2 Samuel 10 - Ti Biblia (1973)

Ti ibaon ni David a maipaay ken Hanon, ngem ni Hanon umsienna dagiti adipenna. Ni David parmekenna ti Ammon ken Siria a sangcacanunong.

¹ Iti calpasan daytoy naaramid a ti ari dagiti annac ni Ammon natay, ket ni Hanon nga anacna nagari iti saadna.

² Ket ni David kinunana, Iparangconto iti caasi ken ni Hanon nga anac ni Naas, a cas la ni amana imparangna caniac ti caasi. Iti casta ni David imbaonna dagiti ad-adipenna a mangliwliwa kencuana a maipanggep ken ni amana. Ket dagiti ad-adipen ni David napanda iti daga dagiti annac ni Ammon.

³ Ngem dagiti pangoloen dagiti annac ni Ammon kinunada ken Hanon nga apoda, Pagarupem a ni David padayawanna ni amam, iti panangibaonna cadagiti mangliwliwa kenca? saan aya nga ni David imbaonna kenca, dagiti ad-adipenna a mangsukimat iti ili, ken mangsiim, tapno rebbaenna?

⁴ Idin ni Hanon innalana dagiti ad-adipen ni David, ket kiniskisanna ti caguddua ti imingda, ket pinutedna dagiti cawcawesda a ginudua, iti padingpadingda met laeng, ket pinagawidna ida.

⁵ Idinto nga imbagada ken David, isu nagbaon ti nangsabet cadacuada; agsipud ta dagiti lallaki naibabainda iti casta unay. Ket ti ari kinunana, Agtactaccayo idiay Jerico agingga iti tumubo dagita imingyo, ket calpasanna agawidcayto.

⁶ Ket idi a nakita dagiti annac ni Ammon nga isuda nagbalinda a nacarurod ken David, dagiti annac ni Ammon nagbaonda ken nanangdanda cadagiti Sirios idiay Rehob, ken cadagiti Sirios idiay Soba, a duapulo a ribu a lallaki a magmagna, ken iti ari ti Maaca agraman sangaribu a tattaona, ken dagiti lallaki a taga Is-tob a sangapulo ket dua a ribu a lallaki.

⁷ Ket idi a nangngeg ni David, imbaonna ni Joab, ken amin a buyot dagiti mamaingel a lallaki.

⁸ Ket dagiti annac ni Ammon rimmuarda, ket inornosda ti gubat iti pagsercan ti ruangan: ket dagiti Sirios a taga Soba ken taga Roob, ken dagiti lallaki ti Is-tob ken Maaca, addada idi a sangsangcatipon idiay away.

⁹ Idinto ngarud a ni Joab nakitana a ti gubat naisaaden a maibusor kencuana iti sango ken licudanna, nangpili cadagiti napili a lallaki ti Israel, ket inornosna ida a maibusor cadagiti Sirios:

¹⁰ Ket ti natda cadagiti tattao inyawatna iti ima ni Abisai a cabsatna; ket inornosna ida a maibusor cadagiti annac ni Ammon.

¹¹ Ket kinunana, No dagiti Sirios napigsadanto unay caniac, sica tulongannacto ngarud; ngem no dagiti annac ni Ammon napigsadanto unay kenca ngarud umayacto ket tulonganca.

¹² Umingelca a naimbag, ket aglallakita a maipaay iti ilitayo, ken maipaay cadagiti il-ili ti Diostayo: ket ni Jehova aramidenna coma daydiay a pagarupenna a naimbag.

¹³ Idin da Joab ken dagiti tattao nga adda idi kencuana rimmangepda iti gubat a maibusor cadagiti Sirios: ngem nagtalawda iti sangona.

¹⁴ Ket idi a dagiti annac ni Ammon nakitada a dagiti Sirios napagtalawda, nagtalawda met iti sango ni Abisai, ket simrecda iti ili. Idin ni Joab nagsubli a naggapu cadagiti annac ni Ammon, ket immay iti Jerusalem.

¹⁵ Ket idi a dagiti Sirios nakitada nga isuda naicabilda iti dacdakes iti sango ti Israel naguornongda a nagtitipon.

¹⁶ Ket ni Adadezer nagbaon, ket innalana dagiti Sirios nga addada idi iti ballasiw ti Carayan: ket isuda immayda idiay Helam, agraman ni Sobac a capitan ti buyot ni Adadezer iti unada.

¹⁷ Ket naibaga ken David: ket inurnongna amin nga Israel, ket bimmallasiw iti Jordan, ket immay iti Helam. Ket dagiti Sirios naguornongda a maibusor ken David, ket nakigubatda kencuana.

¹⁸ Ket dagiti Sirios nagtalawda iti sango ti Israel; ket ni David nangpapatay cadagiti Siros dagiti lallaki ti pito gasut a luglugan, ken upat a pulo ribu a tattao a nagcacabayo, ket kinabilna ni Sobach a capitan ti buyotda, ket iti casta natay sadiay.

¹⁹ Ket idi a dagiti isu-amin nga ar-ari nga ad-adipen idi ni Adadezer nakitada nga isuda naisaadda iti dacdakes iti sango ti Israel, nakicappiada iti Israel, ket nagservida cadacuada. Iti casta uray caano dagiti Sirios nagbutengdan a nangtulong cadagiti annac ni Ammon.