a kinunana, Innacto a maibusor cadagiti Filisteos? yawatmonto ida iti imac? Ket ni Jehova simmungbat ken David, Inca; ta pudno unay a yawatconto dagiti Filisteos ita imam.

²⁰ Ket ni David immay idiay Baal-perazim, ket ni David kinabilna ida sadiay; ket kinunana, Ni Jehova binuracna dagiti cabusorco iti sangoanac, a cas la iti panagburac dagiti dandanum. Gapuna a ginaladanna iti nagan daydiay a disso iti Baal-perazim.

²¹ Ket nabatida idiay dagiti ladladawan: ket ni David ken dagiti lallakina impanawda ida.

²² Ket dagiti Filisteos immayda manen, ket nagsacnapda iti lobong ti Rafaim.

²³ Ket idi a ni David immuman ken Jehova, isu kinunana, Dica sumang-at: aglicawca iti licudanda, ket umayca cadacuada iti sango dagiti moras.

²⁴ Ket castoyto, intono mangngegmo ti aweng ti pannagna rabaw dagiti moras, isunton ti panaggunaymo; ta isunton ti iruruar ni Jehova iti sangoanam a mangcabil iti buyot dagiti Filisteos.

²⁵ Ket ni David inaramidna iti casta, cas ni Jehova imbilinna kencuana, ket kinabilna dagiti Filisteos nanipud Gabaa agingga iti pacagtengan iti Gaza.