2 Cronicas 12 - Ti Biblia (1973)

Ti panangsillong ni Sisac. Ti Templo masamsam. Ipapatay ni Roboam.

¹ Ket naaramid idi a ti pagarian ni Roboam napatibkeren, ket isu nabileg idi, a binay-anna ti linteg ni Jehova, ken amin nga Israel a caduana.

² Ket naaramid iti maicalima a tawen ni ari Roboam, a ni Sisac nga ari ti Egipto simmang-at a maibusor iti Jerusalem, gaput ta nagsalungasingda iti maicaniwas ken Jehova,

³ A caduana ti sangaribu ket dua gasut a luglugan, ken innem a pulo a ribu a lallaki nga agcabayo. Ket saan a mabilang dagiti ta-tao nga immay a caduana a naggapu iti Egipto: dagiti Libios, dagiti Sukienos, ken dagiti Etiopes.

⁴ Ket innalana dagiti il-ili, a nasarikedkedan a cucua idi ti Juda, ket dimteng agingga iti Jerusalem.

⁵ Ngarud ni Semeias a mammadto napan ken Roboam, ken cadagiti pangpangoloen ti Juda, a naurnongda idiay Jerusalem a gapu ken Sisac, ket kinunana cadacuada, Castoy ti cuna ni Jehova, Dacayo binaybay-andac, gapuna siac met binaybay-ancayo iti ima ni Sisac.

⁶ Idin dagiti pangpangoloen ti Israel ken ti ari nagpacumbabada: ket kinunada, Ni Jehova isu ti nalinteg.

⁷ Ket idi ni Jehova nakitana nga isuda nagpacumbabada, ti sao ni Jehova immay ken Semeias, a kinunana, Nagpacumbabada, saanconton ida a dadaelen; no di ket itedconto cadacuada ti bassit a pannacaispal, ket ti pungtotco saanto a maibuyat iti Jerusalem gapu iti ima ni Sisac.

⁸ Nupay casta isudanto dagiti ad-adipenna, tapno maammoanda coma ti panagservic, ken ti panagservi dagiti pagpagarian dagiti dagdaga.

⁹ Iti casta ni Sisac nga ari ti Egipto simmang-at a maibusor iti Jerusalem, ket sinamsamna dagiti gamgameng ti balay ni Jehova, ken dagiti gamgameng ti balay ti ari; sinamsamna amin: innalana met dagiti calcalasag a balitoc nga inaramid idi ni Salomon.

¹⁰ Ket ni ari Roboam inaramidna a sunoda dagiti calcalasag a gambang, ket incumitna ida cadagiti im-ima dagiti capcapitan ti guardia, a nangaywan iti ruangan ti balay ti ari.

¹¹ Ket castoy, idi, a tunggal daras a ti ari simrec iti balay ni Jehova, ti guardia immay ket nangicuyog cadacuada, ket insublida ida iti siled ti guardia.

¹² Ket idi isu nagpacumbaba, ti pungtot ni Jehova naisiasi kencuana, tapno saanna a dadaelen nga ikisap: ken maysa pay sadi Juda nasaracan idi dagiti naimbag a banbanag.

¹³ Iti casta ni ari Roboam pinapigsana ti bagina sadi Jerusalem, ket nagari: ta ni Roboam agtawen idi iti uppat a pulo ket maysa idi nangrugi a nagari, ket nagari bayat iti sangapulo ket pito a tawen sadi Jerusalem, ti ili a pinili ni Jehova cadagiti amin a caputotan ti Israel, tapno icabilna ti naganna sadiay: ket ti nagan ni inana Naama nga Ammonita.

¹⁴ Ket inaramidna daydi a dakes, agsipud ta saanna nga impapuso ti nagsapul ken Jehova.

¹⁵ Ket dagiti ar-aramid ni Roboam, umuna ken maudi, saanda aya a naisurat cadagiti historia da Semeias a mammadto, ken ni Iddo a macakita iti masacbayan, a mayannurot cadagiti paglagipan dagiti capounan? Ket adda idi gubgubat a cancanayon da Jeroboam ken Roboam.

¹⁶ Ket ni Roboam nakiturog cadagiti ammana, ket naitabon iti ili ni David: ket ni Abias nga anacna nagari iti saadna.