2 Ar-ari 9 - Ti Biblia (1973)

Ti paidamag ni Eliseo ken Jehu. Ni Jehu napulotan nga agari iti Israel. Ti yaalsana a maibusor ken Joram; papatayenna da Joram ken Ocozias. Ni Jezabel mapapatay.

¹ Ket ni Eliseo a mammadto immayab iti maysa cadagiti annac dagiti mammadto, ket kinunana kencuana, Baricsam dagita lomom, ket iggamam daytoy frasquita ti lana, ket inca idiay Ramot-galaad.

² Ket intono dumtengca sadiay, birukem sadiay ni Jehu nga anac ni Josafat nga anac ni Nimsi, ket sumrecca, ket isu patacderem iti tengnga dagiti cacabsatna, ket isu ipanmo iti naununeg a siled.

³ Sacanto alaen ti frasquita ti lana, ket ibucbocmo iti rabaw ti olona, ket cunam, Castoy ti cuna ni Jehova, Siac pinulotanca nga ari iti Israel. Calpasanna luctam ti ruangan, ket agtalawca, ket dica agtactac.

⁴ Iti casta ti agtutubo a lalaki, a ti met laeng agtutubo a mammadto, napan idiay Ramot-galaad.

⁵ Ket idi a simrec, adtoy dagiti capcapitan ti buyot agtutugawda. Ket isu kinunana, O capitan, addaanac iti maysa a bilin kenca. Ket ni Jehu kinunana, Asino aya cadacami amin? Ket isu kinunana, Sica, O capitan.

⁶ Ket isu timmacder ket simrec iti balay: ket isu imbucbocna di lana iti olona, ket kinunana kencuana, Castoy ti cuna ni Jehova, a Dios ti Israel, Siac pinulotanca nga ari iti ili ni Jehova, iti Israel met laeng.

⁷ Ket cabilemto ti balay ni Acab nga apom, tapno maibalesco coma ti dara dagiti adipenco a mammadto, ken dagiti dara dagiti isu-amin nga ad-adipen ni Jehova, iti ima ni Jezabel.

⁸ Ta isu-amin a balay ni Acab mapucawto; ket keltayecto ken ni Acab ti tunggal ubing a lalaki, ken daydiay a naipupuc ken daydiay a nabati a siwawaya iti Israel.

⁹ Ket aramidecto ti balay ni Acab, a cas iti balay ni Jeroboam nga anac ni Nabat, ken cas iti balay ni Baasa nga anac ni Ahia.

¹⁰ Ket dagiti as-aso lamutendanto ni Jezabel idiay paset ti Jezreel, ket awanto ti mangitabon kencuana. Ket linuctanna di ruangan, ket pimmanaw.

¹¹ Idin ni Jehu rimmuar cadagiti ad-adipen ni apona: ket maysa ti nagcuna kencuana, Naimbag amin? Ania ti gapuna nga immay kenca daytoy mauyong a tao? Ket isu kinunana cadacuada, Dacayo ammoyo ti tao ken ti insaona.

¹² Ket isuda kinunada, Isu ulbod; ipalawagmo cadacami ita. Ket isu kinunana, Castoy ken castoy ti insaona caniac, a kinuna, Castoy ti kinuna ni Jehova, Siac pinulotanca nga ari iti Israel.

¹³ Idin nagdarasda, ket innalada ti tunggal maysa ti cawesna, ket incabilda ida iti babaenna iti rabaw ti agdan ket pinagunida ti tangguyob, a kinunada, Ni Jehu isu ti ari.

¹⁴ Iti casta ni Jehu nga anac ni Josafat nga anac ni Nimsi immalsa a maibusor ken ni Joram, (ket ni Joram ayaywananna idi ti Ramot-galaad, isu ken isu-amin nga Israel, a gapu ken ni Hazael nga ari ti Siria;

¹⁵ Ngem ni ari Joram naisubli idiay Jezreel tapno maagasan cadagiti sugsugatna a gapuanan idi dagiti Sirios kencuana, idi nakigubat ken ni Hazael nga ari ti Siria.) Ket ni Jehu kinunana, No daytoy isu ti nakemyo, awan ngarud ti uray siasino nga agtalaw ken rumuar iti ili, a mapan ken mangibaga idiay Jezreel.

¹⁶ Iti casta ni Jehu limmugan iti maysa a lugan, ket napan idiay Jezreel; ta ni Joram agididda idi idiay. Ket ni Ocozias nga ari ti Juda simmalog sadiay a cumita ken Joram.

¹⁷ Ket di wanawan agtactacder iti torre idiay Jezreel, ket nawanawananna di buyot ni Jehu idi a sumungad, ket kinunana, Siac makitac ti maysa a buyot. Ket ni Joram kinunana, Mangalaca iti maysa nga agcabayo, ket ibaonmo a mangsabet cadacuada, ket cunaenna coma, Adda talna?

