1 Timoteo 4 - Ti Biblia (1973)

Impadtona ti panaglicud iti pammati.

¹ Ngem ti Espiritu nalawag ti panagcunana a cadagiti maududi nga aldaw, dagiti dadduma suminadanto iti pammati, nga ipangagda dagiti espiritu a mangsulisog, ken dagiti sursuro dagiti demonio.

² Gapu iti pinaginsisingpet dagiti agsao cadagiti ulbod, idinto a timmangken ti concienciada, a cas la namarcaan ti landoc a bumarbara;

³ Nga iparitda ti pannakiasawa, ken ibilinda ti di pannangan cadagiti taraon a pinarsua ti Dios, a maipaay nga awaten coma babaen ti panagiaman dagiti mammati ken dagiti macaammo ti pudno.

⁴ Ta isu-amin a pinarsua ti Dios nasayaat, ket awan ti rebbeng nga idian, no awaten la ketdi a buyugen ti panagyaman:

⁵ Ta masantificar gapu iti sao ti Dios ken iti panagcararag.

Natacneng ken naregta a panagaywan.

⁶ No ipalawagmonto cadagiti cacabsat dagitoy a banbanag, sicanto ti maysa a naimbag a ministro ni Cristo Jesus, a nataraonan cadagiti sao ti pammati ken ti naimbag a sursuro a sinurotmo:

⁷ Ngem idiam dagiti paspasaw a sarsarita dagiti babbaket; ket agwatwatca a maipaay iti kinasaato:

⁸ Ta ti panangwatwat iti bagi bassit ti magonggona; ngem ti kinasanto mangted ti gonggona iti isu-amin, ta adda cari iti biag nga agdama, ken iti mapasungad.

⁹ Papatien daytoy a sao, ket maicari nga awaten dagiti isu-amin.

¹⁰ Ta maipuon itoy met laeng agbannog ket agsagabacami; gapu ta dackel ti inanamami iti Dios a sibibiag, isu a Manangisalacan cadagiti isu-amin a tattao, nangrona cadagiti mamati.

¹¹ Dagitoy a banbanag ti ibilinmo ken isurom.

¹² Awan coma ti pacaumsian iti kinaubingmo; no di ket, sica coma ti ulidan cadagiti namati, iti sao, iti panagbiag, iti ayat, iti pammati, ti kinadalus.

¹³ Agingga iti iyaayco, umagawaca iti panagbasbasa, iti panamagbaga, iti panangisursuro.

¹⁴ Dica liwayan ti sagut nga adda kenca, a naited kenca babaen ti padto, iti pannacaipatay dagiti im-ima dagiti panglacayen.

¹⁵ Gagetam dagitoy a banbanag, isuda laeng ti sangoem, tapno ti irarangaymo maiparangarang coma cadagiti isu-amin:

¹⁶ Saluadam ti bagim ken ti isursurom; agtalinaedca cadagitoy a banag; ta no aramiden daytoy, isalacanmonto ti bagim met laeng ken dagiti met dumngeg kenca.