2 Samuel 15 - Ti Biblia (1973)

Ni Absalom sulbogenna dagiti tattao nga umalsa. Ni David agtalaw iti Jerusalem, ket cuyogen ni Etai; pagsublienna da Sadoc, ken Abiatar, ken Cusai.

¹ Iti calpasan daytoy naaramid, a ni Absalom nangisagana iti maysa a lugan ken cabcabayo, ken limapulo a lallaki nga agtatarayda iti sangona.

² Ket ni Absalom bimmangon a nasapa, ket nagtacder iti denna ti dalan ti ruangan: ket castoy idi, nga, no siasinoman nga addaan iti dawat nga umay idi iti ari tapno paocom, idin ni Absalom ayabanna daydiay ket cunana, Iti ania nga ili ti naggapuam? Ket isu simmungbat, Ti adipenmo nagtaud iti maysa cadagiti caputotan ti Israel.

³ Ket ni Absalom kinunana kencuana, Kitaem, dagita panggepmo nasayaat ken nalintegda; ngem awan ti lalaki a dinutoc ti ari a dumngeg kenca.

⁴ Casta met a ni Absalom kinunana, O no siac naaramidac coma nga ocom iti daga, tapno tunggal tao nga addaan iti aniaman a dawat wenno ringgor, umay coma caniac, ken aramidec coma kencuana iti kinajusticia!

⁵ Ket casta idi, idi nga uray siasino a tao ti umadani tapno agrucbab kencuana, isu yunnatna ti imana, ket isu iggamanna, ken agcanna.

⁶ Ket iti castoy a wagas ti inaramid ni Absalom iti isu-amin nga Israel nga umay idi iti ari tapno paocom: ket castoy ti panangallilaw ni Absalom cadagiti puso dagiti tattao ti Israel.

⁷ Ket naaramid idi naggibus ti uppat a pulo a tawen, a ni Absalom kinunana iti ari, Agdawatac kenca, palubosannac coma a mapan tapno innac coma agtungpal idi caric idiay Hebron, nga incaric idi ken Jehova.

⁸ Ta ti adipenmo nagaramid idi iti maysa a cari idi nagtaengac sadi Gessur idiay Siria, a kinunac, No iti kinapudnona ni Jehova yegnac manen idiay Jerusalem, isu ti panagservicto ken Jehova.

⁹ Ket ti ari kinunana kencuana, Inca a sitatalna. Iti casta isu timmacder, ket napan idiay Hebron.

¹⁰ Ngem ni Absalom nangibaon cadagiti agsiim cadagiti isu-amin a caputotan ti Israel, a cunana, Apaman a mangngegyo ti aweng ti tangguyob, dacayo sawenyonton, Ni Absalom isu ti ari idiay Hebron.

¹¹ Ket dua gasut a tattao a taga Jerusalem naawisda a napanda kimmuyog ken Absalom, ket napanda nga awan ammoda; ket saanda a naammoan ti uray aniaman a panggep.

¹² Ket ni Absalom pinaayabanna ni Ahitofel a Gilonita, a consejero ni David, nanipud iti ciudadna, nanipud iti Gilo met laeng, iti bayat ti panagidatagna cadagiti datdaton. Ket ti yaalsa idi napigsa; ta dagiti tattao cancanayon nga umaduda ken Absalom.

¹³ Ket immay ti maysa a babaonen ken David, a nagcuna, Dagiti puso dagiti lallaki ti Israel addada a sisusurot ken Absalom.

¹⁴ Ket ni David kinunana cadagiti amin nga ad-adipenna nga addada kencuana idiay Jerusalem, Tumacdercayo, ket agtalawtayo coma; ta awanto cadatayo ti macalasut ken ni Absalom: agdarascayo a pumanaw, ta no saan isu macamacamnatayo a sidadaras, ket yegna cadatayo ti dakes, ken cabilenna ti ili iti tadem ti campilan.

¹⁵ Ket dagiti ad-adipen ti ari kinunada iti ari, Adtoy, a dagiti ad-adipenmo addada a sisasagana a mangaramid iti uray aniaman a ni apomi nga ari piliennanto.

¹⁶ Ket ti ari rimmuar agraman amin ti cabbalayna a simmurot kencuana. Ket ti ari imbatina dagiti sangapulo a babbai, nga isuda dagidi camcamalala, tapno agaywanda iti balay.

¹⁷ Ket ti ari rimmuar, ken amin dagiti tattao a sisusurot kencuana, ket simmardengda idiay Bet-merac.

¹⁸ Ket amin dagiti adipenna naglabasda iti sikiganna; ken amin dagiti Cereteos, ken amin dagiti Peleteos, ken amin dagiti Geteos, nga aginnem a gasut a lallaki nga immayda a simmurot kencuana nanipud Gat, ket napanda iti sangoanan ti ari.

