2 Ar-ari 6 - Ti Biblia (1973)

Ni Eliseo pagtapawenna ti olo ti wasay. Dagiti Sirios sapulenda ni Eliseo ket macabilda iti kinabulsec. Dagiti Sirios lacubenda ti Samaria, ket dagiti Israelitas agsagabada iti nacaro a bisin.

¹ Dagiti annac dagiti mammadto kinunada ken ni Eliseo, Adtoy ita, ti lugar a pagnaedanmi iti sangoanam nailet cadacami.

² Agdawatcami kenca, palubosannacami coma a mapan, iti Jordan, ket mangalacami coma sadiay ti tunggal maysa iti maysa a troso, ket agaramidcami sadiay iti maysa a disso, a pagnaedanmi. Ket isu simmungbat, Incayo.

³ Ket kinuna di maysa, Agdawatcami kenca, maay-ayoca coma a cumuyog cadagiti ad-adipenmo. Ket isu simmungbat, Cumuyogacto.

⁴ Iti casta kimmuyog cadacuada. Ket idi a dimtengda iti Jordan, pinucanda di cayo.

⁵ Ngem idi a ti maysa tutuangenna ti maysa a troso, ti olo di wasay natnag iti danum; ket nagickis, ket kinunana, Ay apoc! gapu ta binulod.

⁶ Ket ti lalaki ti Dios kinunana, Sadino ti nacatnaganna? Ket isu impakitana kencuana ti disso. Ket isu nangputed iti maysa a ruting, ket isu ti impurruacna idiay, ket pinatapawna di landoc.

⁷ Ket isu kinunana kencuana, Isu alaem kenca. Iti casta isu inyunnatna di imana, ket isu ti innalana.

⁸ Ti ari ti Siria manggubat idi a maibusor iti Israel; ket immuman cadagiti ad-adipenna, a kinunana, Iti castoy ken castoy a disso ti pagpacarsoac.

⁹ Ket ti lalaki ti Dios nagbaon iti ari ti Israel, a kinunana, Agannadca a dica coma lumasat iti castoy a disso; ta dagiti Sirios agsalogda idiay.

¹⁰ Ket ti ari ti Israel nagbaon idiay a disso nga imbaga di lalaki ti Dios kencuana ken pinaisaganana; ket inyaluadda ti bagina met laeng sadiay, saan a maminsan laeng wenno namindua.

¹¹ Ket ti puso ti ari ti Siria nariribuc unay a gapu iti daytoy a banag: ket inayabanna dagiti ad-adipenna, ket kinunana cadacuada, Saanyonto nga ipalgac caniac, no siasino cadatayo ti agpaay iti ari ti Israel?

¹² Ket maysa cadagiti ad-adipenna kinunana, Awan O ari, nga apoc; no di ket ni mammadto nga Eliseo adda idiay Israel, isu ibagana iti ari ti Israel dagti sasao a saoem iti pagturogam.

¹³ Ket isu kinunana, Incayo ket kitaenyo no sadino ti yanna, tapno mangibaonac coma ket isu paalac. Ket naibaga kencuana, a nacuna, Adtoy, isu adda idiay Dotain.

¹⁴ Gapuna a nangibaon sadiay cadagiti cabcabayo, ken luglugan, ken maysa a dackel a buyot, nga immayda iti rabii, ket linacubda ti ili.

¹⁵ Ket idi a bimmangon a nasapa di tagabu ti lalaki ti Dios, ket rimmuar, adtoy, ti buyot agraman cabcabayo ken luglugan nailacubda iti ili. Ket di tagabuna kinunana kencuana, Ay, apoc! casanonto ti aramidentayo?

¹⁶ Ket isu simmungbat, Dica agbuteng: ta ad-aduda dagiti adda cadatayo ngem cadagiti adda cadacuada.

¹⁷ Ket ni Eliseo nagcararag, ket kinunana, Agdawatac kenca, O Jehova, a luctam coma dagiti matana, tapno makitana coma. Ket ni Jehova linuctanna dagiti mata di agtutubo a lalaki; ket kimmita: ket, adtoy, a di bantay a napno cadagiti cabcabayo, ken luglugan nga apuy iti aglicmut ken Eliseo.

¹⁸ Ket idi nga isuda simmalogda kencuana, ni Eliseo nagcararag ken ni Jehova, ket kinunana, Agdawatac kenca, a cabilem coma dagitoy a tattao iti panagbulsec. Ket kinabilna ida iti panagbulsec a mayalubog iti sao ni Eliseo.

