1 Taga-Corinto 7 - Ti Biblia (1973)

Ti maipapan iti panangasawa.

¹ No maipapan cadagiti banbanag nga insuratyo caniac. Naimbag a ti lalaki saanna coma a sagiden ti babai.

² Ngem gapu iti pannakicamalala, tunggal lalaki adda coma asawana, ket tunggal babai adda coma asawana.

³ Ited coma ti lalaki iti asawana ti annongna a cas asawa, ket casta met ti babai ken asawana.

⁴ Ti babai saan nga isu ti agtagicua iti bagina, no di ti asawana; ket casta met ti lalaki saan nga isu ti agtagicua iti bagina no di ni asawana.

⁵ Saancay nga agpipinnaidam iti maysa ken maysa, malacsid no nagnumoanyo nga agpadpada, tapno sangoenyo a cancanayon ti panagcararag; ket calpasanna agdinnacayo manen, di la ket ta sulisugennacayo ni Satanas gapu iti dicay panagdinna.

⁶ Ngem cunac daytoy a cas pammalacadco, ngem saan a cas bilin.

⁷ Ta cayatco nga isu-amin dagiti tao cacasda la coma caniac. Ngem tunggal maysa adda bucodna a sagut ti Dios; ti maysa, iti maysa a talunggading; ket ti sabali, iti sabali a talunggading.

⁸ Ngem cunac cadagiti saan a nakiasawa ken cadagiti balo a babbai: Naimbag cadacuada no mataginayondanto a cas caniac.

⁹ Ngem no dida macaitured, makiasawada: ta nasaysayaat ti makiasawa ngem iti sumged.

¹⁰ Ngem cadagiti addaan asawa ibilinco, ngem saan a siac, no di ti Apo: a di sumina ti babai ken asawana.

¹¹ (Ngem no sumina, antaeng a di makiasawa, wenno makicappia coma ken asawana); ket ti lalaki saanna coma nga isina ni asawana.

¹² Ngem no maipapan cadagiti sabali, siac cunac, saan a ti Apo: No ti lalaki a cabsat adda asawana a di mamati, ket ti babai siaayat a makicabbalay kencuana, dina coma isina.

¹³ Ket ti babai nga adda asawana a di mamati, ket ti lalaki siaayat a makicabbalay kencuana, ti babai dina coma panawan ni asawana.

¹⁴ Ta ti lalaki a di mamati mapagsanto ken asawana, ket ti babai a di mamati mapagsanto ken asawana; ta no saan a casta, dagiti annacyo saanda coma a nadalus: ngem ita nasantoanda.

¹⁵ Ngem no ti di mamati suminanto, sumina laeng; saan a paadipen ti cabsat a lalaki wenno babai cadagitoy a banag, ti Dios inayabannatayo nga agbiag iti talna.

¹⁶ Ta casano ti pannacaammom, babai, no maisalacanmonto ni asawam? wenno casano ti pannacaammom, lalaki, no maisalacanmonto ni asawam?

¹⁷ Ngem cas iti panangbunong ti Apo iti tunggal maysa: ken no casano ti panangawis ti Dios iti tunggal maysa, casta coma ti panagbiagna: ket castoy ti ibilinco cadagiti isu-amin nga Iglesia.

¹⁸ Naayaban ti asinoman a tao a nacugit? Agtalinaed coma a nacugit. Adda naayaban a di nagcugit? Dayta saan coma a pacugit.

¹⁹ Ti pannacacugit awan papaayna, ket ti saan a pannacacugit awan papaayna; ngem ti napateg isu ti panangtungpal cadagiti bilbilin ti Dios.

²⁰ Tunggal maysa agtaeng coma iti casasaad a nacaayabanna.

²¹ Naayabanca idi agdamaca nga adipen? Dica pagdanagan daytoy; ngem no mabalinmo met ti agwayawaya, aramatem coma.

²² Ta ti naayaban iti Apo, nga agdama a paad-adipen, isu agwayawaya iti Apo: casta met, ti naayaban nga agdama nga agwayawaya, isu adipen ni Cristo.

²³ Nagatangcayo iti maysa a pateg; dicay coma paad-adipen cadagiti tattao.

²⁴ Cacabsat, tunggal maysa agtaeng coma iti Dios, iti daydiay casasaad a nacaayabanna.

²⁵ No maipapan cadagiti babbalasang, awan ti bilin ti Apo caniac; ngem cas iti nacagun-od ti asi, a matalec ti Apo ibagac ti ipagarupco.

²⁶ Pagarupec ngarud a daytoy isu ti naimbag gapu iti rigat nga adda cadacayo; a nasayaat a ti tao agtaeng coma a cas iti casasaadna ita.

²⁷ Addaca a naisinggalut iti maysa nga asawa a babai? dica tarigagayan ti lumapsut. Addaca a nacalapsut iti maysa nga asawa a babai? dica sumapul ti asawam.

²⁸ Ngem uray pay no mangasawacanto, saanca a macabasol: ket no ti maysa a balasang makiasawanto, saan a macabasol. Ngem dagita, addanto rigatda iti lasag, ket cayatco coma a malisianyo daytoy.

²⁹ Ngem daytoy cunac, cacabsat: Ti tiempo a matda bassiten; nga dagiti lallaki nga adda assawada, agbalinda coma a cas la awan ti assawada;

³⁰ Ket dagiti agsangit, cas la coma dida agsangit; ket dagiti agragsac, cas la coma dida agragsac; ket dagiti aggatang, cas la awan ti tagicuaenda;

³¹ Ket dagiti mangaramat ti lubong, dida coma cas aglablabes: ta ti ugali daytoy lubong lumabas.

³² Ngem cayatco coma nga awan dagiti pacaringgoranyo. Ti lalaki a saan a nangasawa, agawaanna dagiti banag ti Apo, no casano ti panangay-ayona iti Apo:

³³ Ngem ti lalaki a nangasawa, agawaanna dagiti banbanag toy lubong, no casano ti panangay-ayona iti asawana, Ket mabingay ti panggepna.

³⁴ Castamet ti babai nga awan asawana wenno ti balasang, agawaanna dagiti banbanag ti Apo, tapno agbalin a nasantoan, iti bagi ken espiritu nga agpadpada: ngem ti naasawaan a babai, agawaanna dagiti banag ti lubong, no casano ti panangay-ayona ken asawana.

³⁵ Ket daytoy cunac tapno paglainganyo; saan a tapno silwancayo, no di gapu iti natacneng ken tapno mabalinyo ti agservi iti Apo nga awan macasingsinga.

³⁶ Ngem no ti maysa pagarupenna a dinto maipaay iti balasangna, no palabsenna ti casayaatan ti tawenna a dina iyasawa, ket no maiparbeng, aramidenna coma ti cayatna: saan a macabasol; makiasawada ngarud.

³⁷ Ngem ti adda a sititibker iti pusona, nga awan pacasapulanna, ket matngelanna iti nakemna met laeng, ket impatona iti pusona a taginayonennanto ti balasangna, naimbagto ti aramidenna.

³⁸ Iti casta, ti mangiasawa iti balasang, nasayaat ti aramidenna; ket ti saan a mangiasawa kencuana, nasaysayaat pay ti aramidenna.

³⁹ Ti babai nga asawa naisingalut iti bayat ti panagbiag ni asawana; ngem no natay ti asawa, adda a siwawaya a makiasawa iti cayatna; isuna laeng a maaramid coma a mayalubog iti Apo.

⁴⁰ Ngem pagarupec a nagasgasatto no mataginayon cas iti casasaadna; ket inanamaec nga adda met caniac ti Espiritu ti Dios.