2 Ar-ari 4 - Ti Biblia (1973)

Ti yaadu ti lana ti babai a balo. Ni Eliseo ken ti babai a Sunamita; pagungarenna ti natay nga anac a lalaki ti Sunamita. Ti nasabidong a sida. Ti yaadu dagiti tintinapay ken mais.

¹ Ket maysa a babai cadagiti asawa dagiti annac dagiti mammadto immasug idi ken ni Eliseo, a kinunana, Ni adipenmo nga asawac natay: ket sica pagaammom a di adipenmo managbutbuteng idi ken ni Jehova: ket immay ti nacapautang tapno alaenna a maipaay kencuana dagiti dua nga annacco tapno isuda dagiti tagabu.

² Ket ni Eliseo kinunana kencuana, Anianto aya ti aramidec kenca? ipalawagmo caniac; ania ti adda kenca idiay balaymo? Ket isu kinunana, Ti adipenmo awanan iti aniaman iti balay, malacsid laeng ti sangadongdong a lana.

³ Ket isu kinunana kencuana, Inca, ket bumulodca cadagiti burnay iti ruar cadagiti caarrubam, burburnay nga awan nagyan, bumulodca iti nawadwad.

⁴ Ket sumreccanto, ket ripcamto ti ruangan kenca, ken cadagiti annacmo, ket ibucbocmo ti Lana isu-amin cadagidiay a burnay; ket ilasinmonto daydiay a napno.

⁵ Ket iti casta di babai pimmanaw kencuana, ket rinipcanna di ruangan kencuana ken cadagiti annacna; ket isuda inyegda kencuana dagiti burnay, ket isu nagibucbuc.

⁶ Ket naaramid, idi a dagiti burburnay napnoda, nga isu kinunana iti anacna, Yegandac pay iti dadduma a burnay. Ket isu kinunana kencuana, Awanen ti burnay. Ket ti lana nagpatingga.

⁷ Idin isu immay ket imbagana idi lalaki ti Dios, ket isu kinunana, Inca, ilacom ti lana, ket agbayadca iti utangmo, ket sica ken dagiti annacmo agbiagcayo iti matda.

⁸ Ket napasamac iti naminsan nga aldaw, a ni Eliseo immallatiw idiay Sunem, isu a yan ti maysa a babai a natan-oc, a nangipapilit kencuana a nangan iti tinapay. Ket casta idi, iti masansan nga ilalabasna, dumagas idiay a mangan iti tinapay.

⁹ Ket isu kinunana iti asawana a lalaki, Adtoy ita, a maawatac a daytoy, a cancanayon a dumagas iti balayta, isu ti maysa a nasantoan a lalaki ti Dios.

¹⁰ Agdawatac kenca, nga agaramidta coma iti sagumbi idiay diding, ket idiay mangicabilta coma ti maipaay kencuana iti idda, ken lamesaan, ken tugaw, ken candelero: ket castoyto, nga intono umay cadata, nga agdagasto idiay a lugar.

¹¹ Ket napasamac iti naminsan nga aldaw, nga immay sadiay, ket dimmagas iti sagumbi ket nagyan idiay.

¹² Ket kinunana ken Giezi a tagabuna, Ayabam daytoy a Sunamita. Ket idi nga isu inayabanna, di babai nagtacder iti saclangna.

¹³ Ket isu kinunana kencuana, Saoem ita kencuana, Adtoy, sica ti naaluad unay cadacami iti isu-amin daytoy a panagaluad; ania ti maaramidto nga agpaay kenca? cayatmo a sica maisaoca iti ari, wenno iti capitan ti buyot? Ket isu simmungbat, Siac agnaedac iti tengnga ti cailiac met laeng.

¹⁴ Ket isu kinunana, Anianto ngarud ti maaramid a maipaay kencuana? Ket ni Giezi simmungbat, Pudno nga isu awanan iti anac, ket ni asawana lacay.

¹⁵ Ket isu kinunana, Isu ayabam. Ket idi nga isu inayabanna, di babai nagtacder iti ruangan.

¹⁶ Ket isu kinunana, Iti daytoy a tiempo, intono ti tiempo agbaliw, umaracopcanto iti maysa nga anac a lalaki. Ket isu kinunana, Saan, apoc, sica ti lalaki ti Dios, dica agulbod iti adipenmo.

¹⁷ Ket di babai nagsicog, ken nangipasngay iti maysa nga anac a lalaki iti daydi a tiempo, idi a ti tiempo nagbaliw, cas kinunana ni Eliseo kencuana.

¹⁸ Ket idi a di ubing dimmackel, naaramid idi iti naminsan nga aldaw nga nakipagruar ken amana a mapan cadagiti agani.

¹⁹ Ket kinunana ken amana, Ti oloc, ti oloc. Ket isu kinunana iti adipen, Isu ipanmo ken inana.

²⁰ Ket idi nga isu innalana, ken inyegna ken ni inana, nagtugaw cadagiti tumtumengna inggana iti matoon, ket idin natay.

²¹ Ket isu immuli ket isu ti impaiddana iti rabaw ti idda ti lalaki ti Dios, ket rinepcanna, kencuana di ruangan, ket rimmuar.

²² Ket inayabanna ni asawana a lalaki, ket kinunana, Agdawatac kenca, nga ibaonmo coma caniac ti maysa cadagiti adipen, ken maysa cadagiti asno, tapno innac coma nga agtaray iti lalaki ti Dios, ket sumubliac manen.

²³ Ket isu kinunana, Ania ti gapuna nga incanto kencuana iti daytoy nga aldaw? saan a lutuad wenno aldaw ti panaginana. Ket isu kinunana, Naimbagto.

