2 Samuel 11 - Ti Biblia (1973)

Ti pannacalacub ti Rabba. Ti basol ni David a maicaniwas ken Urias. Ti ipapatay ni Urias, ken ti panangasawa ni David ken ni Batseba.

¹ Ket naaramid idi iti panagsucat ti tawen, idi tiempo, a dagiti ar-ari rumuarda iti gubat, a ni David imbaonna ni Joab, ken dagiti ad-adipenna a caduana, ken isu-amin nga Israel; ket dinadaelda dagiti annac ni Ammon, ket linacubda ti Rabba. Ngem ni David nagbati idiay Jerusalem.

² Ket naaramid iti malem, nga idi a ni David bimmangon iti iddana, ket nagnagna iti pangatepan ti balay ti ari: ket nanipud iti pangatepan nakitana ti maysa a babai nga agdigdigus; ket ti babai naimnas unay ti langana.

³ Ket ni David nagbaon ket nagsaludsod a gapu iti daydi a babai. Ket maysa ti nagcuna, Daytoy saan aya a ni Bat-seba, nga anac a babai ni Eliam, nga asawa ni Uria a Jetteo?

⁴ Ket ni David nangibaon cadagiti babaonen, ket isu innalana; ket di babai simrec iti yanna, ket ni David nakicaidda kencuana (ta di babai nadalusanen iti kinarugitna); ket isu nagsubli iti balayna.

⁵ Ket ti babai nagsicug; ket nagbaon, ket imbagana ken David, ket kinunana, Siac masicugac.

⁶ Ket ni David nagbaon ken ni Joab, a kinunana, Ibaonmo caniac ni Uria a Jetteo. Ket ni Joab imbaonna ni Uria ken David.

⁷ Ket idi a ni Uria immay kencuana, ni David nagsaludsod kencuana no casano ti inaramid ni Joab, ken no casano ti pannagna dagiti tattao, ken no casano ti irarang-ay ti gubat.

⁸ Ket ni David kinunana ken Uria, Sumalogca iti balaymo, ket buggoam dagita sacsacam. Ket ni Uria rimmuar idiay balay ti ari, ket simmurot kencuana ti sagut a canen a naggapu iti ari.

⁹ Ngem ni Uria naturog iti ruangan ti balay ti ari a caduana dagiti amin nga ad-adipen ni apona, ket saan a simmalog iti balayna.

¹⁰ Ket idi nga imbagada ken David, a kinunada, Ni Uria saan a simmalog idiay balayna. Ni David kinunana ken Uria, Saanca a naggapu iti maysa a pannagna? apayapay ngarud a dica sumalog iti balaymo?

¹¹ Ket ni Uria kinunana ken David, Ti lacasa, ken ti Israel, ken ti Juda, agnaedda cadagiti calcalapaw, ket ni apoc a Joab, ken dagiti ad-adipen ni apoc naipacarsoda iti napanayag nga away; ket siac ngarud sumrecacto iti balayco, tapno manganac ken uminumac, ken tapno makicaiddaac ken asawac? cas sibibiagca, ken cas sibibiag ta cararuam, siac diacto aramiden daytoy a banag.

¹² Ket ni David kinunana ken Uria, Agtactacca pay ditoy iti daytoy nga aldaw, ket intono bigat palubusancanto a pumanaw. Iti casta ni Uria nagbati idiay Jerusalem iti daydi nga aldaw, ken iti sumaganad nga aldaw.

¹³ Ket idin a ni David naayabanna, isu pinacanna ken pinainumna iti sangona; ket isu binartecna: ket iti malem rimmuar nga agidda iti iddana a caduana dagiti ad-adipen ni apona, ngem saan a simmalog iti balayna.

¹⁴ Ket naaramid iti bigat, a ni David nangsurat iti maysa a surat ken ni Joab, ket isu ti imbaonna iti ima ni Uria.

¹⁵ Ket insuratna idi surat, a kinunana, Isaadmo ni Uria iti sango ti nainget a gubat, ket panawanyo tapno isu macabil coma, ket matay.

¹⁶ Ket naaramid idi, nga idinto a ni Joab pinabantayanna ti ili, nga isu insaadna ni Uria iti disso a pagaammona a yan idi dagidi mamaingel a lallaki.

¹⁷ Ket dagiti lallaki ti ili rimmuarda, ket nakigubatda ken Joab: ket dagiti dadduma cadagiti tattao napasagda, cadagiti ad-adipen met laeng ni David; ket ni Uria a Jetteo natay met.

¹⁸ Idin ni Joab nagbaon ket imbagana ken David dagiti isu-amin a banag a maipanggep iti gubat.

¹⁹ Ket imbilinna idi naibaon, a kinunana, Intono magibusam nga ibaga dagiti amin a banag a maipanggep iti gubatan.

²⁰ Isunto a no ti lucsaw ti ari bumara, ket cunaennanto kenca, Apayapay nga immasidegcayo unay iti ili a nakigubat? dicayo ammo aya nga agpanada manipud iti bacud?

²¹ Siasino ti nangcabil ken Abimelec nga anac ni Jerubaal? saan aya a nangitupac di maysa a babai nanipud iti bacud iti maysa nga akinngato a bato ti gilingan, iti casta isu natay idiay Tebes? apayapay a dimmanoncayo iti bacud? ngem cunaemtomet, Ni adipenmo nga Uria a Jetteo natay.

²² Iti casta ti naibaon napan, ket immay ket impamatmatna ken David ti isu-amin a nangibaonan ni Joab kencuana.

²³ Ket ti naibaon kinunana ken David, Dagiti lallaki nangatiwda a maibusor cadacami, ket rimmuarda cadacami iti away, ket dacami inatiwmi ida met laeng agingga iti pagsercan ti ruangan.

²⁴ Ket dagiti panaan nagpanada cadagiti adipenmo nanipud iti bacud; ket natay dagiti dadduma cadagiti adipen ti ari, ket natay met ni adipenmo nga Uria a Jetteo.

²⁵ Ket ni David kinunana idi naibaon, Castoy ti cunaemto ken Joab, Dica coma palubosan a daytoy a banag paglidayennaca, ta ti campilan mamucaw iti maysa a cas iti sabali; papigsaem ti pananggubatmo a maibusor iti ili, ket isu rebbaem: ket umingelca kencuana.

²⁶ Ket idi a ti asawa ni Uria nangngegna a ni Uria nga asawana natay, nagdung-aw a gapu ken asawana.

²⁷ Ket idi nalpas ti dung-aw, ni David nagbaon ket isu innalana nga inyeg iti balayna, ket isu nagbalin nga asawana, ket nangipasngay kencuana iti maysa nga anac a lalaki. Ngem ti banag nga inaramid ni David pinagrurodna ni Jehova.