2 Samuel 13 - Ti Biblia (1973)

Ti panangpilit ni Amnon ken Tamar. Ni Absalom ibalsanna ni Tamar iti panangpapatayna ken Amnon, sa agtalaw idiay Gessur.

¹ Calpasan daytoy naaramid, a ni Absalom nga anac a lalaki ni David adda idi maysa a cabsatna a babai a naimnas, a ti naganna Tamar, ket ni Amnon nga anac a lalaki ni David nagayat kencuana.

² Ket ni Amnon nangricna iti casta unay nga isu nagsakit a gapu ken ni Tamar a cabsatna; agsipud ta isu ti virgen idi; ket impagarup ni Amnon a naricut ti panangaramid iti uray aniaman kencuana.

³ Ngem ni Amnon adda maysa a gayyemna, a ti naganna Jonadab, nga anac a lalaki ni Samma, a cabsat ni David: ket ni Jonadab lalaki a nasicap unay.

⁴ Ket isu kinunana kencuana, O anac ti ari, apayapay a cumuttongca a casta iti inaldawaldaw? Dicanto ibaga caniac? Ket ni Amnon kinunana kencuana, Siac agayatac ken Tamar, a cabsat a babai ni cabsatco nga Absalom.

⁵ Ket ni Jonadab kinunana kencuana, Agiddaca iti iddam, ket aginsasakitca: ket intono ni amam umaynacanto kitaen, cunaemto kencuana, Agdawatac kenca a palubosam coma nga umay ni cabsatco a Tamar, tapno iccannac coma iti tinapay a canec, ket mangsagana coma iti canen iti imatangco, nga makitac coma, ken isu ti canec coma iti imana.

⁶ Iti casta ni Amnon nagidda, ket naginsasakit: ket idi a ti ari immay a mangkita kencuana, ni Amnon kinunana iti ari, Agdawatac kenca a palubosam coma nga umay ni cabsatco a Tamar, ket agaramid coma iti saclangco iti sangcaparis a bibingca tapno canec coma iti imana.

⁷ Idin ni David imbaonna ni Tamar idiay balayna, a kinunana, Inca ita idiay balay ni Amnon a cabsatmo, ket isu isaganaam iti canen.

⁸ Idi casta ni Tamar napan iti balay ni Amnon a cabsatna; ket adda idi a siidda. Ket isu nangala iti gamay, ket isu ti ginamayna, ket nagaramid cadagiti bibingca iti saclangna, ket linutona dagiti bibingca.

⁹ Ket idi nga innalana ti parioc impacbona iti saclangna; ngem isu dina kinayat ti nangan. Ket ni Amnon kinunana, Panawandac coma amin a lallaki. Ket rimmuarda tunggal lalaki nanipud iti sangona.

¹⁰ Ket ni Amnon kinunana ken Tamar, Yegmo ti canen idiay siled, tapno canec coma ita imam. Ket ni Tamar innalana dagiti bibingca, nga inaramidna, ket inyegna ida ken cabsatna nga Ammon iti siled.

¹¹ Ket idi nga isu inyegna ida kencuana tapno canenna, ni Amnon ti tinengngelna ni Tamar, ket kinunana kencuana, Umayca, cabsatco, makicaiddaca caniac.

¹² Ket isu simmungbat kencuana, Saan, cabsatco, dinac piliten; ta awan ti casta a banag a maaramid coma iti Israel: dica aramiden coma daytoy a kinamauyong.

¹³ Ket siac, sadino ti pangipanac to ti bainco? ken casta met kenca, sicanto ti cas la maysa cadagiti maag iti Israel. Ita ngarud siac, agdawatac kenca, nga makisaoca coma iti ari; ta isu dinacto ipaidam kenca.

¹⁴ Nupay casta isu dina impangag ti timecna, ngem idinto a napigpigsa ngem isu, isu pinilitna, ket nakicaidda kencuana.

¹⁵ Idin ni Amnon ginurana ni Tamar iti dackel unay a pananggura; a ti pananggurana kencuana dacdackel ngem iti panangayatna kencuana. Ket ni Amnon kinunana kencuana, Tumacderca, incan.

¹⁶ Ket isu kinunana kencuana, Saan a casta, ta daytoy dackel a ranggas a maisaad caniac isu ti dacdakes ngem iti sabali nga inaramidmo caniac. Ngem isu dina impangag.

¹⁷ Idin inayabanna di tagabuna, a nagservi kencuana, ket kinunana, Ipanawmo ita caniac daytoy a babai ket balunetam ti ruangan iti licudanna.

¹⁸ Ket isu nagcawes iti maysa a pagan-anay a nadumaduma ti colorna; ta dagiti annac a babbai a virgen cadagiti ar-ari agcawesda idi cadagiti casta a cawcawes. Idin ti tagabuna isu ti inruarna, ket binalunetanna ti ruangan iti licudanna.

¹⁹ Ket ni Tamar nangicabil cadagiti dapdapo iti rabaw ti olona, ket rinay-abna daydi pagan-anayna a nadumaduma ti colorna a pinagcawesna; ket impatayna ti imana iti olona, ket napan iti dalanna, nga agsangsangit iti natbag a magmagna.

