2 Samuel 2 - Ti Biblia (1973)

Ni David maaramid nga ari iti Juda, ket ni Isboset nga ari iti Israel. Ni Abner maabac ken Joab. Ni Asael camatenna ni Abner, ket papatayen ni Abner.

¹ Iti calpasan daytoy naaramid a ni David immuman ken Jehova, a kinunana, Sumang-atacto iti uray ania cadagiti il-ili ti Juda? ket ni Jehova kinunana kencuana, Sumang-atca. Ket ni David kinunana, Sadino ti sang-atacto? Ket isu kinunana, Iti Hebron.

² Iti casta ni David simmang-at sadiay, ken agraman cadagiti dua nga assawana, da Ahinoam a Jezreelita, ken ni Abigail nga asawa idi ni Nabal a Carmelito.

³ Ket dagiti lallakina nga adda idi kencuana incuyog ida ni David, ti tunggal lalaki agraman cabbalayna: ket isuda nagnaedda idi cadagiti il-ili ti Hebron.

⁴ Ket dagiti lallaki ti Juda immayda, ket pinulotanda sadiay ni David nga ari iti balay ni Juda. Ket imbagada ken David, a cunana Dagiti lallaki a taga Jabes-galaad isuda dagiti nangitabon ken Saul.

⁵ Ket ni David nagbaon cadagiti babaonen cadagiti lallaki a taga Jabes-galaad, ket kinunana cadacuada, Benditocayo coma ken ni Jehova, nga imparangyo daytoy a kinaimbag ken apoyo, a ni met laeng Saul, ket isu intabonyo.

⁶ Ket ita ni Jehova iparangna ti naayat a kinaimbag ken kinapudno cadacayo: ket siac met supapacacto cadacayo daytoy a kinaimbag, agsipud ta inaramidyo daytoy a banag.

⁷ Gapuna ita pumigsada coma dagita im-imayo, ken umingelcayo; ta ni Saul nga apoyo natay, ken castamet ti balay ni Juda pinulotannac nga ari cadacuada.

⁸ Ket ni Abner, nga anac ni Ner, a capitan ti buyot ni Saul, innalana ni Isboset nga anac a lalaki ni Saul, ket isu inyegna iti Mahanaim;

⁹ Ket isu ti pinagbalinna nga ari iti Galaad, ken iti Gessuri, ken iti Jezreel, ken iti Efraim, ken iti Benjamin, ken iti amin nga Israel.

¹⁰ Ni Isboset, nga anac ni Saul, agtawen idi iti uppat a pulo a tawen idi nangrugi nga agari iti Israel, ket nagari iti dua a tawen. Ngem ti balay ni Juda simmurot idi ken David.

¹¹ Ket iti bayat ti panagari ni David idiay Hebron iti balay ni Juda pito a tawen ket innem a bulan.

¹² Ket ni Abner nga anac ni Ner, ken dagiti ad-adipen ni Isboset nga anac ni Saul, rimmuarda a naggapu iti Mahanain agingga iti Gabaon.

¹³ Ket ni Joab nga anac ni Sarvia, ken dagiti adipen ni David, rimmuarda, ket nasaracanda ida iti denna ti tanke idiay Gabaon; ket isuda nagtutugawda, ti maysa iti maysa a bangir ti tanke, ket ti sabali iti sabali a bangir ti tanke.

¹⁴ Ket ni Abner kinunana ken Joab, Agdawatac kenca, a dagiti agtutubo a lallaki tumacderda ket agay-ayamda coma iti saclangtayo. Ket ni Joab kinunana, Tumacderda coma.

¹⁵ Idin timmacderda ket nagnada a binilang: sangapulo ket dua cadagiti Benjamitas ken biang ni Isboset nga anac ni Saul, ket sangapulo ket dua cadagiti adipen ni David.

¹⁶ Ket isuda nagiinniggemda ti tunggal maysa iti olo ti caduana, ket imbagcongna ti campilanna iti bacrang ti caduana: iti casta napasagda a padapada: gapuna a daydi a disso nanaganan iti Helcath-assurim, nga adda sadi Gabaon.

