1 Taga-Corinto 6 - Ti Biblia (1973)

Ungtanna ida gapu ta nagriringgorda iti pangocoman dagiti saan a cristiano.

¹ Maitured aya ti maysa cadacayo, idinto nga adda pangidarumanna iti sabali, nga ipanna iti pangocoman dagiti nakil-lo, ket saan nga iti saclang dagiti sasanto?

² Dicay ammo aya a dagiti sasanto ocomendanto ti lubong? ket no ocomenyonto ti lubong, saancayo aya a maicari a mangocom cadagiti banbanag a bassit unay ti pategda?

³ Saanyo nga ammo aya a mangocomtayto cadagiti angel? dinto nangnangrona pay cadagiti banag itoy a biag?

⁴ No ngarud adda ocomenyo iti maipapan cadagiti banbanag daytoy a biag, pilienyo aya a mangocom dagiti nacurang ti pategda iti Iglesia?

⁵ Cunac cadacayo tapno pagbainanyo. Apay awan aya cadacayo ti uray maysa a tao a masirib, nga isu ti macabalin coma a mangocom cadagiti cacabsatna,

⁶ A di ket no ti cabsat ringgorenna ti cabsatna, ket ipanna iti saclang dagiti saan a mammati?

⁷ Ita ngarud, maysa a basol cadacayo, ti caadda ringgoringgor ti maysa ken maysa. Apayapay dicay coma itured ti pannacaranggas? apayapay dicay coma anusan ti mapucawan ti calintegan?

⁸ Ngem dacay met laeng ti agaramid iti kinakil-lo ket mangal-lilawcayo cadagiti cacabsatyo met laeng.

⁹ Dicay ammo aya a dagiti nakil-lo didanto tawiden ti pagarian ti Dios? Dicay coma maallilaw: uray dagiti mannakiabig, uray dagiti agrucbab cadagiti ladladawan uray dagiti makicamcamalala, uray dagiti binabai, uray dagiti tumulad cadagiti taga Sodoma,

¹⁰ Uray dagiti mannanacaw, uray dagiti naagum, uray dagiti managbarbartec, uray dagiti managtabbaaw, uray dagiti managpaanac, saandanto a tawiden ti pagarian ti Dios.

¹¹ Ket cacastada idi dagiti dadduma cadacayo: ngem nadalusancayo, ngem napagsantocayo, ngem mapalintegcayo babaen iti nagan ni Apo Jesu-Cristo, ken iti Espiritu ti Diostayo.

Dagiti bagitayo isu ti camcameng ti bagi ni Cristo.

¹² Dagiti isu-amin a banbanag maipalubosda caniac, ngem saan nga isuda amin maiparbeng; dagiti isu-amin a banbanag maipalubosda caniac, ngem saanacto a paadipen ti uray aniaman cadacuada.

¹³ Dagiti taraon maipaayda iti tian, ket ti tian maipaay cadagiti taraon: ngem ti Dios panungpalenna ida nga agpadpada. Ngem ti bagi saan a maipaay iti pannakiabig, no di ket maipaay iti Apo; ket ti Apo maipaay iti bagi:

¹⁴ Ket ti Dios saan laeng a pinagungarna ti Apo, no di ket pagungarennatayto met gapu iti pannacabalinna.

¹⁵ Dicay ammo aya a dagiti bagbagiyo isuda dagiti camcameng ni Cristo? Alaecto aya ngarud dagiti camcameng ni Cristo, ket pagbalinecto ida a camcameng ti maysa a balangcantis? Ni caanoman.

¹⁶ Dicay ammo aya a ti makitipon iti maysa a balangcantis, makipagmaymaysa a bagi? Ta cunana: Isuda a dua maymaysadanto a lasag.

¹⁷ Ngem ti makical-laisa iti Apo, makipagmaymaysanto nga espiritu.

¹⁸ Adaywanyo ti pannakicamalala. Uray ania a basol nga aramiden ti tao, adda iti ruar ti bagi; ngem ti mannakicamalala, agbasol ti macadadael iti bagina met laeng.

¹⁹ Dicay aya ammo a ti bagiyo isu ti Templo ti Espiritu Santo, nga adda cadacayo, isu a naggapu iti Dios? Ket saanyo a cucua ti bagiyo;

²⁰ Ta nagatangcayo iti maysa a pateg; pagdayawyo ngarud ti bagiyo iti Dios.