1 Taga-Corinto 3 - Ti Biblia (1973)

Babalawenna ti saanda a panagtutunos.

¹ Ket siac, cacabsat, diac nabalin ti nakisao cadacayo a cas cadagiti naespirituan, no di ket cas cadagiti linalasag, a cas ububbing ken Cristo.

² Tinaraonancay ti gatas ket saan a carne; ta dicay mabalinan idi; ket uray ita dicay pay mabalinan;

³ Ta linalasagcayo pay laeng: ta idinto nga adda cadacayo dagiti imun ken susic, saancayo aya a linalasag, no agbibiagcayo cas iti ugali dagiti tattao?

⁴ Ta no ti maysa cunana: Siac caduanac ni Pablo; ket ti sabali: Siac caduanac ni Apolos; saancayo aya a cas la tattao a linalasag?

⁵ Asino ngarud ni Apolos, ket asino ni Pablo? Ministrosda a naaramat tapno namaticayo; ken cas iti inted ti Apo iti tunggal maysa.

⁶ Nagmulaac, ni Apolos nagsibug, ngem inted ti Dios ti idadackel,

⁷ Iti casta, uray ti agmula, uray ti agsibug, awan aniaman no di laeng ti Dios a mangted ti idadackel.

⁸ Ti agmula ken ti agsibug maymaysada a banag; ngem tunggal maysa awatennanto ti gonggonana cas mayannurot iti aramidna met laeng.

⁹ Ta catulongnacam ti Dios: dacayo ti talonen ti Dios, dacayo ti balayen ti Dios.

Ti mamati isu ti balay ti Dios; ni Cristo isu ti natibker a cimiento a pagbatayan daytoy a balay.

¹⁰ Cas iti parabur ti Dios a naited caniac, cas masirib nga agar-aramid ti balay, incabilco ti cimiento, ket sabali ti agbalay iti rabawna: ngem kitaen ti tunggal maysa no casano ti panagbalayna iti rabawna.

¹¹ Ta awan ti macabalin a mangicabil ti sabali a cimiento, no di laeng ti naicabilen, nga isu ni Jesu-Cristo.

¹² No adda agbalay iti rabaw daytoy a cimiento, ti balitoc, pirac, batbato a napateg, cayo, root, garami;

¹³ Ti aramid ti tunggal maysa maiparangarangto; ta ti aldaw ipakitananto ta maipalgacto gapu iti apuy; ket ti met laeng apuy padasennanto ti aramid ti tunggal maysa, no ania a kita.

¹⁴ No ti aramid a binalay ti siasinoman a tao iti rabawna, mataginayonto, awatennanto ti gonggona.

¹⁵ No ti aramid ti siasinoman a tao mapuuranto, mapucawanto; ngem isu met laeng maisalacanto, ngem cas la limmasat iti apuy.

¹⁶ Dicay ammo a dacay ti Templo ti Dios, ket, ti Espiritu ti Dios agtaeng cadacayo?

¹⁷ No siasinoman a tao dadaelenna ti Templo ti Dios, isu rebbaento ti Dios; ta ti Templo ti Dios nasantoan; ket dayta a Templo dacayo.

¹⁸ Awan coma ti mangal-lilaw iti bagina, No siasinoman a tao cadacayo ti agpanunot nga isu nasirib itoy lubong, agbalin coma a nanengneng tapno agbalin nga masirib.

¹⁹ Ta ti sirib daytoy lubong isu ti kinanengneng iti Dios. Ta adda a naisurat: Isu tiliwenna dagiti mamasirib iti kinasicapda met laeng:

²⁰ Ket sa manen: Ti Apo ammona dagiti panagis-isip dagiti mamasirib, Nga barengbarengda.

²¹ Iti casta ngarud awan coma ti agpasindayag gapu cadagiti tattao. Ta isu-amin dagiti banbanag cucuayo ida;

²² Uray ni Pablo, uray ni Apolos, uray ni Cefas wenno ti lubong, wenno ti biag wenno ti patay, wenno ti agdama, wenno ti mapasungad; cucuayo amin ida,

²³ Ket dacayo cucuanacay ni Cristo; ket ni Cristo cucua ti Dios.