¹⁷ Ket ti gubat idi nacaro unay iti daydi nga aldaw; ket ni Abner naabac, ken dagiti lallaki ti Israel, iti sango dagiti adipen ni David.

¹⁸ Ket dagiti tallo nga annac a lallaki ni Sarvia addada idi sadiay, da Joab, Abisai, ken Asael: ket ni Asael nasiglat unay idi dagiti sacsacana a cas la maysa nga ugsa nga atap.

¹⁹ Ket ni Asael kinamatna ni Abner; ket napan a di simmiasi iti canawan uray iti catigid a simmurot ken Abner.

²⁰ Idin ni Abner timmaliaw iti licudanna, ket kinunana, Sica ni Asael? Ket isu simmungbat, Siac.

²¹ Ket ni Abner kinunana kencuana, Sumiasica iti macanawanmo wenno iti macatigidmo, ket tumiliwca iti maysa cadagiti agtutubo a lallaki, ket alaem ti cabalna. Ngem ni Asael dina kinayat ti simmiasi iti panangsurot kencuana.

²² Ket ni Abner kinunana manen ken Asael, Sumiasica iti panangsurot caniac; apayapay siac ipasagca coma iti daga? casanonto ngarud ti panangingatoc iti rupac ken ni cabsatmo a Joab?

²³ Nupay casta isu saanna a kinayat ti simmiasi, gapuna a ni Abner iti mordong ti picana ti pinangsugatna kencuana iti bagina, iti casta nga ti pica rimmuar iti licudanna; ket napasag idiay, ket natay met laeng idiay a lugar: ket naaramid, nga isu-amin nga immay iti lugar a ni Asael nacapasaganna ken nacatayanna nagsardengda.

²⁴ Ngem da Joab ken Abisai kinamatda ni Abner: ket ti init limnec idi nga isuda macagtengda iti turod ti Amma, nga adda iti sango ti Gia iti denna ti dalan ti let-ang sadi Gabaon.

²⁵ Ket dagiti annac ni Benjamin naguornongda a simmurot ken Abner, ket nagbalinda a maysa a cabuyotan, ket nagtacderda iti tapaw ti maysa a turod.

²⁶ Idin ni Abner pinuccawanna ni Joab, ket kinunana, Mangpucawto iti agnanayon ti campilan? dica ammo aya a kinapaitto ti maududi a tungpal? casano ti capautna ngarud aya, iti cabayagmo a mangibilin cadagiti tattao iti isisiasi da iti panangsurot cadagiti cacabsatda?

²⁷ Ket ni Joab kinunana, Cas ti Dios sibibiag, no dica coma nagsao, pudno ngarud nga iti bigat dagiti tattao pimmanawda, saanda a sinurot ti tunggal maysa ni cabsatna.

²⁸ Iti casta ni Joab pinagunina ti tangguyobna, ket amin dagiti tattao nagsardengda, ket dida kinamaten ti Israel, dida nakibacalen.

²⁹ Ket ni Abner ken dagiti lallaki na napanda amin iti daydi a rabii iti tengnga ti Araba; ket bimmaliwda iti Jordan, ket napanda iti tengnga ti amin a Bethorom, ket immayda iti Mahanaim.

³⁰ Ket ni Joab nagsubli iti panangsurot ken Abner: ket idi a naurnong dagiti amin a tattao, cadagiti ad-adipen ni David nagcurangda iti sangapulo ket siam a tattao ken ni Asael.

³¹ Ngem dagiti ad-adipen ni David impasagda cadagiti taga-Benjamin, ken cadagiti lallaki ni Abner, iti dayta iti tallo gasut ket innem a pulo a tattao ti natay idi.

³² Ket innalada ni Asael, ket intabonda idi tanem ni amana, nga adda idi idiay Belen. Ket ni Joab ken dagiti lallakina nagnada a nagpatnag, ket ti aldaw limmawag cadacuada idiay Hebron.