2 Samuel 23 - Ti Biblia (1973)

Ti maudi a canta ni David. Dagiti tattao a mamaingel ken dagiti gapuananda. Ti danum a nayeg a naggapu iti bubon ti Belen.

¹ Dagitoy dagiti naudi a balicas ni David. Ni David nga anac ni Isai cunana, ket ti lalaki a nabangon iti nangato cunana, ti pinulotan ti Dios ni Jacob, ken nasam-it a sumasalmo ti Israel:

² Ti Espiritu ni Jehova nagsao a gapu caniac, ket ti saona adda idi iti dilac.

³ Ti Dios ti Israel kinunana, ti Bato ti Israel nagsao caniac: ti maysa a mangituray a sililinteg cadagiti tattao, a mangituray iti panagbuteng ti Dios,

⁴ Isunto ti cas la iti lawag ti bigat, no ti init lumgac, maysa a bigat nga awan dagiti ul-ulep no ti naganus a root rumusing iti daga, iti nasin-aw a lawag iti calpasan ti tudo.

⁵ Pudno a ti balayco saan a casta iti Dios; nupay casta inaramidna caniac ti agnanayon a tulag, nangurnos cadagiti isu-amin a banag, ken natalged: gapu kencuana ti amin a pannacaispalco, ken isu amin a calicagumco, nupay isu dina padackelen.

⁶ Ngem dagiti nadangcoc isudanto amin cas la cadagiti sisiit a maipurruac, agsipud ta saan a mabalin nga iggaman ida iti ima:

⁷ Ngem ti tao a mangsagid cadacuada rebbengna ti maigaman iti igam a landoc, ken iti orongan ti pica: ket isuda mapuurandanto a matalipuspus iti apuy iti lugarda.

⁸ Dagitoy dagiti nagnagan dagidi mamaingel a lallaki nga addada idi ken ni David: Ni Joseb-bassebet a maysa a Tahquemonita, a pangolo dagiti capitan; castamet idi ni Adino nga Eznita, a naibusor cadagiti walo gasut a napapatayda iti naminsan a daras.

⁹ Ket iti sumaganad kencuana ni Eleazar nga anac ni Dodo nga anac ti Ahohit, a maysa cadagiti tallo a mamaingel a lallaki ken David, idi a kinaritda dagiti Filisteos, a naguornongda sadiay a makigubat, ket dagiti lallaki ti Israel nagtalawda.

¹⁰ Isu timmacder, ket kinabilna dagiti Filisteos inggana a ti imana napacsuyan, ket ti imana naicapet iti campilan; iti daydi nga aldaw ni Jehova nangaramid iti dackel a panagballigi; ket dagiti tattao nagsublida iti licudanna nga agala laeng iti samsam.

¹¹ Iti sumaganad kencuana ni Samma nga anac ni Age nga Ararita. Ket dagiti Filisteos naurnongda iti maysa a cabuyotan, idiay yan ti maysa a cabenneg ti daga a napno cadagiti patani; ket dagiti tattao nagtalawda iti sango dagiti Filisteos.

¹² Ngem isu nagtacder iti tengnga di kinelleng ket nagicanawa, ken pinatayna dagiti Filisteos: ket ni Jehova nangaramid iti dackel a panagballigi.

¹³ Ket dagiti tallo cadagiti tallo-pulo a pangolo simmalogda, ket inmayda idi tiempo ti ani ken David iti rukib sadi Adullam; ket ti buyot dagiti Filisteos nagpacarsoda idi iti lobong ti Rahaim.

¹⁴ Ket ni David addan idi iti sarikedked, ket ti agbantay a buyot dagiti Filisteos addadan idi idiay Belen.

¹⁵ Ket ni David nautuyan, ket kinunana, O asino ti mangted coma caniac ti inumen iti danum idiay bubon ti Belen, nga adda iti denna ti ruangan!

