1 Timoteo 1 - Ti Biblia (1973)

Ipalagipna ken Timoteo dagiti bilbilinna.

¹ Ni Pablo, apostol ni Cristo Jesus, gapu iti bilin ti Dios a Manangasilacan cadatayo, ken ni Cristo Jesus, nga inanamatayo;

² Isuratco ken Timoteo, napaypayso nga anacco iti pammati: Parabur, asi ken talna ti Dios nga Amatayo, ken ni Cristo Jesus nga Apotayo.

Dagiti naulbod a sursuro, ken ti evangelio ti parabur. Pannakidangadang iti nasayaat a pamay-an.

³ Cas dinawatco kenca, nga agbatica coma idiay Efeso, idi napanac idiay Macedonia, tapno ibilinmo coma cadagiti dadduma a dida mangisuro ti sabsabali a sursuro.

⁴ Ket dida sangoen dagiti sarsarita a paspasaw ken capuonan nga awan panungpalanna, isu a paggapuan dagiti supsupiat a nangnangrona ngem ti panagservi iti Dios, nga adda iti pammati.

⁵ Ngem ti pacaipaayan ti bilin isu ti ayat nga agtaud iti maysa a puso a nadalus, ken iti maysa a naimbag a nakem ken ti pammati a di balinbalinen:

⁶ Dagiti dadduma simminada cadagitoy a banag, ket napanda iti maysa nga awan capapay-anna a panagsarsarita;

⁷ A tarigagayanda ti agbalin a mannursuro ti linteg, idinto a dida maawatan uray ti sasaoenda, uray ti panecnecanda a sitatalged.

⁸ Ngem datayo ammotayo a ti linteg naimbag, no ti maysa a tao aramatenna a sililinteg,

⁹ Cas pagaammotayo daytoy, a ti linteg saan a nabangon a maipaay iti nalinteg, no di ket maipaay cadagiti nasukir ken managsalungasing, cadagiti di agdayaw iti Dios ken cadagiti managbasol cadagiti nadangcuc, ken cadagiti awan sagrado cadacuada, cadagiti mamapatay iti ama ken ina, cadagiti macapapatay.

¹⁰ Maipaay cadagiti mannakicamalala ken cadagiti tumulad cadagiti taga Sodoma, cadagiti agtacaw cadagiti tao, cadagiti natiri, cadagiti agsapata ti ulbod ken uray ania a sabali a maisalungasing iti nasayaat a sursuro;

¹¹ Cas mayannurot iti nagloriaan nga evangelio ti bendito a Dios, isu a naitalec caniac.

¹² Agyamanac iti daydiay namapigsa caniac, a ni Cristo Jesus nga Apotayo, gapu ta imbilangnac a matalec, a dinutucannac iti panagaywan:

¹³ Idinto nga idi punganay, managtabbaaw ken manangidadanes ken manamarparigatac; nupay casta nacugon-odac ti asi agsipud ta inaramidco a diac am-ammo idi diac pay namati;

¹⁴ Ngem ti parabur ni Apotayo agluplupias a maibuyog iti pammati ken ayat ken Cristo Jesus.

¹⁵ Papatien daytoy a sao, ket maiparbeng nga awaten dagiti isu-amin, a ni Cristo Jesus immay ditoy lubong tapno isalacanna dagiti managbasol; ket siac ti cangronaan cadacuada:

¹⁶ Nupay casta gapu itoy nacagun-odac ti asi, tapno ni Jesu-Cristo ipakitana coma caniac, a nangnangrona, ti amin nga aglablabes nga anusna, cas pagulidanan dagiti mamatinto kencuana a maipaay iti biag nga agnanayon.

¹⁷ Ket iti ari cadagiti ginasgasut a tawen, saan a matay, di makita, iti maymaysa a Dios madaydayaw ken mapadayag coma iti agnanayon nga awan inggana, Amen.

¹⁸ Daytoy a bilin italecco kenca, anacco a Timoteo, cas mayannurot cadagiti cadaanan a padto a maipapan kenca agsoldadoca coma gapu cadacuada iti nasayaat a kinasoldado;

¹⁹ A taginayonem ti pammati ken ti naimbag a nakem; isu nga idinto a tinal-licudan dagiti dadduma, narbada iti maipapan iti pammati.

²⁰ Ket isuda da Himeneo ken Alejandro; nga inyawatco ida ken Satanas, tapno masursuroanda a di agtabbaaw.