2 Samuel 21 - Ti Biblia (1973)

Dagiti Gabaonitas maibalesda ken Saul. Dagiti tultulang da Saul ken Jonatan mayegda idiay Sela. Dagiti gubgubat a maibusor cadagiti Filisteos.

¹ Ket cadagiti al-aldaw ni David adda idi bisin bayat ti tallo a tawen, a nagsasaruno; ket ni David sinapulna ti rupa ni Jehova. Ket ni Jehova kinunana, Isu ti maipuon ken ni Saul, ken gapu iti balay a nadara, agsipud ta pinatayna dagiti Gabaonitas.

² Ket ti ari inayabanna dagiti Gabaonitas ket kinunana cadacuada (dagiti Gabaonitas saanda idi a nagtaud cadagiti annac ti Israel, no di ket cadagidi natda cadagiti Amorreo: ket dagiti annac ti Israel nagsapatada idi cadacuada; ket ni Saul tinarigagayanna a papatayen ida iti regtana a maipaay cadagiti annac ti Israel ken ti Juda):

³ Ket ni David kinunana cadagiti Gabaonitas, ania ti aramidecto cadacayo? Ken iti ania ti panggugorconto, tapno bendicionanyo coma ti tawid ni Jehova?

⁴ Ket dagiti Gabaonitas kinunada kencuana, Saan a maipuon iti pirac, wenno iti balitoc cadacami ken ni Saul, wenno iti balayna; saan nga aggapu cadacami ti pannacatay ti siasinoman a tao iti Israel. Ket isu kinunana cadacuada, Ania ti cunaenyonto, tapno aramidec nga agpaay cadacayo.

⁵ Ket isuda kinunada iti ari, Daydi tao a nangangaw cadacami ken nagpanegem a maibusor cadacami, tapno madadaelcami coma iti panagtaengmi iti uray sadinoman cadagiti sacup ti Israel.

⁶ Mayawat coma cadacami dagiti pito a lallaki cadagiti annacna, tapno ibitinmi coma ida ken Jehova idiay Gabaa ni Saul, a pinili ni Jehova. Ket ti ari kinunana, Siac itedconto ida.

⁷ Ngem ti ari inliclicna ni Mifiboset, nga anac ni Jonatan, nga anac ni Saul, a gapu iti sapata ni Jehova, nga adda idi cadacuada, cada David ken Jonatan, nga anac ni Saul.

⁸ Ngem ti ari nangala iti dua nga annac a lallaki ni Rispa nga anac a babai ni Aya, isuda nga inyanacna ken ni Saul, da Armoni ken Mifiboset; ken lima nga annac a lallaki ni Micol nga anac a babai ni Saul, isuda nga impasngayna ken Adriel, nga anac a lalaki ni Barzillai a Molahita:

⁹ Ket inyawatna ida cadagiti im-ima dagiti Gabaonitas, ket isuda imbitinda ida idiay bantay iti sango ni Jehova, ket dagiti pito natayda amin a sangcacanunong. Ket napapatayda cadagiti al-aldaw ti panagani cadagiti inmun-una nga aldaw, idi carugrugi ti panagani iti cebada.

¹⁰ Ket ni Rispa nga anac a babai ni Aya nangala iti supot a nakersang, ket isu ti inyucradna a maipaay kencuana iti rabaw ti bato, nanipud iti rugi ti panagani inggana iti pannacaibuyat ti danum cadacuada a naggapu iti langit; ket dina impalubos nga uray aniaman a tumatayab ti langit agbatay cadacuada iti aldaw, uray an-animal a narungsot ti away iti rabii.

¹¹ Ket naibaga ken ni David daydi nga inaramid ni Rispa, nga anac ni Aya, a camalala ni Saul.

¹² Ket ni David napan ket innalana dagiti tultulang ni Saul, ken dagiti tultulang ni Jonatan nga anacna, cadagiti lallaki a taga Jabes-galaad, isuda a nangtacaw idi cadacuada idiay lansangan ti Betsan, isu a nagibitinan idi dagiti Filisteos cadacuada, idi aldaw a panangpapatay dagiti Filisteos ken ni Saul idiay Gelboe:

¹³ Ket isu insangatna nanipud sadiay dagiti tultulang ni Saul ken dagiti tultulang ni Jonatan nga anacna: ket inurnongda dagiti tultulang dagiti naibitin.

¹⁴ Ket intabunda dagiti tultulang ni Saul, ken dagiti tultulang ni Jonatan nga anacna idiay daga ti Benjamin sadi Sela, iti tanem ni Cis nga amana: ket inaramidda amin daydi imbilin ti ari, Ket iti calpasan daydi ti Dios nagdawatanda iti agpaay iti daga.

¹⁵ Ket dagiti Filisteos nakigubatda manen iti Israel; ket ni David simmalog, ken dagiti adipenna naicuyogda kencuana, ket nakigubatda cadagiti Filisteos. Ket ni David napacsuyan.

¹⁶ Ket ni Isbi-benob, a nagtaud cadagiti annac ti gigante, ket ti dagsen ti picana tallo gasut a siclo a gambang iti cadagsen, ket isu nangibarikes iti baro a campilan, pinanggepna ti mangpapatay ken David.

¹⁷ Ngem ni Abisai nga anac ni Sarvia immarayat kencuana, ket kinabilna daydi Filisteo, ket pinatayna. Idin dagiti lallaki ni David insapatada kencuana, a kinunada, Uray caano dicanto makipagruar cadacami iti gubat, tapno dica coma iddepen ti silaw ti Israel.

¹⁸ Ket naaramid iti calpasan daytoy, nga adda idi pannakigubat cadagiti Filisteos idiay Gob: idin ni Sibecai nga Husatita pinatayna ni Saf, a maysa cadagiti annac ti gigante.

¹⁹ Ket adda manen pannakigubat cadagiti Filisteos idiay Gob; ket ni Elhanan nga anac ni Jaare-oregim a taga Belen pinatayna ni Goliat a Geteo, ti urongan ti picana cas la iti lucotan ti pangablan.

²⁰ Ket adda idi manen gubat idiay Gat, isu nga adda idi maysa a lalaki a dackel ti catayagna, nga addaan iti innem a ramramay iti tunggal imana, ken iti tunggal sacana innem a ramramay, a duapulo ket uppat ti bilangda; ket isu nayanac met iti gigante.

²¹ Ket idinto a nakidangadang iti Israel, isu pinatay ni Jonatan nga anac ni Sima, a cabsat ni David.

²² Dagitoy nga uppat nayanacda iti gigante sadi Gat; ket napasagda gapu iti ima ni David, ken gapu iti ima dagiti ad-adipenna.