2 Samuel 16 - Ti Biblia (1973)

Ti ulbod ni Siba a maipapan ken Mefiboset. Ni Semei ilunodna ni David, ngem baybay-an ni David ti panangdusana ken Semei. Ni Cusai tumipon ken Absalom. Ti patigmaan ni Ahitofel ken Absalom.

¹ Ket idi a ni David nacapagna bassit iti tapaw ti sang-atan, adtoy ni Siba a tagabu ni Mefiboset a simmabet kencuana, agraman sangaparis nga asno a nasillaanda, ket cadagiti rabawda dua gasut a tinapay, ken sangagasut a caraay nga uvas a napakebbet, ken sangagasut a bunga a namaga, ken sangasupot a lalat nga arac.

² Ket ti ari kinunana ken Siba, Ania ti cayatmo a saoen cadagitoy? Ket ni Siba simmungbat, Dagiti asno isuda ti agpaay a pagsacayan ti familia ti ari; ket dagiti tinapay ken bungbunga a namaga agpaayda a canen cadagiti bumaro; ket ti arac, tapno ti mabannogan iti let-ang uminum coma.

³ Ket ti ari kinunana, Sadino ti yan ti anac ti apom? Ket ni Siba kinunana iti ari, Adtoy, isu nagbati idiay Jerusalem; ta kinunana, Iti daytoy nga aldaw maisublinto caniac ti balay ti Israel a pagarian ni amac.

⁴ Idin ni David kinunana ken Siba, Adtoy, cucuamto amin a cucua ni Mefiboset. Ket ni Siba kinunana, Agrucbabac; palubosannac a macasarac iti parabur iti imatangmo, O ari nga apoc.

⁵ Ket idi a ni ari David immay iti Bajurim, adtoy, rimmuar sadiay ti maysa a lalaki iti familia ti balay ni Saul, a ti naganna Semei, nga anac ni Gera: ket rimmuar nga agilunlunod a cancanayon idi nga um-umay.

⁶ Ket ububorenna idi ni David, ken dagiti isu-amin nga adipen ni ari David: ken isu-amin a tattao, ken amin dagiti mamaingel a tattao nga addada idi iti macanawan ken macatigidna.

⁷ Ket ni Semei kinunana iti castoy idi nga agilunod, Inca, inca, sica lalaki ti dara, ken naulpit a tao:

⁸ Ni Jehova insublina kenca ti isu-amin a dara ti balay ni Saul, a iti saadna sica nagarica; ket ni Jehova inyawatna ti pagarian iti ima ni anacmo nga Absalom; ket, adtoy, a sica naalaca iti kinadakesmo, agsipud ta sica maysaca a lalaki ti dara.

⁹ Idin ni Abisai nga anac ni Sarvia kinunana iti ari, Apayapay daytoy aso a natay ilunodna ni apoc nga ari? agdawatac kenca, a palubosannac coma a mapan, ket putolec ti olona.

¹⁰ Ket ti ari simmungbat, Ania ti nacaibiangac cadacayo, dacayo annac ni Sarvia? Agsipud ta isu agilunod, ket agsipud ta ni Jehova kinunana kencuana, Ilunod mo ni David; asino ngarud ti agcunanto kencuana, Apayapay nga inaramidmo ti casta?

¹¹ Ket ni David kinunana ken Abisai, ken iti amin nga adipenna, Adtoy, a ti anacco a lalaki, a rimmuar iti tianco, sapulenna ti biagco; dinto adadda ita nga aramiden daytoy Benjamita? isu bay-anyo, ket bay-anyo nga agilunod, ta ni Jehova ti nagbilin kencuana.

¹² Bareng coma no ni Jehova kitaennanto ti ranggas a naaramid caniac, ket isupapacto ni Jehova caniac ti imbag a gapu iti panangilunlunodna caniac iti daytoy nga aldaw.

¹³ Iti casta ni David ken dagiti lallakina napanda iti dalan; ket ni Semei napan it bacras ti turod a maisango kencuana, ket agilunlunod idi a mapmapan, ken agububor kencuana, ken agiwaris iti tapoc.

¹⁴ Ket ti ari ken isu-amin a tattao a naicuyog kencuana, dimtengda a sibabannog; ket naginanada sadiay.

¹⁵ Ket ni Absalom ken isu-amin a tattao, a dagiti lallaki ti Israel, simrecda iti Jerusalem, ket ni Ahitofel caduana.

¹⁶ Ket naaramid idi, idinto a ni Cusai nga Araquita, a gayyem ni David, immay ken ni Absalom, a ni Cusai kinunana ken ni Absalom, Agbiag coma a manayon ti ari, agbiag coma a manayon ti ari.

¹⁷ Ket ni Absalom kinunana ken ni Cusai, Daytoy aya ti kinaimbagmo iti gayyemmo? apayapay a dica napan kimmuyog ken gayyemmo?

¹⁸ Ket ni Cusai kinunana ken Absalom, Saan; ngem iti daydiay a ni Jehova, ken daytoy nga umili, ken ti isu-amin a lallaki ti Israel pinilida, siacto ti cucuana, ket isunto ti pakipagbatiac.

¹⁹ Ket casta met, asino aya ti pagserviac coma? saanac aya nga agservi coma iti saclang ti anacna? no casano ti panagservic idi iti saclang ni amam, castaacto met laeng iti saclangmo.

²⁰ Idin ni Absalom kinunana ken ni Ahitofel, Itedyo ti patigmaanyo no ania ti aramidentayonto.

²¹ Ket ni Ahitofel kinunana ken Absalom, Sumrecca cadagiti camcamalala ni amam, dagidiay imbatina nga agaywan iti balay; ket isu-amin nga Israel mangngegnanto a sica ti macarimon ken amam: isunton ti ipipigsa dagiti im-ima dagiti isu-amin nga adda kenca.

²² Iti casta nangucradda iti maysa a tolda gapu ken Absalom iti toctoc ti balay; ket ni Absalom simrec cadagiti camcamalala ni amana iti imatang ti isu-amin nga Israel.

²³ Ket ti patigmaan ni Ahitofel nga intedna cadagidi nga aldaw, isu idi cas la no ti maysa a lalaki nagyuman iti sao ti Dios: iti casta ti patigmaan ni Ahitofel adda idi nga agpadpada cada David ken Absalom.