2 Ar-ari 1 - Ti Biblia (1973)

Ni Ocozias agbaon ken Elias, ket matay a mayannurot iti sao ni Elias. Ni Joram ti sonona.

¹ Ket ti Moab immalsa a maibusor iti Israel iti calpasan ti ipapatay ni Acab.

² Ket ni Ocozias natnag cadagiti rejas ti nangatngato a siledna nga adda idi sadi Samaria, ket nagsakit: ket nagbaon cadagiti babaonen, ket kinunana cadacuada, Incayo, ket umumancayo ken ni Baal-zebub, a dios ti Ecron, no umimbagacto iti daytoy a nasakit.

³ Ngem ti angel ni Jehova kinunana ken ni Elias a Tisbita, Tumacderca, ket sumang-atca a sumabet cadagiti babaonen ti ari ti Samaria, ket cunaem cadacuada, Agsipud aya ta awan ti Dios iti Israel, nga dacayo incayo umuman ken ni Baal-zebub a dios ti Ecron?

⁴ Gapuna ita a castoy ti cuna ni Jehova, Dicanto dumsaag iti idda a pacayuliam, no di ket sica mataycanto a di bumurong. Ket ni Elias pimmanaw.

⁵ Ket dagiti nabaon simmublida kencuana, ket isu kinunana cadacuada, Ania ti gapuna a nagsublicayo?

⁶ Ket isuda kinunada kencuana, Simmang-at ti maysa a lalaki a nangsabet cadacami, ket kinunana cadacami, Incayo, ket agsublicayo iti ari a nangibaon cadacayo, ket cunaenyo kencuana, Castoy ti cuna ni Jehova, Agsipud aya ta awan ti Dios iti Israel, a sica agbaonca ti umuman ken ni Baal-zebub a dios ti Ecron? Gapuna a sica dicanto dumsaag iti idda a pacayuliam, no di ket sica mataycanto a di bumurong.

⁷ Ket isu kinunana cadacuada, Ania a kita ti tao daydi nga simmang-at a simmabet cadacayo, ken nangibaga cadacayo cadagitoy a balbalicas?

⁸ Ket isuda simmungbatda kencuana, Isu idi ti maysa a lalaki a muldotan, ket nagbarikes iti barikes a lalat iti aglicmut cadagiti lomona. Ket isu kinunana, Isu ni Elias a Tisbita.

⁹ Idin ti ari nangibaon kencuana iti maysa a capitan ti limapulo a tattao agraman limapulona. Ket simmang-at a napan kencuana: ket, adtoy nga isu adda idi a situtugaw iti tapaw ti turod. Ket isu kinunana kencuana, O lalaki ti Dios, ti ari kinunana, Sumalogca.

¹⁰ Ket ni Elias simmungbat ket kinunana iti capitan ti limapulo, No siac maysaac a lalaki ti Dios, Umulog coma ti apuy nga aggapu iti langit, ket runawennaca agraman limapulom. Ket immulog ti apuy a naggapu iti langit, a nangrunaw kencuana agraman iti limapulona.

¹¹ Ket isu nagbaon manen kencuana iti sabali a capitan ti limapulo agraman limapulona. Ket isu simmungbat ket kinunana kencuana, O lalaki ti Dios, ti ari kinunana ti castoy, Sumalogca a masingdat.

¹² Ket ni Elias simmungbat ket kinunana cadacuada, No siac maysaac a lalaki ti Dios, Umulog coma ti apuy nga aggapu iti langit, ket runawennaca ken ti limapulom. Ket ti apuy ti Dios immulog a naggapu iti langit, ket isu rinunawna ken ti limapulona.

¹³ Ket imbaonna manen ti capitan ti maicatlo a limapulo agraman limapulona. Ket ti maicatlo a capitan ti limapulo simmang-at, ket immay ket nagparintumeng iti sango ni Elias, ket nagdawat kencuana, ket kinunana, O lalaki ti Dios, agdawatac kenca, ipaaymo coma a ti biagco, ken ti biag dagitoy limapulo nga ad-adipenmo, maipategda coma ita saclangmo.

¹⁴ Adtoy, a ti apuy immulog a naggapu iti langit, ket, rinunawna dagidi immununa a dua a capitan dagiti limapulo agraman limapuloda; ngem ita ipaaymo coma a maipateg ti biagco iti saclangmo.

¹⁵ Ket ti angel ni Jehova kinunana ken Elias, Makipagsalogca kencuana: dica agbuteng kencuana. Ket isu timmacder, ket nakipagsalog kencuana agingga iti ari.

¹⁶ Ket isu kinunana kencuana, Castoy ti cuna ni Jehova, Agsipud ta nangibaonca cadagiti babaonen nga immuman ken ni Baal-zebub a dios ti Ecron, gapu aya ta awan ti Dios iti Israel nga umumanam iti saona? gapuna a dicanto dumsaag iti idda a pacayuliam, no di ket sica mataycanto a di-bumurong.

¹⁷ Iti casta natay a mayannurot iti sao ni Jehova nga insao ni Elias. Ket ni Joram nangrugi a nagari iti saadna iti maicadua a tawen ni Joram nga anac ni Josafat nga ari ti Juda; agsipud ta isu awan idi ti anacna a lalaki.

¹⁸ Ket ti matda cadagiti ar-aramid ni Ocozias nga inaramidna, saan aya a naisurat iti libro dagiti cronicas dagiti ar-ari ti Israel?