1 Timoteo 2 - Ti Biblia (1973)

Rebbeng nga icacaasi dagiti isu-amin a tao.

¹ Ibalacadco ngarud nga iyun-una, a maaramid coma dagiti araraw, dawdawat, panangibabaet, panagyaman, a maipuon cadagiti isu-amin a tattao;

² Maipuon cadagiti ar-ari ken cadagiti isu-amin nga adda iti panagturay; tapno agbiagtayo a natalna ken naulimec babaen ti kinasingpet ken kinanacman.

³ Daytoy naimbag ken macaay-ayo iti imatang ti Dios a Mangisalacan cadatayo;

⁴ Isu a cayatna nga isu-amin dagiti tattao maisalacanda coma, ket dumtengda iti pannacaammo ti pudno.

⁵ Ta maymaysa ti Dios, ken maymaysa ti Manangibabaet iti Dios cadagiti tao, ni tao a Cristo Jesus,

⁶ Isu a nangted ti bagina a subbot gapu cadagiti amin a tao a pamanecnec cadagiti aldaw a maiparbeng;

⁷ Ket gapu itoy naisaadac a mangascasaba ken apostol (ibagac ti pudno, saanac nga agulbod), mannursuro cadagiti Gentil iti pammati ken pudno.

Annongen dagiti babbai.

⁸ Tarigagayac ngarud nga agcarcararag coma dagiti tattao iti isu-amin a disso nga itayagda dagiti im-imada a nadalus nga awan ket ti pungtot wenno panagsusupiat.

⁹ Casta met, dagiti babbai agcawesda ti naemma, nga agarcosda a buyugen ti nacman ken saan a kinapalalo; saan a cadagiti buoc a sinal-lapid, ken balitok wenno perlas, wenno pagananay a nangina;

¹⁰ No di ket cadagiti naimbag nga aramid (cas maiparbeng cadagiti babbai nga agbibiag iti kinasingpet).

¹¹ Ti babai agsursuro coma a sitatalna a buyugen ti amin a kinaannugot.

¹² Ta diac ipalubos a ti babai isurona wenno adda turayna iti lalaki, no di ket agulimec coma.

¹³ Ta ni Adam nabukel nga immuna, calpasanna ni Eva;

¹⁴ Ket ni Adam saan a pinaulbod, ngem ti babai, idinto a naulbod, nacaaramid ti basol:

¹⁵ Nupay casta, isu maisalacanto iti panagpasngayna cadagiti annac, no agtalinaed iti pammati ken ayat ken kinadalus, ken kinanacman.