²⁴ Idin di babai sinillaanna di asno, ket kinunana iti adipenna, Agabugca, ket magnaca: ket dinac paginayaden iti panagsacsacayco, malacsid no ibilinco kenca.

²⁵ Iti casta napan, ket immay iti lalaki ti Dios idiay bantay Carmelo. Ket naaramid, idi a di lalaki ti Dios isu ti nakitana iti adayu, a kinunana idi tagabuna a Giezi, Adtoy, adda idiay ti Sunamita:

²⁶ Agdawatac kenca, tumarayca ita a sumabet kencuana, ket cunaem kencuana, Adda imbag kenca? adda imbag ken asawam? adda imbag iti ubing? Ket di babai simmungbat, Naimbag.

²⁷ Ket idi nga isu dimteng iti lalaki ti Dios idiay turod, kimpet cadagiti sacsacana. Ket ni Giezi immasideg a mangiccat kencuana: ngem ti lalaki ti Dios kinunana, Isu bay-am: ta ti cararuana isu naladingit unay iti unegna, ket ni Jehova inlimedna caniac, ket isu ti dina imbaga caniac.

²⁸ Idin di babai kinunana, Nagcalicagumac aya idi iti anac ken apoc? diac aya kinuna idi, Dinac ulboden?

²⁹ Idin kinunana ken ni Giezi, Baricsam dagita lomom, ket iggamam ti sarucodco, ket inca iti dalanmo: no macasaracca iti siasinoman a tao, dica agcablaaw coma kencuana; ket no uray asinoman ti agcablaaw coma kenca, isu dicanto sungbatan manen: ket ipaiddam ti sarucodco iti rabaw ti rupa ti ubing.

³⁰ Ket ti ina di ubing kinunana, Cas sibibiag ni Jehova, ken cas sibibiag ta cararuam, a dicanto panawan. Ket ni Eliseo timmacder, ket simmurot kencuana.

³¹ Ket ni Giezi napan idi unada, ket impaiddana di sarucod idi rabaw ti rupa di ubing; ngem awan idi ti timec, uray no panagdengngeg. Gapuna a nagsubli a simmabet ken ni Eliseo, ket imbagana kencuana, a kinuna, Ti ubing saan a nariing.

³² Ket idi a ni Eliseo dimteng iti balay, adtoy, di ubing adda a natay, ken naipaidda idi iddana.

³³ Gapuna a simrec, ket rinipcanna di ruangan cadacuada a dua, ket kimmararag ken ni Jehova.

³⁴ Ket immuli, ket nagpacleb iti rabaw ti ubing, insaadna di ngiwatna iti rabaw ti ngiwatna, ket dagiti matana iti rabaw dagiti matana, ket dagiti imana iti rabaw dagiti imana: ket nagunnat iti rabaw daydiay; ket ti lasag ti ubing pimmudot.

³⁵ Sana binaliwan, ket nagna iti naminsan iti balay sa nagsubli; ket immuli, ket immunnat iti rabawna: ket di ubing nagbaen iti naminpito a daras, ket ti ubing linuctanna dagiti matana.

³⁶ Ket inayabanna ni Giezi, ket kinunana, Ayabam daytay Sunamita. Iti casta isu ti inayabanna. Ket idi a di babai nayeg kencuana, isu kinunana kencuana, Alaem ti anacmo.

³⁷ Idin di babai simrec, nagpasag cadagiti sacana, ket nagrucnoy iti daga, ket innalana di anacna, ket rimmuar.

³⁸ Ket ni Eliseo immay manen iti Gilgal. Ket adda idi dackel a kirang iti daga; ket dagiti annac dagiti mammadto situtugawda idi iti sangona: ket kinunana idi tagabuna, Mangicabilca iti maysa a dongdong, ket manglutoca iti sidaen nga agpaay cadagiti annac dagiti mammadto.

³⁹ Ket rimmuar ti maysa a nagpaaway tapno mangurnong cadagiti natnateng, ket nacasarac iti lanut nga atap, ket nangurnong iti daydi cadagiti tabungaw nga atap a napno di sab-ocna, ket immay, ket pinispisina ida idi uneg ti dongdong ti sidaen: a dida nabigbig ida.

⁴⁰ Iti casta imbucbocda nga agpaay cadagiti lallaki a canenda. Ket naaramid, idi a manganda iti sidaen, imkisda, a kinunada, O lalaki ti Dios, adda patay iti uneg ti dongdong. Ket dida nabalin ti nangan iti daydiay.

⁴¹ Ngem isu kinunana, Mangyegcayo ngarud iti bel-laay. Ket isu ti inwarakiwacna iti dongdong; ket kinunana, Ibucbocmo nga agpaay cadagiti tattao, tapno manganda coma. Ket awanen ti peggad idi dongdong.

⁴² Ket maysa a lalaki dimteng a naggapu iti Baal-salisa, ket nangyeg iti lalaki ti Dios cadagiti tintinapay ti umuna a bunga, duapulo a tinapay a cebada, ken naganus a bunga ti mais iti supotna. Ket isu kinunana, Itedmo cadagiti tattao tapno mabalinda a canen.

⁴³ Ket ti tagabu kinunana, Ania, idayac coma daytoy iti sango dagiti sangagasut a lallaki? Ngem isu kinunana, Itedmo cadagiti tattao, tapno canenda; ta ni Jehova kinunana ti castoy, Canendanto, ket addantopay.

⁴⁴ Iti casta isu ti indayana iti sangoda ket nanganda ket adda natdada iti daydi, a cas mayalubog iti sao ni Jehova.