1 Timoteo 3 - Ti Biblia (1973)

Dagiti annongen dagiti obispo ken diacono.

¹ Papatien daytoy a sao: No adda agtarigagay iti saad nga obispo, naimbag nga aramid ti tarigagayanna.

² Masapul ngarud a ti obispo awan ti pacapilawanna, asawa ti maymaysa a babai, managparbeng, nasayaat ti ricnana, naemma, managpadagus, nalaing a mangisuro;

³ Saan a managinum ti arac, saan a mannakicabil, no di ket naimbag ti awidna; saan a mannakiringgor, saan a naagum ti pirac;

⁴ Maysa a mangituray a naimbag ti balayna met laeng, nga iturayanna dagiti annacna iti amin a kinatacneng;

⁵ (Ta no ti maysa a tao dina ammo ti mangurnos iti balayna met laeng; casanonto ti panangaywanna iti Iglesia ti Dios?)

⁶ Saan a baro iti sursuro, di la ket ta agtangsit ket matnag iti pannacadusa ti diablo.

⁷ Masapul pay nga adda naimbag a damagna cadagiti taga ruar, di la ket ta matnag iti pannacaibabain ken iti silo ti diablo.

⁸ Casta met dagiti diacono natacnengda, saan a dua ti dilada, saanda a managinum ti adu nga arac, saanda a naagum ti pirac;

⁹ A cupicupanda ti palimed ti pammati a buyugen ti nadalus a nakem.

¹⁰ Ket dagitoy masuutda nga umuna, ket iti casta tumulongda a cas diacono no awanto ti pacapilawanda.

¹¹ Casta met, dagiti babbai natacnengda coma saanda a mamadpadakes, managparbengda matalecda iti isu-amin.

¹² Dagiti diacono assawa coma ida ti maymaysa a babai, nga urnosenda a naimbag dagiti annac ken balbalayda.

¹³ Ta dagiti nagservi a naimbag iti saad a diacono, macagun-odda ti maysa a naimbag a casasaad a maipaay cadacuada, ken bumilegda iti pammati ken Cristo Jesus.

¹⁴ Dagitoy a banbanag isuratco kenca, a siinanamaac iti iyaayco kenca iti mabiit:

¹⁵ Ngem no mabayagto, tapno ammom no casano ti maiparbeng a cababalin ti sangacabbalayan ti Dios nga isu ti Iglesia ti Dios a sibibiag, nga adigi ken sadiri ti kinapudno,

¹⁶ Ket awan duadua, dackel ti palimed ti kinasanto: Daydi naiparang iti lasag, Napanecnecan iti espiritu, Nakita dagiti angel, Naicascasaba cadagiti nacion, Napapati ditoy lubong, Naipangato sadi gloria.