2 Pedro 3 - Ti Biblia (1973)

Ti iyaay ti Apo.

¹ Daytoy itan ti maicadua a surat, ay-ayatec, nga isuratco cadacayo; ket cadacuada a dua agpadpada, parayrayec ti nakemyo a nadalus babaen ti panangipalpalagip cadacayo.

² Tapno malagipyo coma dagidi sasao nga imbalicas idi dagidi sasanto a mammadto; ken daydi bilin ti Apo ken Manangisalacan babaen cadagiti apostolyo:

³ Nga ammoyo daytoy nga umuna: cadagiti camaudianan nga al-aldaw umaydanto dagiti managuyuyaw agraman pananguy-uyong, a magnada cas mayannurot cadagiti derrepda met laeng,

⁴ Ket cuncunada: Sadino ti yan ti pannacaicari ti iyaayna? ta nanipud idi naturog dagiti amma, dagiti isu-amin a banbanag agtultuloyda a cas met la idi punganay ti pannacaparsua.

⁵ Ta gagaraenda a lipatan daytoy: nga adda langlangit manipud idi punganay ken maysa a daga a napaltuad iti tengnga ti danum, ken babaen ti pannacaaramat ti danum gapu iti sao ti Dios;

⁶ Ket gapu itoy daydi lubong nga immuna, idinto a natinep ti danum; napucaw.

⁷ Ngem dagiti langlangit ita ken ti daga, gapu iti daydi met la a sao naidulinda a maipaay iti apuy a maay-wananda nga agingga iti aldaw ti pannacaocom ken ti pannacapucaw dagiti tattao a nadangkes.

⁸ Ngem dicay lipatan ay-ayaten, daytoy banag a maisup-supadi, a ti maymaysa nga aldaw iti Apo cas la sangaribo a tao-en, ket ti sangaribo a tao-en cas la maymaysa nga aldaw.

⁹ Saan a namayamay ti Apo a maipapan iti carina, cas iti panangibilang dagiti dadduma iti kinabayag; no di ket agur-uray a siaanus gapu cadatayo a dina cayat a mapucaw ti uray siasino, no di ket agturongda coma amin iti panagbabawi.

¹⁰ Ngem ti aldaw ti Apo umayto a cas la mannanacaw, aldaw a dagiti langlangit aglabasdanto a buyugen ti dackel a daranudor, ket dagiti elelemento mawarawaradanto babaen a sumsumged a pudot; ti met daga ken dagiti ar-aramid nga addada kencuana mauramdanto.

¹¹ Idinto a casta a dagitoy a banbanag isuda amin marunawdanto iti castoy, ania a kita dagiti tattao ti pagbalinanyo coma, iti amin a kita ti nasantoan a panagbiag ken kinasingpet,

¹² Nga ur-urayenyo ket tartarigagayanyo ti yaay daydiay aldaw ti Dios, a dagiti langlangit, idinto a sumsumgedda, maburburacdanto, ket dagiti elelemento matunawdanto iti sumsumged a pudot?

¹³ Ngem cas mayannurot iti carina, datayo urayentayo dagiti babbaro a langlangit ken ti maysa a daga a baro, isuda a pagtaengan ti kinalinteg.

¹⁴ Gapuna ay-ayaten, yantangay ur-urayenyo dagitoy a banag, agawaanyo tapno masaracancay coma a sitatalna, nga awan ti tulaw, ket awan ti pacapilawanyo iti sangoananna.

¹⁵ Ket ibilangyo a ti atiddug a panangitured ni Apotayo isu ti pacaisalacanan; a cas met insurat cadacayo ni ay-ayatentayo a cabsat a Pablo, cas mayannurot iti sirib a naited kencuana:

¹⁶ A cas met ti cunana cadagiti isu-amin a sursuratna, no sao-enna cadagidiay a sursurat dagitoy a banbanag: cadagiti naisao a sursurat adda dadduma a banag a narigat nga awaten, a dagiti awan ti ammoda ken dagiti di natalged kilkil-loenda, a cas met cadagiti sabali a Sursurat, a maipaay iti pacadadaelanda met laeng.

¹⁷ Dacay ngarud, ay-ayaten, yantangay ammoyo dagitoy a banbanag a naipacpacauna, agaluadcayo, di la ket ta maicanunongcayo iti pannacaallilaw dagiti managdacdakes ket mapasagcayo iti kinatibkeryo met laeng.

¹⁸ No saan ket a rumang-aycayo coma iti gracia ken iti panangammo ken Apotayo ken Manangisalacan a Jesu-Cristo. Kencuana maited coma ti panagdaydayaw ita ken iti agnanayon. Amen.