1 Taga-Corinto 4 - Ti Biblia (1973)

Dagiti adipen ni Cristo ken agaywan cadagiti palimed ti Dios.

¹ Iti casta ibilangdacami coma a ministro ni Cristo, ken agaywan cadagiti palimed ti Dios.

² Castamet masapul a dagiti agaywan tattaoda coma a matalec.

³ Ngem no caniac, bassit unay a banag no maocomac cadacayo wenno iti panangocom dagiti tattao: uray siac met laeng diac ocomen ti bagic.

⁴ Ta awan ti ammoc a macadadael caniac; ngem saanac a mapalinteg gapu itoy, no di ket ti mangocom caniac isu ti Apo.

⁵ Iti casta ngarud awan coma ti ocomenyo no dina pay pannacaipaay, agingga iti umay ti Apo; isu a mangipanayagto iti lawag cadagiti nailemmeng a banag dagiti sipnget, ket iparangarangnanto dagiti panagem dagiti puspuso; ket iti dayta addanto dayaw iti tunggal maysa iti Dios.

Kinatangsit dagiti taga Corinto; kinapacumbaba ken cababalin dagiti apostol.

⁶ Ket dagitoy a banbanag, cacabsat, inaramatco ida a cayarigan ni Apolos ken siac, gapu cadacayo: tapno masursuroyo coma cadacami a dicay lumbes iti adda a naisurat; tapno awan coma cadacayo ti agtangsit maipoon iti maysa a bumusor iti sabali.

⁷ Ta siasino ti mangaramid kenca a maidumaca? wenno ania ti adda kenca a dica inawat? Ngem no inawatmo, apayapay pagtangsitmo, a cas la ket tay dica inawaten?

⁸ Napnecancayon; bimmacnangcayon; nacapagaricayon nga awancami; ket sapay coma ta agaricayo tapno makipagaricami met cadacayo.

⁹ Ta pagarupec a ti Dios incabilnacami nga apostol, a maipanayag a maud-udi a cas la nakedngan iti ipapatay: ta naaramidcami a buyaen ti lubong, dagiti angel ken dagiti tattao.

¹⁰ Nanengnengcami gapu ken Cristo; ngem mamasiribcayo ken Cristo; nacapuycami, ngem napigsacayo; madaydayawcayo, ngem malalais cami.

¹¹ Agingga itoy horas nga agdama, mabisincami, ken mawawcami, ket addacam a lamolamo, ken matungtungpacami, ket awan ti masnup a balaymi;

¹² Ket addacam a napacsuyan iti bannog, a panggedmi dagiti im-imami met laeng: no pagsasao-andacami, pagsaoanmi ida ti naimbag; no irurumendacami, ibturenmi;

¹³ No ibabaindacami, agpacpacaasicami; pinagbalindacami a rugit ti lubong, ken namontoon a rugit dagiti isu-amin a banbanag, agingga ita,

¹⁴ Saanco nga isurat dagitoy a banag tapno babainencayo no di ket bagbagaancayo a cas annacco nga ingungutec.

¹⁵ Ta uray coma no adda sangapulo ribo nga agaywan cadacayo ken Cristo, nupay casta awan ti adu nga ammayo; ta gapu ken Cristo Jesus, pinutotcayo babaen ti evangelio.

¹⁶ Dawatec ngarud cadacayo a tuladendac coma.

¹⁷ Ta gapu itoy imbaonco cadacayo ni Timoteo, nga anacco a dungdungngoen, ken matalec iti Apo; isu a mangipalagipto cadacayo cadagiti daldalanco ken Cristo, a cas isuroc met cadagiti isu-amin a disso, iti tunggal Iglesia.

¹⁸ Ngem dagiti dadduma addada a timmangsit a cas la ket tay saannacon nga umay cadacayo.

¹⁹ Ngem umayacto iti mabiit cadacayo, no ipalubos ti Apo; ket maammoacto, saan a ti sao dagiti agtangtangsit, no di ket ti cabaelanda.

²⁰ Ta ti pagarian ti Dios saan nga iti sinasao no di ket iti pannacabalin.

²¹ Ania ti cayatyo? umayac cadacayo nga itugotco ti pagsaplit, wenno ti naemma ken siayat a nakem?