¹⁶ Ket dagiti tallo a mamaingel a lallaki simmaracusucda iti buyot dagiti Filisteos, ket nangalada iti danum iti bubon ti Belen, nga adda idi iti denna ti ruangan, ket nangalada, ken inyegda ken ni David: ngem isu dina kinayat nga ininum, no di ket imbucbocna ken Jehova.

¹⁷ Ket kinunana, Adayu coma caniac, O Jehova, nga aramidec coma daytoy: inumecto aya ti dara dagiti lallaki a napan iti panagpeggad ti biagda? gapuna nga isu dina kinayat nga ininum. Dagiti tallo a mamaingel a lallaki inaramidda dagitoy a banag.

¹⁸ Ket ni Abisai a cabsat ni Joab, nga anac ni Sarvia, isu idi ti pangolo dagiti tallo. Ket isu intag-ayna ti picana a maibusor iti tallo gasut ket pinapatayna ida, ket nacagun-od ti nagan cadagiti tallo.

¹⁹ Saan aya nga isu idi ti catan-ocan cadagiti tallo? gapuna a naaramid a pangoloda; nupay casta saan a nacagteng cadagiti immuna a tallo.

²⁰ Ket ni Benaia nga anac a lalaki ni Joiada, nga anac ti maysa a lalaki a maingel a taga Cabseel, a nangaramid cadagiti namaingelan nga aramid, a pinatayna dagiti dua nga annac a lallaki ni Ariel a taga Moab; simmalog met ket pinatayna ti maysa a leon iti tengnga ti maysa a bito idi tiempo ti nieve.

²¹ Ket isu pinatayna ti maysa nga Egipcio a nataer a lalaki: ket ti Egipcio addaan idi iti maysa a pica iti imana; ngem isu simmalog kencuana a sisasarucud, ket rinabsutna ti pica iti ima ti Egipcio, ket iti daydi met la picana ti pinangpapatayna kencuana.

²² Dagitoy a banag inaramid idi ni Benaya nga anac ni Joiada, ket nacagun-od ti nagan cadagiti tallo a mamaingel a lallaki.

²³ Isu nadaydayaw idi ngem cadagiti tallopulo, ngem saan a nacagteng cadagiti immuna a tallo. Ket ni David isu ti insaadna a pangolo ti guardiana.

²⁴ Ni Asael a cabsat ni Joab isu idi ti maysa cadagiti tallopulo; ni Elhaanan nga anac a lalaki ni Dodo a taga Bet-lehem,

²⁵ Ni Samma nga Harodi, ni Elica nga Harodi,

²⁶ Ni Heles a Falti, ni Hira nga anac a lalaki ni Jecces a taga Tecoa,

²⁷ Ni Abiezer nga Anatot, ni Mabonnai nga Husa,

²⁸ Ni Selmo nga Ahofat, ni Majarai a Netofat,

²⁹ Ni Helec nga anac a lalaki ni Baana a Netofat, ni Ittai nga anac a lalaki ni Ribai a taga Gabaa cadagiti annac ni Benjamin,

³⁰ Ni Banaya a Paratonita, ni Hiddai a taga wawaig sadi Gaas,

³¹ Ni Abi-albon nga Arat, ni Azmavet a Barumita.

³² Ni Elihaba a Saalbon, dagiti annac a lallaki ni Jassen, ni Jonatan,

³³ Ni Samma nga Arar, ni Ahiam nga anac a lalaki ni Sarar nga Arar,

³⁴ Ni Eliflet nga anac a lalaki ni Asbai, nga anac ti Maacateo, ni Eliam nga anac a lalaki ni Ahitofel a Gilon,

³⁵ Ni Hesrai a Carmelo, ni Foarai nga Arbi,

³⁶ Ni Ygal nga anac a lalaki ni Natan a taga Soba, ni Bani a Gadi,

³⁷ Ni Selec nga Ammon, ni Naharai a Beerot, nga agawawit cadagiti igam ni Joab nga anac a lalaki ni Sarvia,

³⁸ Ni Ira a Itri, ni Gareb a Itri,

³⁹ Ni Urias a Jetteo: isuda amin tallopuloda ket pito.