2 Cronicas 4 - Ti Biblia (1973)

Ti altar, sinucog a baybay, vaca, candelero, ken dadduma pay nga al-alicamen ti templo.

¹ Maysa pay inaramidna ti maysa nga altar a gambang, a duapulo a sico ti caatiddugna, ken duapulo a sico ti caacabana, ken sangapulo a sico ti cangatona.

² Casta met inaramidna ti baybay a sinucog a sangapulo a sico iti ngarab ken ngarab, a nagbucbukel ti panaglicmutna, ket ti kinatayagna lima a sico; ket maysa a tinali a tallopulo a sico ti nailawlaw iti agliclicmut.

³ Ket iti sirocna adda ti caasping dagiti vacvaca, a nailawlaw iti aglicmut, iti sangapulo a sico, a paglawlawan ti baybay iti aglicmut. Dagiti sinan-vaca dua caintarda, a naisucog idi a ti baybay nasucog.

⁴ Isu nagbatay cadagiti sangapulo ket dua a sinan-vaca, dagiti tallo simmangoda iti amianan, ket dagiti tallo simmangoda iti laud, ket dagiti tallo simmangoda iti abagatan, ket dagiti tallo simmangoda iti daya; ket ti baybay naisaad iti rabawda, ket amin a paspasetda a camaudi addada iti uneg.

⁵ Ket sangadangan ti capuscolna; ket ti ngarabna naaramid a cas iti ngarab ti maysa a tagayan, a cas sabong ti maysa a lirio: no punoen laonenna idi ti tallo ribu a bat.

⁶ Inaramidna met dagiti sangapulo a bacca, ket incabilna lima iti macanawan, ken lima iti macatigid, tapno pagbuggoan ida; dagiti casta a banbanag a naaramat iti daton a mapuuran, naibuggoda cadagidiay; ngem ti baybay nagbuggoan dagiti papadi.

⁷ Ket inaramidna dagiti sangapulo a candelero a balitoc a mayannurot iti alagaden a maipapan cadacuada; ket incabilna ida iti templo, lima iti macanawan ken lima iti macatigid.

⁸ Inaramidna met ti sangapulo a lamisaan, ket incabilna ida iti templo, lima iti bangir a macanawan ken lima iti macatigid. Ket inaramidna met dagiti sangagasut a palangana a balitoc.

⁹ Casta met inaramidna ti paraangan dagiti papadi, ken ti dackel a paraangan, ken dagiti ruruangan a maipaay iti paraangan, ket kinalupcupanna dagiti ruanganda iti gambang.

¹⁰ Ket insaadna ti baybay iti akincanawan a bangir ti balay iti daya, nga agpaabagatan.

¹¹ Ket ni Huram inaramidna dagiti banga, ken dagiti soplad, ken dagiti palangana. Casta ti panangleppas ni Huram ti aramid nga inaramidna a maipaay ken ari Salomon iti balay ti Dios:

¹² Dagiti dua a monmon, ken dagiti malocong, ken dagiti dua a paratoc nga addada idi iti toctoc dagiti monmon, ken dagiti dua nga aramid nga iniket a pangabbong cadagiti dua a malocong dagiti paratoc, nga adda idi iti toctoc dagiti monmon,

¹³ Ken dagiti uppat a gasut a granada a maipaay cadagiti dua nga aramid nga iniket; dua cabatog a granada maipaay iti tunggal aramid nga iniket, a pangabbong cadagiti dua a malocong dagiti paratoc nga adda idi iti rabaw dagiti monmon.

¹⁴ Inaramidna met dagiti batay, ket dagiti bacca inaramidna iti rabaw dagiti batay;

¹⁵ Maysa a baybay ken sangapulo ket dua a sinan-vaca iti sirocna.

¹⁶ Dagiti banga met ken dagiti soplad, ken dagiti pagadaw iti lasag, ken amin nga al-alicamenna, inaramid ni Huram nga amana a gapu ken ari Salomon, a maipaay iti balay ni Jehova iti nasileng a gambang.

¹⁷ Iti tanap ti Jordan ti nagpasucugan cadacuada ti ari, iti daga a pila iti nagbaetan ti Socot ken Saredat.

¹⁸ Castoy ti panangaramid ni Salomon amin dagitoy nga al-alicamen a napalalo a kinaruay: ta ti dagsen ti gambang saan a nasukimat.

¹⁹ Ket ni Salomon inaramidna amin dagiti al-alicamen nga addada idi iti balay ti Dios, ti balitoc nga altar met, ken dagiti lamesaan a yan idi ti tinapay ti pamarang;

²⁰ Ken dagiti candelero agraman pagsilawanda, a sigagangat a mayannurot iti alagaden iti sango ti oraculo, a pulpulos a balitoc;

²¹ Ken dagiti sabsabong, ken dagiti pagpagsilawan, ken dagiti sipsipit a balitoc, ket dagita balitoc a nasudi unay;

²² Ken dagiti pangarsang, ken dagiti bacca, ken dagiti cuchara, ken dagiti pagiccan ti apuy, a pulpulos a balitoc. Ket no maipapan ti pagsercan iti balay, dagiti naun-uneg a ruangan a maipaay iti casasantoan a disso, ken dagiti ruangan ti balay, cayatna a sawen, ti templo, balitocda idi.