2 Samuel 3 - Ti Biblia (1973)

Ti familia ni David. Ni Abner gapu iti panangtubngar ni Isboset napan ken David. Ni Joab agatap ken Abner ket papatayenna. Ni David agdung-aw gapu ken Abner.

¹ Ket adda idi napaut a gubat iti balay ni Saul ken iti balay ni David: ket ni David pumigsa idi a pumigsa, ket ti balay ni Saul cumapuy a cumapuy.

² Ket nayanacda idi ken David dagiti annac a lallaki idiay Hebron: ket ni Amnon isu ti inauna nga anacna ken ni Ahinoam a Jezraelita;

³ Ti maicadua, isu ni Queleab anacna ken ni Abigail nga asawa idi ni Nabal a Carmelito; ket ti maicatlo, ni Absalom nga anac ni Maaca, nga anac a babai ni Tolmai nga ari ti Gessur;

⁴ Ket ti maicapat, ni Adonia nga anac ni Haggit; ket ti maicalima, ni Safatias nga anac ni Abital;

⁵ Ket ti maicanem, ni Jetraam nga inyanac ni Egla nga asawa ni David. Dagitoy nayanacda ken David idiay Hebron.

⁶ Ket naaramid idi, iti bayat ti caadda ti gubat iti balay ni Saul ken iti balay ni David, a ni Abner pimmigsa iti balay ni Saul.

⁷ Ket ni Saul adda idi maysa a camalalana a ti naganna Resfa, nga anac ni Aja: ket ni Isboset kinunana ken ni Abner, Apayapay a simrecca iti camalala ni amac?

⁸ Idin ni Abner naglucsaw unay a gapu cadagiti sasao ni Isboset ket kinunana, Siac aya ti olo ti aso a maipaay iti Juda? Iti daytoy nga aldaw aramidec ti caasi iti balay ni Saul nga amam, cadagiti cacabsatna, ken cadagiti gagayyemna, ket siac saanca nga inyawat iti im-ima ni David; ket nupay casta ipabiddutmo caniac iti daytoy nga aldaw ti basol a maipapan iti daytoy a babai.

⁹ Ti Dios agaramid coma iti castoy ken Abner, ken ad-adda pay coma, no iti cas ti panangisapata ni Jehova ken David, idiac aramiden met laeng kencuana;

¹⁰ Iti panangyallatiwna iti pagarian nanipud iti balay ni Saul, ken iti panangibangonna iti trono ni David iti rabaw ti Israel, ken iti rabaw ti Juda, manipud Dan agingga iti Beerseba.

¹¹ Ket isu dina nabalin ti simmungbat iti uray aniaman a sabali a balicas ken Abner, ta nagbuteng kencuana.

¹² Ket ni Abner nangibaon ti pannacabagina cadagiti babaonen ken David a kinunana, Asino ti akincucua iti daga? ket kinunana pay met, Makisinninggalutca caniac, ket, adtoy, ti imac addanto kenca, a mangyeg kenca iti amin nga Israel.

¹³ Ket isu kinunana, Naimbag: siac makisinggalutacto kenca; ngem maysa a banag ti sapulec kenca: nga isu, a sica dicanto cumita iti rupac, malacsid no sica yegmo nga umuna ni Micol nga anac a babai ni Saul, intono umaymo kitaen ti rupac.

¹⁴ Ket ni David nangibaon cadagiti babaonen ken Isboset, nga anac ni Saul, a kinunana, Yawatmo caniac ni asawac a Micol, isu nga inasawac a gapu iti sangagasut nga akinsango a cudil dagiti Filisteos.

¹⁵ Ket ni Isboset nagbaon, ket isu ti innalana ken asawana a Falatiel, nga anac ni Lais.

¹⁶ Ket ni asawana napan kimmuyog kencuana, a nagsangsangit a nagnagna ket simmurot kencuana inggana iti Bajurim. Idin ni Abner kinunana kencuana, Incan agsublica: ket isu nagsubli.

¹⁷ Ket ni Abner adda pinaibagana cadagiti lallacay ti Israel, a kinunana, Iti nalabes a tiempo binirucyo ni David nga agari cadacayo:

¹⁸ Ita ngarud isu ti aramidenyo; ta ni Jehova nagsao idi iti maipapan ken David, a kinunana, Gapu iti ima ni David nga adipenco isalacanconto ti ilic nga Israel iti ima dagiti Filisteos, ken iti ima dagiti amin a cabusorna.

¹⁹ Ket ni Abner insaona met cadagiti lapayag ti Benjamin: ken casta met a ni Abner napanna insao cadagiti lapayag ni David idiay Hebron ti isu-amin a maipagarup a naimbag iti Israel, ken iti amin a balay ni Benjamin.

²⁰ Iti casta immay ni Abner ken David idiay Hebron, ket caduana dagiti duapulo a lallaki. Ket ni David nagaramid iti rambac a maipaay ken Abner ken cadagiti lallaki a naicuyog idi kencuana.

