2 Pedro 2 - Ti Biblia (1973)

Dagiti saan a pudno a mammadto ken mannursuro.

¹ Ngem adda pay idi dagiti saan a pudno a mammadto iti tengnga dagiti umili, a cas met ti caaddanto dagiti saan a pudno a mannursuro iti tengngayo, isuda a mangiserrecto a sililimed cadagiti nakillo ken macadadael a pammati, ket paglicudandanto uray ti Apo a nanubbot cadacuada, ket icuyogda met laeng cadacuada ti napardas a pannacapucawda.

² Ket adunto dagiti sumurot cadagiti naderrep nga ar-aramidda, ket gapu cadacuada ti dana ti kinapudno matabaawanto.

³ Ket iti inaagum, ken cadagiti sasao a macaallilaw; pagbalinendacayto a pagsapulan; ti pannacaocom dagita naicasigudan ken di-agtactac, ket ti pannacadadaelda saan a matmaturog.

⁴ Ta no ti Dios saanna a pinacawan dagiti angel idi nagbasolda: no di ket ingarangogongna ida idiay infierno ket, impupocna ida cadagiti mangliwengliweng a sipnget, a maaywananda tapno maocomdanto;

⁵ Ket no saanna a pinacawan day di cadaanan a lubong, ngem ingagana ni Noe a nangicascasaba iti kinalinteg, agraman cadagiti pito a sabsabali idi pinaglayusna iti lubong dagiti managdacdakes;

⁶ Ket no pinagbalinna a dapdapo dagiti ciudad ti Sodoma ken Gomorra, ket dinusana ida a dinuprac, a pinagbalinna ida a pagbutbutngan dagiti agbiagto a di agraem iti Dios:

⁷ Ket insalacanna ni nalinteg a Lot, a silaladingit unay gapu iti panagbiag a dinederrep dagiti managdacdackes.

⁸ (Ta daydiay tao a nalinteg a makipagyan idi cadacuada, iti panagkitkita ken panagdengngegna, nagliday ti nalinteg a cararuana iti inaldawaldaw maipoon cadagiti nakil-lo nga ar-aramidda):

⁹ Ti Apo ammona nga isalacan dagiti nasingpet iti pannacasulisogda ken aywanan dagiti managdacdakes a maipaay iti pannacadusa, iti aldaw ti pannacaocom;

¹⁰ Ngem nangnangrona dagiti magmagna a mayannurot iti lasag, iti dakes a tarigagay ti kinarimon, ket umsienda ti turay. Isuda dagiti natured, nacaro, a dida agpigerger nga agbasawang cadagiti nadaeg nga agturay:

¹¹ Idinto a dagiti angel, uray pay dacdackelda iti cabaelan ken pannacabalin dida nabassawang iti panagipato a macadadael cadacuada iti sango ti Apo.

¹² Ngem dagitoy a cas la parparsua nga awan nakemda, nayanacda a linalasag tapno matiliw ket madadaelda, agbassawangda a maibusor cadagiti banbanag a dida maawatan, ket iti panagdadaelda mapucawdanto a di agcurang.

¹³ A sagabaenda ti supapac ti panagaramidda iti dakes; tattao nga ibilangda a ragsac ti magmagna cadagiti kinadakes iti aldaw, isuda dagiti rucruker ken rimon, nga agragragsacda cadagiti panangallilawda, no madamada a makiramrambac cadacayo.

¹⁴ A dagiti matada napnoda ti pannakicamcamalala, ket dida mabalin a panawan ti basol; a sulbogenda dagiti carcararua a di natalged; nga adda maysa a pusoda nairuam iti kinaagum; annac ti lunod;

¹⁵ Idinto a binaybay-anda ti dalan a nalinteg, nayawawanda, a sinurotda ti dalan ni Balaam, nga anac ni Beor, isu a nagayat iti gonggona iti panagaramidna ti dakes;

¹⁶ Ngem natubngar maipoon iti pannacabasolna: maysa nga asno nga umel, nagsao iti timec ti tao ket tinipedna ti kinamauyong daydi mammadto.

¹⁷ Dagitoy ububbogda nga awanan danum, ululep nga itayab ti maysa a bagio; cadacuada maisagana ti kinangisit dagiti sipnget.

¹⁸ Ta balicsenda dagiti napalangguad a sasao ti panagpasindayaw, sulbogenda babaen cadagiti tartarigagay a linalasag nga aramatenda ti derrep, dagiti nganngani macalapsut, cadagiti agbibiag iti pannacaallilaw:

¹⁹ Nga icarianda ida ti panagwayawaya idinto nga isuda met laeng tagabu ida ti kinarugit, ta no siasino ti pacaabacan ti maysa a tao isu met ti mangtagabu kencuana.

²⁰ Ta no iti calpasan ti pannacalapsutda cadagiti pacarugitan ti lubong gapu iti pannacaammoda ken Apo ken Manangisalacan a Jesu-Cristo, masiloanda manen cadacuada ken maabacda, nagbalin a dacdakes ti maudi a casasaadda ngem ti immuna.

²¹ Ta nasaysayaat coma cadacuada no dida naammoan ti dalan ti kinalinteg, ngem iti calpasan ti pannacaammoda kencuana naglicudanda ti nasantoan a bilin a naited cadacuada.

²² Ti napasamac cadacuada daydi pudno a masasao: “Nagsubli manen ti aso iti sarruana, ken ti tacong a nabuggoan, nagsubli nga agtultulid iti lugnac.”