1 Taga-Corinto 9 - Ti Biblia (1973)

Dagiti mangicascasaba ti evangelio rebbengda ti mataraonan iti evangelio.

¹ Saanac aya a siwawaya? Saanac aya nga apostol Saanco aya a nakita ni Jesus nga Apotayo? Saan aya a dacayo ti gapuanac iti Apo?

² Uray no cadagiti sabali saanac nga apostol, ngem cadacayo apostolac; ta ti tanda ti kinaapostolco isu ti caaddayo iti Apo.

³ Daytoy isu ti isungbatco cadagiti mangintuud caniac:

⁴ Apayapay awan ti calinteganmi a mangan ken uminum?

⁵ Awan aya ti calinteganmi a mangicuyog iti dinnami iti maysa a babai nga asawa a namati, a cas cadagiti dadduma nga apostol, ken dagiti cacabsat ti Apo, ken ni Cefas?

⁶ Wenno siac laeng aya ken ni Bernabe ti awan ti calinteganmi a di agtrabajo?

⁷ Siasino ti soldado nga agservi uray caano a cucuana ti magastona? siasino ti mangimula ti maysa a cauvasan ket saan a mangan iti bungana? wenno siasino ti mangpastor ti sangarbaanan nga an-animal, ket saan nga agtaraon iti gatas ti sangarbaanan?

⁸ Sao-ec aya daytoy a cas cadawyan laeng dagiti tattao; wenno saan met aya a sao-en ti linteg ti casta?

⁹ Ta adda a naisurat iti linteg ni Moises: Dica bozalan ti vaca nga agiric ti pagay cadagiti sacsacana. Dagiti vaca aya ti igaga ti Dios,

¹⁰ Wenno insaona a maipaay laeng cadatayo? Gapu cadatayo awan duadua a naisurat: Ta ti agarado, rebbengna ti agarado a siinanama, ket ti agbayo, siinanama a mairanud.

¹¹ No nagmulacami cadagiti banbanag a naespirituan a maipaay cadacayo, dackel a banag aya no agapitcami cadagiti cucuayo a naindagaan?

¹² No dagiti sabali adda calinteganda cadacayo, dinto dacdackel pay ti calinteganmi? Nupay casta, saanmi nga inaramat daytoy a calintegan; no di ket isu-amin sagabaenmi, tapno dicam mangicabil ti aniaman a lapped iti evangelio ni Cristo.

¹³ Saanyo nga ammo a dagiti agtrabajo cadagiti nasantoan a banag, manganda cadagiti cucua ti Templo, ket dagiti agservi iti altar, makiapagda cadagiti cucua ti altar?

¹⁴ Casta met imbilin ti Apo, a dagiti mangicascasaba iti evangelio, agbiagda coma gapu iti evangelio.

Ti awan aniaman a panagagum ni Pablo ken ti ayatna. Panagregta dagiti cristiano.

¹⁵ Ngem diac inaramat ti uray ania cadagitoy; ket diac isurat dagitoy a banag tapno casta ti maaramid caniac: naim-imbag caniac coma ti matay ngem iti adda mangiccat ti capapay-an ti dayawco.

¹⁶ Ta uray no icascasabac ti evangelio, awan ti aniaman a panagpasindayagco; ta naipabaclay caniac daytoy a pannacasapul; ay-ayac pay ngarud no diacto icascasaba ti evangelio.

¹⁷ Ta no aramidec daytoy a gapu ta nakemco laeng adda gonggonac; ngem no mapilitac, ti saad a panagaywan naitalec caniac.

¹⁸ Ania ngarud ti gonggonac? Nga no icascasabac ti evangelio, ipaayco ti evangelio nga awan baybayadna, tapno ti panangaramatco iti calintegac iti evangelio saan a dakes.

¹⁹ Ta idinto a siwayawayaac cadagiti isu-amin, pinaadipenac cadagiti isu-amin, tapno mairagpatco dagiti ad-adu.

²⁰ Iti casta cadagiti Judio, nagbalinac a Judio, tapno mairagpatco dagiti Judio; cadagiti adda iti babaen ti linteg nagbalinac a cas la adda iti babaen ti linteg idinto nga awanac iti babaen ti linteg, tapno mairagpatco dagiti adda iti babaen ti linteg;

²¹ Cadagiti awan lintegda, cas laac la awan lintegna idinto nga addaanac ti linteg ti Dios, iti babaen ti linteg ni Cristo, tapno mairagpatco dagiti awan ti lintegda.

²² Cadagiti nacapuy nagbalinac a cas nacapuy, tapno mairagpatco dagiti nacapuy: nagbalinac nga isu-amin cadagiti isu-amin, tapno cadagiti isu-amin a pamay-an maisalacanco dagiti dadduma.

²³ Ket aramidec amin a banag gapu iti evangelio, tapno mairamanac kencuana.

²⁴ Saanyo nga ammo nga iti paglulumbaan agtarayda amin, ngem maymaysa laeng ti umawat ti gonggona? Agtaraycayo met iti casta, tapno magunodanyo.

²⁵ Ket tunggal tao a makisalisal, agparbeng cadagiti isu-amin a banbanag. Isuda aramidenda daytoy tapno magun-odanda ti maysa a balangat nga agrupsa, ngem datayo ti saan nga agrupsa.

²⁶ Siac ngarud agtarayac iti castoy, saan a cas la makigasangasat; ta ti pannakidangadangco saan a cas la makicabil iti angin:

²⁷ Ngem gubgubatec ti bagic, ket iturayac; di la ket ta idinto a kinascasabaac dagiti sabali, mapagtalawacto met.