¹⁹ Ket ni Eliseo kinunana cadacuada, Saan a daytoy ti dalan, saan a daytoy ti ili: sumurotcayo caniac, ket yegcayto iti lalaki a birukenyo. Ket indalanna ida agingga iti Samaria.

²⁰ Ket naaramid, idi a dimtengda iti Samaria, a ni Eliseo kinunana, Jehova, luctam dagiti matmata dagitoy a lallaki, tapno macakitada coma. Ket ni Jehova linuctanna dagiti matmatada, ket kimmitada; ket adtoy, nga isuda addada idi iti tengnga ti Samaria.

²¹ Ket ti ari ti Israel kinunana ken ni Eliseo, idi a nakitana ida, Cabilecto ida, amac? cabilecto ida?

²² Ket isu simmungbat, Dicanto cabilen ida: cabilem aya dagidiay nga innalam a kinayawan iti campilanmo ken iti ba-im? mangicabilca iti sangoda iti tinapay ken danum, tapno manganda ken uminumda coma, ken mapanda ken ni apoda.

²³ Ket isu nangisagana iti adu a canen a maipaay cadacuada; ket idi a nacacaanda ken nacainumda, pinapanawna ida, ket napanda ken ni apoda, ket dagiti buybuyot ti Siria saanda a simmublin iti daga ti Israel.

²⁴ Ket naaramid idi calpasan daytoy, a ni Ben-adad nga ari ti Siria inurnongna amin a buyotna, ket simmang-at ket linacubna ti Samaria.

²⁵ Ket adda idi dackel a bisin idiay Samaria: ket, adtoy, nga isu ti linacubda, inggana a ti maysa nga olo ti asno nalaco idi iti walopulo a capisi ti pirac, ket ti apagcapat ti maysa a cab ti lugit dagiti calapati iti lima capisi ti pirac.

²⁶ Ket idi a ti ari ti Israel limmabas a nagna iti rabaw ti bacud, maysa a babai pimmuccaw kencuana, a kinunana, Bumadangca, O ari, nga apoc.

²⁷ Ket isu kinunana, No saannaca a badangan ni Jehova, iti ania aya ti pangbadangac kenca? aggapu aya iti pagtaltagan, wenno aggapu iti pagpespesan ti uvas?

²⁸ Ket ti ari kinunana kencuana, Ania aya ti agcurang kenca? Ket isu simmungbat, Daytoy a babai kinunana caniac, Itedmo ta anacmo, tapno isu ti sidaenta coma iti daytoy nga aldaw, ket intono bigat sidaentanto ti anacco.

²⁹ Iti casta inangermi di anacco, ket isu ti sinidami: Iti sumuno nga aldaw kinunanac kencuana, Itedmo ta anacmo, tapno isu ti sidaenta coma: ket isu inlemmengna di anacna.

³⁰ Ket naaramid, idi a ti ari nangngegna dagidi sasao ti babai, nga isu pinigisna dagiti cawesna (ket naglasat idi a nagna iti rabaw ti bacud); ket dagiti tattao kimmitada, ket, adtoy, nga isu addaan idi iti nakersang a lupot iti uneg, iti rabaw ti lasagna.

³¹ Idin isu kinunana, Ti Dios aramidenna iti casta caniac, ken ad-adda pay met, no ti olo ni Eliseo nga anac ni Safat agtacderto kencuana iti daytoy nga aldaw.

³² Ket ni Eliseo adda idi a situtugaw idiay balayna, ket dagiti lallacay makicatcatugawda kencuana; ket di ari nangibaon iti maysa a lalaki a naggapu iti saclangna: ngem iti sacbay a di naibaon dimteng idi kencuana, isu kinunana cadagiti lallacay, Kitaenyo no casano a daytoy anac di nacapatay nagbaon nga agpaiccat iti oloc? kitaenyo, nga intono ti naibaon umay, rikepanyo ti ruangan, ket iggamanyo ti ruangan a maibusor kencuana saan aya nga agdanarudor dagiti sacsaca ni apona iti malicudanna?

³³ Ket iti bayat ti pannakisasaona pay laeng cadacuada, adtoy, di naibaon simmalog agingga kencuana: ket kinunana, Adtoy, a daytoy a rigat aggapu ken Jehova; apayapay nga agurayac coma gapu ken Jehova iti nabaybayag?