²⁰ Ket ni Absalom a cabsatna kinunana kencuana, Nakinaed kenca ni cabsatmo nga Amnon? Ngem ita agtalnaca, cabsatco: isu cabsatmo; dica coma ipapuso daytoy a panggep. Ket ni Tamar nabati a saan a naicascaso idiay balay ni cabsatna nga Absalom.

²¹ Ngem idi a ni ari David natimudna amin dagitoy a banag, nagpungtot unay.

²² Ket ni Absalom saan a nagsao iti naimbag wenno dakes ken ni Amnon; ta ni Absalom ginurana ni Amnon, agsipud ta pinilitna ni cabsatna a Tamar.

²³ Ket naaramid iti, calpasan ti panagturpos ti dua a tawen a ni Absalom ad-daan idi cadagiti pagpucpukisen cadagiti carnero idiay Baalhasor, nga adda iti abay ti Efraim: ket ni Absalom inawisna dagiti isu-amin nga annac a lallaki ti ari.

²⁴ Ket ni Absalom immay iti ari, ket kinunana, Adtoy ita, ti adipenmo addaan cadagiti pagpucpukisen cadagiti carnero, agdawatac nga umay coma cumuyog ti ari ken dagiti ad-adipenna iti adipenmo.

²⁵ Ket ti ari kinunana ken Absalom, Saan, anacco, dicami umay amin, tapno saancami coma a macaalimuteng kenca. Ket isu immud-od kencuana: nupay casta isu dina kinayat ti napan, ngem isu binendicionanna.

²⁶ Idin kinuna ni Absalom, No saan, agdawatac kenca, a palubosam a cumuyog coma cadacami ni cabsatco nga Amnon. Ket ti ari kinunana kencuana, Apayapay nga isu cumuyog coma kenca?

²⁷ Ngem ni Absalom immudud kencuana ket isu pinalubosanna, ni Amnon, ken amin dagiti annac a lallaki ti ari a kimmuyog kencuana.

²⁸ Ket ni Absalom binilinna dagiti tagabuna, a kinunana, Siputanyo ita, inton ti puso ni Amnon addan a siraragsac iti arac; ken intono cunaec cadacayo, Cabilenyo ni Amnon, isu patayenyon; dicayo agbuteng; ta saan a siac aya ti agbilin cadacayo? Umingelcayo ket tumuredcayo.

²⁹ Ket dagiti tagabu ni Absalom inaramidda ken ni Amnon ti cas imbilin ni Absalom. Idin isu-amin dagiti annac ti ari timmacderda ket tunggal lalaki simmacay iti mulona, ket nagtalaw.

³⁰ Ket naaramid iti bayat nga isuda addada pay laeng iti dalan, a dagiti damdamag immayda ken David, a nacuna, Ni Absalom pinapatayna amin dagiti annac ti ari, ket awan ti uray no maysa a natda cadacuada.

³¹ Idin ti ari timmacder, ket pinigisna dagiti cawesna, ket nagpasag iti daga; ket isu-amin dagiti adipenna agtatacderda iti sibayna a dagiti cawcawesda napisangpisangda.

³² Ket ni Jonadab, nga anac ni Simea, a cabsat ni David simmungbat, ket kinunana, Saan coma nga atapen ni apoc, a pinapatayda amin dagiti bumbumaro nga annac ti ari; ta ni laeng Amnon ti natay: ta iti panangikeddeng ni Absalom daytoy naipato nanipud pay idi aldaw a ni Amnon pinilitna ni Tamar a cabsatna.

³³ Gapuna ita a saan coma nga ipapuso ni apoc nga ari daytoy a banag, iti panangpanunotna nga isu-amin dagiti annac ti ari napapatayda; ta ni laeng Amnon ti natay.

³⁴ Ngem ni Absalom nagtalaw. Ket idi a ti lalaki nga agbanbantay intangadna dagiti matana, ket kimmita, ket, adtoy, adu a tattao sumungadda idi iti dalan iti licudanna iti bacras ti turod.

³⁵ Ket ni Jonadab kinunana iti ari, Adtoy, dagiti annac ti ari sumungadda; ta cas kinuna ti adipenmo, casta a pudno.

³⁶ Ket naaramid, nga idi apaman a nalpasna ti nagsao, nga, adtoy, dagiti annac ti ari immayda, ket impigsada ti timecda, ket nagsangitda: ken casta met ti ari ken isu-amin dagiti ad-adipenna nagsangitda a sililiday unay.

³⁷ Ngem ni Absalom nagtalaw, ket napan ken Talmai nga anac ni Ammiud, nga ari ti Gessur. Ket ni David nagsangit iti tunggal aldaw a gapu idi anacna.

³⁸ Iti casta ni Absalom nagtalaw, ket napan idiay Gessur, ket nagyan idiay iti tallo a tawen.

³⁹ Ket ti cararua ni ari David kinalicagumanna ti mapan ken Absalom: ta isu naliwliwaan iti maipapan ken ni Amnon, idinto nga isu natayen.