1 Taga-Corinto 5 - Ti Biblia (1973)

Rebbeng a pagtalawen iti Iglesia dagiti dakes a tao.

¹ Maipadpadamagen nga adda mannakicamalala cadacayo, ket iti casta a kita ti pannakicamalala uray cadagiti Gentil awan, a ti maysa cadacayo cupicupanna ti asawa ni amana.

² Ket dacayo agtangsitcayo, idinto a rebbengyo coma ti agladingit tapno maiccat coma iti tengngayo ti nagaramid iti castoy.

³ Ta siac, iti kinapudnoanna, uray awanac cadacayo, sisasango ti nakemco, Ket daydiay nakingapuanan iti castoy nga aramid, cas la addaac a sisasango, impatocon,

⁴ Gapu iti nagan ni Apotayo a Jesus, idinto a naggigimongcayo ken ti nakemco, gapu iti pannacabalin ni Apotayo a Jesus,

⁵ Dayta mayawat coma ken Satanas, a maipaay a pacapucawan ti linalasag, tapno ti cararua maisalacan inton aldaw ni Apo Jesus.

⁶ Saan a nasayaat ti pagtangsitanyo. Dicay ammo aya a ti bassit a levadura banglesenna ti amin a masa?

⁷ Ugasanyo cadacayo ti baac a levadura, tapno agbalincayo a baro a masa, ta awanen ti levadurayo: ta naidaton met ti Pascuatayo, nga isu ni Cristo:

⁸ Iti casta ngarud ngilinentayo ti fiestatayo; saan a buyugen ti baac a levadura, saan met nga iti levadura ti panagipato ti dakes ken ti kinadakes, no di ket iti awan levadurana a tinapay ti kinadalus ti nakem ken kinapudno.

⁹ Insuratco cadacayo idi suratco, a dicay coma makicadcaddua cadagiti mannakicamalala;

¹⁰ Ngem saan a dagiti mannakicamalala ditoy lubong, dagiti naagum, dagiti managpaanac, dagiti agrucbab cadagiti ladladawan: ta no casta, masapulyonto ti pumanaw ditoy lubong:

¹¹ Ngem ita, insuratco cadacayo a dicay makicadcaddua iti uray siasino nga managanan cabsat, no isu mannakicamalala wenno naagum, wenno agrucbab cadagiti ladawan, wenno managsao ti dakes, wenno managbartec, wenno nagarumugam; iti casta a tao, uray makipangan kencuana, saan.

¹² Ta ania ti rebbengco a mangocom cadagiti taga ruar? Saan aya a dacayo ti mangocom cadagiti taga uneg?

¹³ Ngem dagiti taga ruar ocomen ida ti Dios. Iccatenyo ngarud daydiay tao a dakes iti tengngayo.