¹⁹ Idin ti ari kinunana ken Ittai a Geteo, Apayapay a makicuyogca met cadacami? agsublica, ket makinaedca iti ari: ta sica sangsangailica, ken napagtalawca met; agsublica iti lugarmo met laeng.

²⁰ Agsipud ta immayca laeng idi calman, iti daytoy nga aldaw pakipagsang-atenca coma cadacami, idinto a siac innac iti sadinoman a pacabalinac? agsublica, ken isublim dagiti cacabsatmo; caasi ken kinapudno addada coma kenca.

²¹ Ket ni Ittai simmungbat iti ari, a kinunana, Cas ni Jehova sibibiag, ken cas ti apoc nga ari sibibiag, pudno a iti aniaman a lugar a pagyananto ni apoc nga ari, no agpaay ken natay wenno agpaay iti biag, idiay met laeng agyanto ti adipenmo.

²² Ket ni David kinunana ken Ittai, Inca ket lumasatca. Ket ni Ittai a Geteo limmasat, ken isu-amin dagiti lallakina, ken isu-amin dagiti babassitna na nga adda idi kencuana.

²³ Ket isu-amin a daga nagsangit iti natbag a timec, ket bimmallasiw amin a tattao: ket ti ari bimmallasiw met iti waig a Cedron, ket amin dagiti tattao naglasatda, nga agturong iti dalan ti let-ang.

²⁴ Ket, adtoy, ni Sadoc immay, met ken amin dagiti Levitas naicuyog kencuana, nga inawitda ti lacasa ti tulag ti Dios; ket indissoda ti lacasa ti Dios; ket ni Abiatar simmang-at, agingga iti isu-amin a tattao nacaruarda iti ili.

²⁵ Ket ti ari kinunana ken Sadoc, Isublim ti lacasa ti Dios idiay ili: no siac macasaracacto iti parabur iti imatang ni Jehova, isu yegnacto manen, ken iparangnanto caniac dayta, ken ti pagnaedanna:

²⁶ Ngem no cunaennanto ti castoy, Saanac a maragsacan kenca; adtoy, addaac ditoy, aramidenna coma caniac ti cas ipagarupna a naimbag.

²⁷ Ket ti ari kinunana pay ken Sadoc a padi, Saan a sica ti mammadto? agsublica a sitatalna iti ili, ket caduayo dagiti dua nga annacyo a lallaki ni Ahimaas nga anacmo, ken ni Jonatan, nga anac ni Abiatar.

²⁸ Kitaenyo, siac agsardengacto cadagiti pagballasiwan ti let-ang, agingga iti umay ti sao nga aggapu cadacayo a mangipanecnec caniac.

²⁹ Gapuna a da Sadoc ken Abiatar impanda manen ti lacasa ti Dios idiay Jerusalem: ket nagyanda idiay.

³⁰ Ket ni David simmang-at iti sang-atan ti bantay dagiti Oliva, ket nagsangsangit a samangsang-at; ket siabungot ti olona, ket napan a sisasacasaca: ket isu-amin dagiti tao a naicuyog kencuana nagabungotda tunggal maysa ti olona, ket simmang-atda, a sisasangitda a sumangsang-at.

³¹ Ket maysa ti nangibaga ken David, a cunana, Ni Ahitofel adda met cadagiti nakipagalsa ken Absalom. Ket ni David kinunana, O Jehova, agdawatac kenca, a ti patigmaan ni Ahitofel pagbalinem coma a kinamaag.

³² Ket naaramid, idi a ni David nacadanon iti tuctoc ti sang-atan isu a nagcararaganna iti Dios, adtoy, ni Cusai nga Araquita immay kencuana simmabet a naray-ab dagiti cawesna, ken cadagdaga iti rabaw ti olona.

³³ Ket ni David kinunana kencuana, No makicuyogca caniac sicanto ngarud ti maysa nga awit caniac:

³⁴ Ngem no sica agsublica iti ili, ket cunaem ken Absalom, O ari siacto ti adipenmo, a cas siac idi ti adipen ni amam iti nalabes a tiempo, iti casta ita siacto ti adipenmo: ngarud waraemto coma a gapu caniac ti patigmaan ni Ahitofel.

³⁵ Sadiay awanda aya kenca da Sadoc ken Abiatar a padi? Gapuna nga isunto a ti uray aniaman a panggep a mangngegmonto idiay balay ti ari, isu ti ibagamto cada Sadoc ken Abiatar a padi.

³⁶ Adtoy, nga addada cadacuada dagiti dua nga annacda a lallaki, ni Ahimaas, nga anac ni Sadoc, ken ni Jonatan, nga anac ni Abiatar; ket gapu cadacuada ipawityonto ti tunggal damag a mangngegyo.

³⁷ Iti casta ni Cusa, a gayyem ni David, immay iti ili; ket ni Absalom dimteng iti Jerusalem.