²¹ Ket ni Abner kinunana ken David, Tumacderacto ket innacto, ket ummongecto ken apoc nga ari ti isu-amin nga Israel, tapno makitulagda coma kenca, ket sica agarica coma iti isu-amin a pagayatan ta cararuam. Ket ni David pinalubosanna ni Abner; ket isu napan a sitatalna.

²² Ket, adtoy, dagiti ad-adipen ni David agraman ken ni Joab naggapuda iti maysa a panangraut, ket nangicuyogda cadacuada ti dackel a sinamsam: ngem ni Abner awanen idi ken David idiay Hebron; ta isu pinalubosanna, ket isu napan a sitatalna.

²³ Ket idi a simmangpet ni Joab ken amin ti buyot nga adda idi kencuana, imbagada ken Joab, a nacuna, Ni Abner nga anac ni Ner immay iti ari, ket isu pinalubosanna, ket isu napan a sitatalna.

²⁴ Idin ni Joab immay iti ari, ket kinunana, Ania ti inaramidmo? adtoy, immay ni Abner kenca; apayapay nga isu pinagawidmo, ket isu napan a sitatalna?

²⁵ Ammoem a ni Abner nga anac ni Ner, nga immay a mangallilaw kenca, ken mangammo iti ruaram ken sercam, ken mangammo iti isu-amin nga ar-aramidem.

²⁶ Ket idi a ni Joab rimmuar a naggapu ken David, nangibaon cadagiti babaonen ken ni Abner, ket isuda ti nangisubli kencuana nanipud iti bubon ti Sira: ngem ni David saanna a naammoan.

²⁷ Ket idi a ni Abner nagsubli iti Hebron, ni Joab isu ipacnina aginggana iti tengnga ti ruangan tapno makisao kencuana a sililimed, ket isu sinugatna sadiay iti bagina, iti casta natay, a maipuon iti dara ni Asael a cabsatna.

²⁸ Ket iti calpasanna, idi a ni David nangngegna, kinunana, Siac ken ti pagariac awanancami iti basol iti saclang ni Jehova iti agnanayon a maipanggep iti dara ni Abner nga anac ni Ner:

²⁹ Agtinnag coma iti rabaw ti olo ni Joab, ken iti amin a balay ni amana; ket saan coma nga agcurang iti balay ni Joab ti tao nga aglac-am iti panagtotot, wenno agcucutel, wenno magmagna coma a sisasarucod, wenno mapasag coma iti campilan, wenno macurcurangan iti taraon.

³⁰ Casta ti panangpapatay da Joab ken Abisai a cabsatna ken ni Abner, agsipud ta isu pinapatayna idi ni Asael a cabsatda idi gubat sadi Gabaon.

³¹ Idin ni David kinunana ken Joab, ken iti amin a tattao nga adda idi kencuana, Ray-abenyo dagita pagan-anayyo, ket agbarikescayo cadagiti nakersang a lupot, ket agdung-awcayo iti una ni Abner. Ket ni ari David simmurot iti lungon.

³² Ket intabonda ni Abner idiay Hebron: ket ti ari inngatona ti timecna, ket nagsangit iti tanem ni Abner; ket isu-amin dagiti tattao nagsangitda.

³³ Ket ti ari nagdung-aw gapu ken Abner, ket kinunana, matay coma ni Abner a cas la iti ipapatay ti maysa a maag?

³⁴ Dagiti im-imam saanda a naparautan, uray dagiti sacsacam saanda a nacawaran: cas la lalaki a napasag iti saclang dagiti annac ti kinadangkes, casta ti pannacapasagmo. Ket isu-amin dagiti tattao nagsangitda manen a maipapan kencuana.

³⁵ Ket isu-amin dagiti tattao immayda a mangpacan ken David iti tinapay idi nga aldaw pay laeng; ngem ni David insapatana, a kinunana, Casta coma ti aramiden caniac ti Dios, ken ad-adda pay met coma, no siac ramanac ti tinapay, wenno iti sabali, agingga iti ilelennec ti init.

³⁶ Ket isu-amin dagiti tattao nadlawda, ket nacaay-ayo cadacuada; ta isu-amin nga inaramid ti ari inay-ayona amin dagiti tattao.

³⁷ Iti casta amin dagiti tattao ken amin pay nga Israel naammoanda idi nga aldaw, a saan a naggapu iti ari ti pannacapapatay ni Abner nga anac ni Ner.

³⁸ Ket ti ari kinunana cadagiti adipenna, Dicayo ammo aya nga iti daytoy nga aldaw napasag iti Israel ti maysa a pangolo ken natan-oc a lalaki?

³⁹ Ket iti daytoy nga aldaw nacapuyac, nupay ariac a napulotan; ket dagitoy a lallaki nga annac ni Sarvia, natangkenda unay caniac: ni Jehova supapacanna coma iti managaramid iti dakes iti mainugot iti kinadakesna.