¹⁸ Iti casta napan ti maysa a nagcabayo a nangsabet kencuana, ket kinunana, Castoy ti kinuna ti ari, Adda talna? Ket ni Jehu kinunana, Ania ti bibiangmo iti talna? Agsublica iti licudac. Ket ti wanawan imbagana, a kinunana, Ti naibaon dimteng cadacuada, ngem saan a simmubli.

¹⁹ Idin nagbaon iti maicadua a nagcabayo, a dimteng cadacuada, ket kinunana, Ti ari kinunana ti castoy, Adda talna? Ket ni Jehu simmungbat, Ania ti bibiangmo iti talna? Agsublica iti licudac.

²⁰ Ket di wanawan imbagana, a kinunana, Isu dimteng met cadacuada, ket saan a sumubli: ket ti panagpaguyodna cas la iti panagpaguyod ni Jehu, nga anac ni Nimsi; ta agpaguyod a cas la sipupungtot.

²¹ Ket ni Joram kinunana, Agsaganacayo. Ket insaganada di luganna. Ket ni Joram nga ari ti Israel ken ni Ocozias nga ari ti Juda rimmuarda, ti tunggal maysa iti luganna, ket rimmuarda a simmabet ken ni Jehu, ket isu nasaracda iti paset ni Nabot a Jezreelita.

²² Ket naaramid, idi a ni Joram nakitana ni Jehu, a kinunana, Jehu, adda talna? Ket simmungbat, Ania a talna, iti kinabayag a dagiti pannakiabig ni Jezabel nga inam ken dagiti panagbagbaglanna castada unay ti caruay?

²³ Ket ni Joram insublina di imana, ket nagtalaw; ket kinunana ken ni Ocozias, Adda liput, O Ocozias.

²⁴ Ket ni Jehu biniatna di ba-ina iti amin a pigsana, ket kinabilna ni Joram iti nagbaetan dagiti tackiagna, ket di pana simmalput iti pusona, ket napasag idi luganna.

²⁵ Idin kinuna ni Jehu ken ni Bidkar a capitanna, Alaem, ket isu ti ipurruacmo iti paset ti talon ni Nabot a Jezreelita; ta lagipem no casano nga, idi a siac ken sica nagluganta nga agpadpada a simmurot ket ni Acab nga amana, ni Jehova incabilna daytoy nga awit kencuana:

²⁶ Pudno unay a nakitac idi calman ti dara ni Nabot, ken ti dara dagiti annacna, cuna ni Jehova; ket supapacacto kenca iti daytoy a paset ti daga, cuna ni Jehova. Gapuna nga ita alaem ken isu ipurruacmo iti paset ti daga, a mayannurot iti sao ni Jehova.

²⁷ Ngem idi a ni Ocozias nga ari ti Juda nakitana daytoy, nagtalaw idi dalan ti balay ti minuyongan. Ket ni Jehu isu ti sinurotna, a kinunana, Isu ti cabilenyo met idiay lugan, ket isu ti kinabilda idiay sang-atan ti Gur, nga adda iti denna ti Ibleam. Ket isu nagtalaw agingga iti Megiddo, ket natay sadiay.

²⁸ Ket dagiti ad-adipenna isu impanda iti maysa a lugan idiay Jerusalem, ket isu intabonda iti tanemna a naidinna cadagiti ammana idiay ili ni David.

²⁹ Ket iti maicasangapulo ket maysa a tawen ni Joram nga anac ni Acab ni Ocozias nangrugi a nagari iti Juda.

³⁰ Ket idi a ni Jehu dimteng iti Jezreel, natimud ni Jezabel; ket pinintaanna dagiti matana, ket inarcosanna di olona, ket timman-aw idi tawa.

³¹ Ket idi a ni Jehu simrec idi ruangan, ni Jezabel kinunana, Adda talna, sica Zimri, a anamapatay ken ni apona?

³² Ket isu intangadna di rupana iti tawa, ket kinunana, Asino ti makicadua caniac? asino? Ket dua wenno tallo a tattao nga eunuco timman-awda kencuana.

³³ Ket isu kinunana, Isu ti itappuacyo: Iti casta isu intappuacda; ket dagiti dadduma a darana naiparsiacda iti diding, ken cadagiti cabcabayo: ket ni Jehu isu ti pinatalaytayanna.

³⁴ Ket idi a nacastrec, nangan ken imminum; ket kinunana, Taripatoenyo ita ti babai a nailunod, ket isu itabonyo; ta isu anac ti maysa nga ari.

³⁵ Ket napanda a mangitabon kencuana; ngem awan ti nasaracanda a pulos kencuana no di laeng ti bangabangana, ken dagiti sacana, ken dagiti daculap dagiti imana.

³⁶ Gapuna a simmublida, ket imbagada kencuana. Ket isu kinunana, Daytoy isu ti sao ni Jehova, nga insaona idi a naaramat ni adipenna nga Elias a Tisbita, a kinunana, Iti paset ti Jezreel dagiti as-aso lamutendanto ti lasag ni Jezabel:

³⁷ Ket ti bagi ni Jezabel isunto ti cas ibleng iti rabaw ti daga idiay paset ti Jezreel, iti casta a didanto saoen, Daytoy isu ni Jezabel.